(vovworld)- ງານວາງສະແດງລົດໄຟຟ້າ ຮ່າໂນ້ຍ ອະດີດຕະການ ແລະ ອະນາຄົດ ວາດພາບເຖິງຮູບພາບລົດໄຟຟ້າໃນອະດີດຕະການ ແລະ ແນະນຳຮູບພາບລົດໄຟຟ້າຂອງຮ່າໂນ້ຍໃນອະນາຄົດ ທີ່ພວມດຳເນີນໄປຢູ່ຫໍວາງສະແດງເລກທີ 45 ຖະຫນົນຮ່າງບ່າຍ ຮ່າໂນ້ຍ. ນີ້ແມ່ນເຫດການໂດຍ ພະແນກວັດທະນະທຳ ກິລາ ແລະ ທ່ອງທ່ຽວ ຮ່າໂນ້ຍຈັດຕັ້ງ ເນື່ອງໃນໂອກາດສະເຫລີມສະຫລອງ 59 ປີແຫ່ງວັນປົດປ່ອຍນະຄອນຫລວງ ຮ່າໂນ້ຍ (10/10/1954-10/10/2013).
ຮູບພາບກ່ຽວກັບລົດໄຟຟ້າຢູ່ຮ່າໂນ້ຍໃນເມື່ອກ່ອນ
|
ເມື່ອເຂົ້າຊົມງານວາງສະແດງ, ຜູ້ຊົມຮູ້ສຶກຄືໄດ້ເຫັນປະຈັກຕາບັນດາຂະບວນລົດໄຟຟ້າພ້ອມກັບສຽງແລງແກງທີ່ເປັນສັນຍາລັກພິເສດສະເພາະ ຂອງຄຸ້ມຖະຫນົນຕ່າງໆຢູ່ຮ່າໂນ້ຍໃນເມື່ອກ່ອນ. ບັນດາຮູບພາບເຫລົ່ານັ້ນ ໄດ້ເຮັດໃຫ້ຊາວຮ່າໂນ້ຍທຸກຄົນບໍ່ອາດຫລົງລືມ ອະນຸສອນໃນຊຸມເດືອນປີກ່ອນນີ້ໄດ້ .ທ່ານດວ່ານຊວນກີງ ຢູ່ ຖະຫນົນ ເຈີນຟູ ຮ່າໂນ້ຍ ແບ່ງປັນວ່າ:
“ຮ່າໂນ້ຍ ໃນເມື່ອກ່ອນມີສາຍລົດໄຟຟ້າ 6 ສາຍຄື: ຫນອງໂຮ່ເກືອມ-ເກົາໄຢ, ຫນອງໂຮ່ເກືອມ - ອຽນຟູ້.. ແລະ ໄກກວ່າໝູ່ແມ່ນ ຫນອງໂຮ່ເກືອມ- ຮ່າດົງ. ກ່ອນນີ້ ສາຍລົດໄຟຟ້າ ຫນອງໂຮ່ເກືອມ- ຮ່າດົງ ແມ່ນສາຍທາງຍາວກວ່າໝູ່. ເມື່ອເຂົ້າຊົມງານວາງສະແດງຄັ້ງນີ້ ຂ້າພະເຈົ້າຫວນຄືນຫລັງຄາວຍັງນ້ອຍ ພ້ອມກັບລົດໄຟຟ້າທີ່ເປັນເອກະລັກສະເພາະຂອງຮ່າໂນ້ຍໃນຄາວນັ້ນ.”
ງານວາງສະແດງລົດໄຟຟ້າຮ່າໂນ້ຍ ອະດີດຕະການ ແລະ ອະນາຄົດ
ພາບ:internet
|
ມາຢ້ຽມຊົມງານວາງສະແດງກໍແມ່ນວິທີເພື່ອໃຫ້ລຸ້ນຫນຸ່ມເຂົ້າໃຈກວ່າກ່ຽວກັບປະຫວັດຄວາມເປັນມາຂອງລົດໄຟຟ້າຮ່າໂນ້ຍທີ່ຄົງຕົວໃນກວ່າຫນຶ່ງສັດຕະວັດ. ເພື່ອນ ຫງວຽນທູຍຈາງ, ນັກສຶກສາມະຫາວິທະຍາໄລ ສະຖາປັດຕະຍະກຳ ຮ່າໂນ້ຍ ເວົ້າວ່າ:
“ເມື່ອເຂົ້າຊົມງານວາງສະແດງຄັ້ງນີ້ຂ້າພະເຈົ້າຮູ້ສຶກປະທັບໃຈຫລາຍ ຍ້ອນເຕັກໂນໂລຊີ ແລະ ແສງໄຟຟ້າທີ່ທັນສະໄຫມ. ຂ້າພະເຈົ້າສາມາດເຫັນໄດ້ບັນດາຮູບພາບຂອງຮ່າໂນ້ຍຜ່ານເຕັກໂນໂລຊີ 3 D. ນີ້ແມ່ນທ່າອ່ຽງໃນອະນາຄົດ ເມື່ອທຸກສິ່ງທຸກຢ່າງທີ່ເກີດຂຶ້ນໃນອະດີດຕະການບໍ່ຮັກສາໄວ້ໄດ້ແລ້ວ ພວກເຮົາກໍສາມາດວາດພາບດ້ວຍວິທີການທັນສະໄຫມ ແລະ ນຳມາເຊິ່ງບົດຮຽນໃຫ້ຄົນລຸ້ນຫລັງ. ”
ງານວາງສະແດງ ບໍ່ພຽງແຕ່ ໄດ້ຮັບຄວາມສົນໃຈຈາກຜູ້ຊົມພາຍໃນປະເທດເທົ່ານັ້ນ ຫາກບັນດານັກທ່ອງທ່ຽວຕ່າງປະເທດມາຢ້ຽມຢາມຮ່າໂນ້ຍກໍຢາກເຂົ້າຊົມອີກດ້ວຍ. ນາງ Sarah Bay ມາຈາກແດນມາກ ແບ່ງປັນວ່າ:
“ຢູ່ Copenhagen ແດນມາກ ກໍມີບັນດາລົດໄຟຟ້າຄືຢູ່ຮ່າໂນ້ຍ. ຊື່ງແມ່ນຊາວຕ່າງປະເທດຜູ້ຫນຶ່ງມາຢ້ຽມຢາມຮ່າໂນ້ຍ, ຂ້າພະເຈົ້າຄິດວ່າ ລົດໄຟຟ້າແມ່ນຈຸດພິເສດສະເພາະ ແລະ ສ້າງຄວາມປະທັບໃຈສຳລັບຮ່າໂນ້ຍ.”
