(vovworld)- ຢູ່ເຂດລະຫລິ້ນບັນເທິງ Hanoi Creative City ເລກ 1 ເລືອງອຽນ ເມືອງ ຮາຍບ່າຈຶງ ຮ່າໂນ້ຍ ຫາກໍດຳເນີນເຫດການສິລະປະຕາມທ້ອງຖະຫນົນ “ Street Art Fair 2”. ລາຍການດັ່ງກ່າວໄດ້ດຶງດູດການເຂົ້າຮ່ວມຂອງນັກສິລະປິນທັງຢູ່ພາຍໃນ ແລະ ຕ່າງປະເທດເປັນຈຳນວນຫລວງຫລາຍ.
ຈິດຕະກອນຫວຽດນາມ ແຕ້ມພາບໃນລາຍການStreet Art Fair
|
“ Street Art Fair ແມ່ນເຫດການສິລະປະຕາມທ້ອງຖະຫນົນດ້ວຍບັນດາຮູບການທີ່ອຸດົມສົມບູນຄື: ຈິດຕະກຳ, ສະແດງດົນຕີຕາມທ້ອງຖະຫນົນ, ການສະແດງອາພອນສະໄຫມ, ບັນດາຮ້ານຂາຍເຄື່ອງເອ້ຢ້ອງ ຫລືສິລະປະແຕ້ມ Henna…. ຕໍ່ຈາກຜົນສຳເລັດຂອງການຈັດຕັ້ງໃນຄັ້ງທຳອິດ, “ Street Art Fair 2” ໄດ້ດຶງດູດການເຂົ້າຮ່ວມຂອງບັນດາຈິດຕະກອນມີຊື່ສຽງຢູ່ຫວຽດນາມ ຄື: ເຟືອງຫວູແມ້ງ, ເລທຽດເກື່ອງ, ເລກວ໋າງຮ່າ, ດາວຫາຍຟອງ, ຮົ່ງຫວຽດຢູງ, ກວກດົງເຟືອງ… ແລະ ນັກສິລະປິນຫນຸ່ມຈຳນວນຫນຶ່ງ
ຈຸດເດັ່ນຂອງ “ Street Art Fair 2” ແມ່ນຈິດຕະກຳ ແລະ ດົນຕີ. ໃນບັນຍາກາດຟົດຟື້ນມ່ວນຊື່ນຂອງດົນຕີ, ຜູ້ຊົມນະຄອນຫລວງຮ່າໂນ້ຍມາເຂົ້າຮ່ວມເຫດການນີ້ ຈະໄດ້ຮັບຊົມ ແລະ ເຂົ້າຮ່ວມບັນດາຮູບການສິລະປະເປັນຫລາຍຮູບຫລາຍແບບຄື: ຈິດຕະກຳ, ສະແດງດົນຕີ ຕາມທ້ອງຖະຫນົນ, ການສະແດງອາພອນສະໄຫມ, ບັນດາຮ້ານຂາຍເຄື່ອງເອ້ຢ້ອງ . ພິເສດ ທີ່ລາຍການນີ້ ບັນດາຈິດຕະກອນຫວຽດນາມ ສະແດງ Action Painting (ຈິດຕະກຳການກະທຳ) ປະສົມກັບລາຍການສະແດງ Face painting (ແຕ້ມຫນ້າສິລະປະ) ຂອງບັນດານັກເດີນແບບແມ່ນເດັກນ້ອຍ. ດ້ວຍມາດຖານ ທຸກຄົນລ້ວນແຕ່ສາມາດເຂົ້າຮ່ວມລາຍການໄດ້, ສະນັ້ນ Street Art Fair ແມ່ນເວທີສະແດງເພື່ອໃຫ້ບັນດານ້ອງນ້ອຍເປັນຄັ້ງທຳອິດໄດ້ທົດລອງເຂົ້າຮ່ວມປະເພດສິລະປະໃຫມ່ ແລະ ເດີນແບບແຟຊັນ. ນອກນັ້ນ ຜູ້ຊົມລ້ວນແຕ່ສາມາດຈົດທະບຽນສະແດງຄວາມເກັ່ງກ້າສາມາດຂອງຕົນ. ຈິດຕະກອນ ເຟືອງຫວູແມ້ງ, ແມ່ນຜູ້ ລິເລິ່ມຈັດຕັ້ງລາຍການໃຫ້ຮູ້ວ່າ:
“ກອ່ນນີ້ຫລາຍປີ ຂ້າພະເຈົ້າໄດ້ໄປຢ້ຽມຢາມປະເທດຈຳນວນຫນຶ່ງຢູ່ ເອີລົບ ແລະ ໄດ້ຮັບຊົມການສະແດງສິລະປະ ຕາມທ້ອງຖະຫນົນ . ຂ້າພະເຈົ້າເຫັນວ່າ ສິລະປະປະເພດນີ້ມ່ວນຫລາຍ ແລະ ປາດຖະຫນາຢາກນະຄອນຮ່າໂນ້ຍ ກໍມີບັນດາລາຍການສິລະປະຢູ່ຕາມທ້ອງຖະຫນົນຄືແນວນັ້ນ. ນີ້ແມ່ນຄວາມງາມດ້ານວັດທະນະທຳ. ຂ້າພະເຈົ້າຢາກຈັດຕັ້ງລາຍການສິລະປະນີ້ເປັນປະຈຳເພື່ອໃຫ້ສາທາລະນະຊົນຄ່ອຍໆໄດ້ສຳຜັດກັບສິລະປະຕາມທ້ອງຖະຫນົນ, ເຮັດໃຫ້ຊາວຮ່າໂນ້ຍມີຄວາມຊີນເຄີຍກັບການພັກຜ່ອນຮັບຊົມລາຍການສະແດງສິລະປະພາຍຫລັງການເຮັດວຽກຢ່າງອິດເມື່ອຍ.”
