(vovworld) - ລະດູບານໃຫມ່ໄດ້ວຽນມາອີກວາລະຫນຶ່ງໃນທົ່ວປະເທດຫວຽດນາມ. ພ້ອມກັບປະຊາຊົນຢູ່ທຸກແຖບຖິ່ນຂອງປະເທດ, ຊາວນະຄອນໂຮ່ຈິມິນ ມີຄວາມເບິກບານມ່ວນຊື່ນຕ້ອນຮັບປີໃຫມ່ປີມະເສງ 2013. ໃນລາຍການພາກນີ້ ພວກເຮົາຂໍແນະນຳບັນຍາກາດຕ້ອນຮັບບຸນປີໃຫມ່ປະຈຳຊາດຢູ່ ນະຄອນໂຮ່ຈິມິນ.
ປີ 2012 ຜ່ານມາ, ໃນສະພາບພື້ນຖານເສດຖະກິດ ປະສົບກັບຄວາມຫຍຸ້ງຍາກ ແຕ່ນະຄອນໂຮ່ຈິມິນ ຍັງຄົງບັນລຸໄດ້ບັນດາຜົນງານທີ່ຫນ້າຊື່ນຊົມ. ນັ້ນແມ່ນລະດັບຈະເລີນເຕີບໂຕ GDP ຂອງນະຄອນໂຮ່ຈິມິນ ໄດ້ເພີ່ມຂຶ້ນ 9,2%, ເພີ່ມຂຶ້ນທົບ 1,83 ເທົ່າເມ່ືອທຽບໃສ່ລະດັບສະເລ່ຍຂອງທັງປະເທດ. ໃນປີຜ່ານມາ, ມີກິດຈະກຳພື້ນຖານໂຄງລ່າງຫລາຍແຫ່ງໄດ້ຮັບການກໍ່ສ້າງສຳເລັດ, ປະກອບສ່ວນເຮັດໃຫ້ໂສມຫນ້າຂອງນະຄອນມີການປ່ຽນແປງໄປນຳ, ໃນນັ້ນຕ້ອງເວົ້າເຖິງເສັ້ນທາງອຸໂມງ ຖູທຽມ ທີ່ທັນສະໄຫມກວ່າໝູ່ຢູ່ເຂດອາຊີຕາເວັນອອກສຽງໃຕ້, ລອດພື້ນແມ່ນ້ຳໄຊງ່ອນ ເຊື່ອມຕໍ່ກັບສາຍທາງຫລວງ ຕາເວັນອອກຕາເວັນຕົກ, ປະກອບສ່ວນຊຸກຍູ້ການພັດທະນາເສດຖະກິດເຂດຕົວເມືອງ, ຕອບສະຫນອງຄວາມມຸ້ງມາດປາດຖະຫນາຂອງປະຊາຊົນທີ່ໄດ້ດຳລົງຊີວິດໃນບັນດາເຂດຕົວເມືອງໃຫມ່ທີ່ໃຫຍ່ໂຕໂອຖົງ ແລະ ສວຍງາມ. ນອກນັ້ນ ຍັງມີ ບັນດາເຮືອນຕຶກສູງຫລາຍຊັ້ນ, ກິດຈະກຳກໍ່ສ້າງຂົວທາງທີ່ທັນສະໄຫມອື່ນໆໄດ້ນຳເຂົ້າໃຊ້ການ, ເຮັດໃຫ້ບັນດາຜູ້ຢູ່ໄກຈາກນະຄອນ, ເມື່ອມີໂອກາດກັບມາຢ້ຽມຢາມລ້ວນແຕ່ຮູ້ສຶກແປກປະຫລາດໃຈຕໍ່ການປ່ຽນແປງຢ່າງວອ່ງໄວແລະມະຫັດສະຈັນຂອງນະຄອນ.
