ຕາມການຄາດຄະເນແລ້ວ, ພັກຊີຣີຢາຝ່ານຊ້າຍຢູ່ເກຼັກສາມາດຍາດໄດ້ໄຊຊະນະໃນການເລືອກຕັ້ງສະພາແຫ່ງຊາດກ່ອນກຳນົດ ຊຶ່ງຈັດຂຶ້ນໃນວັນທີ 25/1. ສິ່ງນີ້ແມ່ນມີຄວາມໝາຍເຊັ່ນດຽວກັນກັບເລື່ອງການນຳພັກຊີຣີຢາ, ທ່ານ Alexis Tsipras ກາຍເປັນນາຍົກລັດຖະມົນຕີຄົນໃໝ່ຂອງ ເກຼັກ ແລະ ກໍເປັນຄັ້ງທຳອິດນັບແຕ່ສົງຄາມໂລກຄັ້ງທີ 2, ມີພັກຝ່າຍຊ້າຍໄດ້ຂຶ້ນກຳອຳນາດຢູ່ປະເທດນີ້. ກົງກັນຂ້າມກັບຄວາມພູມໃຈຂອງຊາວ ເກຼັກ, ຫຼາຍປະເທດ EU ພວມສະແດງຄວາມເປັນຫ່ວງ ເມື່ອພັກຊີຣີຢາ ແມ່ນພັກຄັດຄ້ານນະໂຍບາຍຮັດເຂັມຄັດຂອງ EU ແຕ່ດົນນານມາແລ້ວ.
ພັກຊີຣີຢາຍາດໄດ້ໄຊຊະນະຢ່າງຂາດຂັ້ນ
|
ໝາກຜົນການເລືອກຕັ້ງຢ່າງເປັນທາງການໂດຍກະຊວງພາຍໃນ ເກຼັກ ປະກາດເມື່ອວັນທີ 26/1 ໄດ້ຢັ້ງຢືນໄຊຊະນະຢ່າງຂາດຂັ້ນຂອງ ພັກຊີຣີຢາ. ຕາມນັ້ນແລ້ວ, ພັກນີ້ໄດ້ຮັບໄຊຊະນະດ້ວຍ 36,37% ຈຳນວນບັດສະໜັບສະໜູນ, ເທົາ່ກັບ 149/ 300 ທີ່ນັ່ງໃນສະພາແຫ່ງຊາດ ເກຼັກ. ໝາກຜົນນີ້ໄດ້ລື່ນກາຍຢ່າງຂາດຂັ້ນເມື່ອທຽບໃສ່ພັກປະຊາທິປະໄຕໃໝ່ ND ຂອງນາຍົກລັດຖະມົນຕີ Antonis Samaras ຂະນະທີ່ຍາດໄດ້ພຽງ 76 ທີ່ນັ່ງເທົ່ານັ້ນ.
ໂຄງການຫາສຽງເລື່ອກຕັ້ງທີ່ສອດຄ່ອງກັບຄວາມມຸ່ງມາດປາຖະໜາຂອງຜູ້ປ່ອນບັດ.