ຈິດຕະກອນແຕ້ມຫນ້າໃຫ້ຜູ້ສາວ
|
ບໍ່ພຽງແຕ່ລາຍການສິລະປະຂອງບັນດານັກສິລະປິນທີ່ມີຊື່ສຽງເທົ່ານັ້ນ, Street Art Fair ຍັງມີລາຍການສະແດງທີ່ເປັນເອກະລັກສະເພາະຂອງນັກສິລະປິນຫນຸ່ມອີກດ້ວຍ. ນັ້ນແມ່ນລາຍການ Gloving ຂອງບັນດານັກສຶກສາ. Gloving ແມ່ນຮູບການສະແດງແສງສີ lingt show ດ້ວຍແສງໄຟ Led ດ້ວຍສຽງໄຟຢູ່ຫົວນີ້ວ ແລະ ຝາມືຕາມທຳນອງສຽງດົນຕີ. ດ້ວຍຄວາມເປັນເອກະລັກສະເພາະ ຂອງລາຍການສິລະປະນີ້, Gloving ໄດ້ສ້າງຮູບພາບເຕັມໄປດ້ວຍສີສັນຫລາກຫລາຍ ເຮັດໃຫ້ຜູ້ຊົມຮູ້ສຶກຈັບອົກຈັບໃຈທີ່ສຸດ. ເພື່ອນຫງວຽນມີກວາງ, ນັກສຶກສາມະຫາວິທະຍາໄລກົດໝາຍ ແບ່ງປັນວ່າ: ນີ້ເປັນຄັ້ງທີ 2 ທີ່ຂ້າພະເຈົ້າເຂົ້າຮ່ວມ Street Art Fair. ລາຍການສິລະປະຄັ້ງນີ້ ມີຂອບຂະຫນາດໃຫຍ່ກວ່າກ່ຽວກັບແຂກຖືກເຊີນ ແລະ ຜູ້ຊົມມາເຂົ້າຮ່ວມ ກໍຫລາຍກວ່າ. ຂ້າພະເຈົ້າມີຄວາມປະທັບໃຈທີ່ສຸດແມ່ນລາຍການ Gloving.
ສ່ວນເພື່ອ ຄຸກກວກຮືງ, ນັກສຶກສາມະຫາວິທະຍາໄລເຕັກໂນໂລຊີ, ຜູ້ທີ່ເຂົ້າຮ່ວມລາຍການ Street Art Fair ແບ່ງປັນວ່າ:
“ນີ້ເປັນຄັ້ງທຳອິດ ຂ້າພະເຈົ້າເຂົ້າຮ່ວມລາຍການ. ຂ້າພະເຈົ້າເຫັນວ່າ ທຸກຄົນຢູ່ທີ່ນີ້ ມີຫົວຄິດປະດິດສ້າງທີ່ສຸດ ແລະ ຂ້າພະເຈົ້າຢາກນຳເອົາຜະລິດຕະພັນທີ່ມີຫົວຄິດປະດິດສ້າງຂອງຕົນມາແນະນຳໃຫ້ທຸກຄົນ.”
ເພື່ອນ ຫງວຽນທິເຟືອງຍີ, ຜູ້ຮັບຜິດຊອບດ້ານສື່ສານຂອງ Hanoi Creative City ໃຫ້ຮູ້ວ່າ:
“ກ່ອນນີ້ Hanoi Creative City ໄດ້ມີຫລາຍເຫດການສະຫງວນໃຫ້ແກ່ວົງຄະນາຍາດກ່ຽວກັບວັດທະນະທຳ, ສິລະປະ. ໃນໄລຍະຈະມາເຖິງ Hanoi Creative City ສືບຕໍ່ຈັດຕັ້ງບັນດາເຫດການສະຫງວນໃຫ້ແກ່ວົງຄະນາຍາດກວ່າ ແລະ ຈະມີຫລາຍເຫດການວາງສະແດງດ້ານວັດທະນະທຳ ສິລະປະກວ່າ.”
ຕໍ່ຈາກບັນດາຜົນສຳເລັດໃນເບື້ອງຕົ້ນ, Street Art Fair ຈະໄດ້ຮັບການຈັດຕັ້ງເປັນປະຈຳ. ການເຄື່ອນໄຫວນີ້ເພື່ອເຊື່ອມຕໍ່ບັນດານັກສິລະປິນ, ພົວພັນແລກປ່ຽນ, ສະແດງລາຍການສິລະປະທີ່ມີຫົວຄິດປະດິດສ້າງຫລາຍກວ່າ ເພື່ອໃຫ້ສິລະປະນັບມື້ນັບໃກ້ຊິດຕິດແທດກັບສາທາລະນະຊົນກວ່າ.