ຮູບພາບກ່ຽວກັບສະຖານີລົດໄຟຟ້າຮ່າໂນ້ຍໃນອະນາຄົດ
ພາບ:internet
|
ງານວາງສະແດງ“ລົດໄຟຟ້າຮ່າໂນ້ຍ ອະດີດຕະການ ແລະ ອະນາຄົດ” ຍັງນຳມາໃຫ້ຜູ້ຊົມກ່ຽວກັບລະບົບຄົມມະນາຄົມທີ່ທັນສະໄຫມ ທີ່ພວມຄ່ອຍໆໄດ້ຮັບການກໍ່ສ້າງຂຶ້ນໃນຊຸມປີຈະມາເຖິງ. ນັກສະຖາປັດຕະຍະກຳ ຫງວຽນວັນກວາງ, ຫົວຫນ້າຫນ່ວຍ“ດີຈີທອນ ຮ່າໂນ້ຍ” ໃຫ້ຮູ້ວ່າ:
“ແນວຄວາມຄິດຈັດງານວາງສະແດງຄັ້ງນີ້ ພວກຂ້າພະເຈົ້າໄດ້ກຳນົດໃນເບື້ອງຕົ້ນນັ້ນແມ່ນສ້າງຄຸ້ມຖະຫນົນເກົ່າ 36 ສາຍຢູ່ຮ່າໂນ້ຍ ໃຫ້ກາຍເປັນຫໍພິພິດທະພັນແຫ່ງທີ 2 ເພື່ອໃຫ້ປະຊາຊົນທຸກຄົນສາມາດວາດພາບໄດ້ຮູບພາບຄຸ້ມເມືອງເກົ່າຮ່າໂນ້ຍໃນເມື່ອກ່ອນກໍຄືຮ່າໂນ້ຍໃນປະຈຸບັນ. ງານວາງສະແດງຄັ້ງນີ້ແມ່ນສຸມໃສ່ຫົວເລື່ອງລົດໄຟຟ້າ. ພວກຂ້າພະເຈົ້າຢາກແນະນຳໃຫ້ຜູ້ຊົມບັນດາຈຸດວັດທະນະທຳຂອງຊາວຮ່າໂນ້ຍໃນເມື່ອກ່ອນ ກໍຄືບັນດາສາຍລົດໄຟຟ້າໃຕ້ດິນ ແລະລົດໄຟລອຍຟ້າ(skytrain) ຂອງຮ່າໂນ້ຍຊື່ງຈະໄດ້ຮັບການກໍ່ສ້າງໃນໄລຍະຈະມາເຖິງ.”
ງານວາງສະແດງ“ລົດໄຟຟ້າຮ່າໂນ້ຍ, ອະດີດຕະການ ແລະ ອະນາຄົດ” ໄດ້ນຳມາໃຫ້ຜູ້ຊົມຄວາມປະທັບໃຈອັນເລິກເຊິ່ງຫລາຍຢ່າງກ່ຽວກັບຮ່າໂນ້ຍໃນເມື່ອກ່ອນ ດ້ວຍຮູບພາບລົດໄຟຟ້າທີ່ຕິດພັນກັບຊີວິດການເປັນຢູ່ປະຈຳວັນຂອງຊາວຮ່າໂນ້ຍ. ງານວາງສະແດງແມ່ນຂົວເຊື່ອມຕໍ່ດ້ວຍບັນດາຮູບພາບຊ່ວຍໃຫ້ປະຊາຊົນ, ພິເສດແມ່ນລຸ້ນຫນຸ່ມມີຄວາມເຂົ້າໃຈ ແລະ ເຄົາລົບນັບຖືວັດທະນະທຳ ແລະ ຄວາມງາມຂອງນະຄອນຫລວງ ຮ່າໂນ້ຍໃນສັດຕະວັດກ່ອນ.