ໄຊຊະນະຂອງ ພັກຊີຣີຢາບໍ່ເຮັດໃຫ້ຜູ້ຄົນທັງຫຼາຍຕົກສະເງີ້ ເພາະຜົນຂອງການຢັ່ງຫາງສຽງຫຼາຍຄັ້ງກ່ອນນັ້ນ ໄດ້ສະແດງໃຫ້ເຫັນວ່າ ພັກນີ້ຍາມໃດກໍຍາດໄດ້ບັດສະໜັບສະໜູນຈາກຜູ້ປ່ອນບັດສູງກວ່າເມື່ອທຽບໃສ່ພັກອື່ນໆ. ສາຍເຫດແມ່ນ ໂຄງການຫາສຽງເລື່ອກຕັ້ງຂອງພັກຊີຣີຢາ ສອດຄ່ອງກັບຄວາມມຸ່ງມາດປາຖະໜາຂອງຜູ້ປ່ອນບັດຊາວ ເກຼັກ, ຂະນະທີ່ໄດ້ຢືນຢັນຍົກເລີກນະໂຍບາຍຮັດເຂັມຄັດ, ຢຸດການຫຼຸດຜ່ອນເງິນເດືອນ ແລະ ໃຊ້ຈາຍສ່ວນລວມ, ຢຸດຕິການສໍ້ລາດບັງຫຼວງ. ຄວາມຈິງໄດ້ສະແດງໃຫ້ເຫັນວ່າ ເຖິງວ່າເສດຖະກິດ ເກຼັກ ໃນໄລຍະທີ່ຜ່ານມາ ໄດ້ຮັບການປົວແປງ, ແຕ່ຍ້ອນນະໂຍບາຍຮັດເຂັມຄັດ, ດັ່ງນັ້ນ, 25% ຈຳນວນພົນລະເມືອງຍັງຄົງຖືກວ່າງງານ, ຫຼາຍໆຄົນຕົກຢູ່ໃນສະາພບທຸກຍາກ. ດັ່ງນັ້ນ, ເບິ່ງຄືວ່າ ມີຜູ້ມີສິດເລືອກຕັ້ງບໍ່ໜ້ອຍໄດ້ຫຼົງລືມຄຸນຄ່າຂອງບັນດາບ້ວງເງິນຊ່ວຍກູ້ສາກົນ ແລະ ຫັນໄປສູ່ການປ່ນບັດໃຫ້ ພັກຊີຣີຢາ.
ໂດຍກຳແໜ້ນດ້ານຈິດຕະຂອງຜູ້ມີສິດເລືອກຕັ້ງ, ດັ່ງນັ້ນໃນບົດກ່າວປາໄສເຂົ້າດຳລົງຕຳແໜ່ງນາຍົກລັດຖະມົນຕີຢູ່ນະຄອນຫຼວງອາແທນເມື່ອວັນທີ 26/1, ການນຳພັກຊີຣີຢາ, ທ່ານ Alexis Tsipras ໄດ້ໃຫ້ຄຳໝັ້ນໝາຍຄືນໃໝ່ ຈະມານະພະຍາຍາມຢ່າງສຸດຂີດເພື່ອຜົນປະໂຫຍດຂອງປະຊາຊົນ ແລະ ປະເທດຊາດເກຼັກ. ກ່ອນນັ້ນ, ພາຍຫຼັງໄດ້ຮັບຊາບໝາກຜົນການເລືອກຕັ້ງ, ພັກຊີຣີຢາ ໄດ້ຖະແຫຼງວ່າ : ນັບແຕ່ວັນທີ 26/1, ເກຼັກຢຸດຕິ ນະໂຍບາຍຮັດເຂັມຄັດຊຶ່ງປະເທດນີ້ໄດ້ປະຕິບັດໃນ 5 ປີທີ່ຜ່ານມາຕາມການຮຽກຮ້ອງຂອງບັນດາເຈົ້າໜີ້ສາກົນເພື່ອແລກເອົາໂຄງການຊ່ວຍກູ້ດ້ານເສດຖະກິດ, ພ້ອມກັນນັ້ນ, ອາແທນ ໄດ້ຍົກອອກແຜນການປະຕິຮູບ, ລົງທຶນ ແລະ ຟື້ນຟູເສດຖະກິດຂອງຕົນເອງ.
ເອີລົບມີຄວາມເປັນຫ່ວງກັງວົນ.
ເຖິງວ່າໄດ້ສົ່ງໂທລະເລກຊົມເຊີຍເຖິງການນຳ ພັກຊີຣີຢາກໍຕາມ, ແຕ່ຕໍ່ໜ້າບັນດາຄຳຖະແຫຼງທີ່ໄປຝືນກັບຂໍ້ຕົກລົງກັບບັນດາເຈົ້າໜີ້, ຫຼາຍປະເທດໃນ EU ກໍບໍ່ລືມຢືນຢັນທັດສະນະຂອງ ເກຼັກ ແມ່ນຕ້ອງປະຕິບັດຄຳໝັ້ນໝາຍຮັດເຂັມຄັດ. ນາຍົກລັດຖະມົນຕີ ເຢຍລະມັນ ປາຖະໜາວ່າ ລັດຖະບານໃໝ່ຂອງ ເກຼັກ ຈະປະຕິບັດບັນດາຄຳໝັ້ນສັນຍາກັບບັນດາເຈົ້າໜີ້ສາກົນ. ສ່ວນນາຍົກລັດຖະມົນແຟງລັງ ຢືນຢັນວ່າ ປະເທດຂອງທ່ານຈະຄັດຄ້ານຂໍ້ສະເໜີລົບລ້າງໜີ້ສິນສ່ວນໜຶ່ງໃຫ້ແກ່ ເກຼັກ, ແຕ່ຍັງເນັ້ນໜັກວ່າ ແຟງລັງ ພ້ອມແລ້ວທີ່ຈະປຶກສາຫາລືບັນດາມາດຕາ ແລະ ຕໍ່ກຳນົດເວລາຊຳລະໜີ້ສິນໃຫ້ແກ່ອາແທນ.
ໝາກຜົນການເລືອກຕັ້ງຢູ່ ເກຼັກ ຍັງເຮັດໃຫ້ເອີລົບເພີ່ມຄວາມເປັນຫວ່ງກັງວົນທາງດ້ານການເມືອງ. ນັ້ນແມ່ນການກະທົບຢ່າງເປັນຂະບວນຈາກໄຊຊະນະຂອງພັກຝ່າຍຊ້າຍ ຊີຣີຢາ. ໄຊຊະນະຈາກພັກຄັດຄ້ານນະໂຍບາຍຮັດເຂັມຄັດ ຈະຕໍ່ພະລັງແຮງໃຫ້ພັກອື່ນໆຊຶ່ງເດີນຕາມແນວທາງເຊັ່ນດຽວກັນຢູ່ເອີລົບ, ຍົກຕົວຢ່າງຄືພັກ Podemos , ປະຈຸບັນພວມປະສົບຜົນສຳເລັດໃນການແກດຶງຜູ້ມີສິດເລືອກຕັ້ງຢູ່ແອດສະປາຍ ຄັດຄ້ານ ນະໂຍບາຍຮັດເຂັມຄັດຊຶ່ງລັດຖະບານຂອງພວກເຂົາພວມນຳໃຊ້ເພື່ອຮັບມືກັບການຊຸດໂຊມດ້ານເສດຖະກິດ.
ໝາກຜົນການເລືອກຕັ້ງຢູ່ ເກຼັກ, ເຖິງວ່າໄດ້ຮັບການສະໜັບສະໜູນຈາກປະຊາຊົນກໍຕາມ, ແຕ່ກໍໄດ້ວາງອອກສິ່ງທ້າທາຍບໍ່ໜ້ອຍທີ່ມີຕໍ່ພັກກຳອຳນາດ ແລະ ນັບທັງກັບ EU. ອະນາຄົດຂອງ ເກຼັກ ຄືແນວໃດ ກໍເປັນການຍາກເມື່ອໃຫ້ຄຳຢັ້ງຢືນ. ຕໍ່ໜ້າບັນດາການຜັນແປທີ່ຍາກຈະຄາດຄະເນໄວ້ລວງໜ້ານີ້ຢູ່ ເກຼັກ ນັ້ນ, ການກະທຳທຸກຢ່າງຢູ່ອາແທນໃນປະຈຸບັນພວມໄດ້ຮັບການຕິດຕາມລະອຽດ.