ບັນຍາກາດງານບຸນດອກໄມ້ລະດູບານໃຫມ່ຢູ່ຖະຫນົນ ຫງວຽນເຫ້ວ
ພາບ: internet
|
ໃນຊຸມມື້ນີ້, ທົ່ວນະຄອນໂຮ່ຈິມິນ ຄືດັ່ງໄດ້ສວມເສື້ອຊຸດໃຫມ່ທີ່ມີສີສັນຫລາກຫລາຍ. ຢູ່ໃຈກາງນະຄອນ, ບ່ອນໃດກໍໄດ້ຮັບການປະດັບປະດາດ້ວຍດອກໄມ້, ໄຟແສງສີທີ່ສວຍງາມ. ເສັ້ນທາງສາຍຕ່າງໆຢູ່ເມືອງ 1 ທີ່ອ້ອມຮອບຕະຫລາດ ເບນແທ່ນ, ໂບດດຶກບ່າຄື: ຖະຫນົນຫງວຽນຢູ, ດົ່ງເຂີຍ, ຫງວຽນເຫ້ວ... ລ້ວນແຕ່ໄດ້ຮັບການປະດັບປະດາດ້ວຍດອກໄມ້, ໄຟດອກ ທີ່ເປັນສັນຍາລັກຂອງປີມະເສງ. ຢູ່ເສັ້ນທາງໃຈກາງນະຄອນ ກໍປະດັບປະດາດ້ວຍດອກເໝີຍຂະຫນາດໃຫຍ່ ເຮັດໃຫ້ບັນຍາກາດຢູ່ຖະຫນົນສາຍຕ່າງໆຍິ່ງສວຍງາມກວ່າ ແລະ ເຕັມໄປດ້ວຍສີສັນພິເສດສະເພາະຂອງບຸນເຕັດພາກໃຕ້. ສິ່ງພິເສດກວ່າໝູ່ ແມ່ນບັນຍາກາດງານບຸນດອກໄມ້ລະດູບານໃຫມ່ຢູ່ຖະຫນົນ ຫງວຽນເຫ້ວ. ຢູ່ຖະໜນສາຍນີ້ຖືກປະດັບປະດາດ້ວຍດອກໄມ້ນາໆຊະນິດທີ່ມີສີສັນຫລາກຫລາຍຊຶ່ງນຳມາຈາກທຸກແຖບຖິ່ນໃນທົ່ວປະເທດ ຫວຽດນາມ.
ງານບຸນດອກໄມ້ພ້ອມກັບລາຍການສະແດງສິລະປະ, ຟ້ອນສິງໂຕຢູ່ທ້ອງຖະຫນົນໄດ້ເຮັດໃຫ້ບັນຍາກາດຕ້ອນຮັບລະດູບານໃຫມ່ຟົດຟື້ນຍິ່ງຂຶ້ນ. ເອື້ອຍ ຮູ່ນທິເຕີມ ຢູ່ຖະຫນົນ ເລວັນຊີ້, ເມືອງ 10 ໃຫ້ຮູ້ວ່າ:
“ຂ້າພະເຈົ້າມີຄວາມຮູ້ສຶກມ່ວນຊື່ນຫລາຍ ເມື່ອເຫັນວ່າ ບັນຍາກາດຢູ່ທີ່ນີ້ອຶກກະທຶກຄຶກໂຄມ, ທຸກຄົນຕ້ອນຮັບລະດູບານໃຫມ່ດ້ວຍຄວາມເບິກບານມ່ວນຊື່ນ. ປີໃຫມ່ ຂໍອວຍພອນໃຫ້ທຸກຄົນ ໄດ້ຕ້ອນຮັບບຸນເຕັດດ້ວຍຄວາມອົບອຸ່ນ ມີຄວາມສຸກ ແລະ ຫວັງວ່າ ກ້າວເຂົ້າສູ່ປີໃຫມ່ ທຸກສິ່ງທຸກຢ່າງຈະປ່ຽນໃໝ່ຕາມທິດທີ່ດີກວ່າ.”
ລຸງ ໂດ໋ວັນຂາຍ ຜູ້ທີ່ເຄີຍດຳລົງຊີວິດຢູ່ຕາແສງ ອານແຄງ ເມືອງ 2 ນະຄອນ ໂຮ່ຈິມິນ ມາແຕ່ດົນນານແລ້ວ ໃຫ້ຮູ້ວ່າ: ກ່ອນນີ້ຢາກເຂົ້າເຂດໃຈກາງນະຄອນແມ່ນ ຕ້ອງຂີ່ເຮືອບັກ, ປະຈຸບັນມີເສັ້ນທາງອຸໂມງຖູທຽນແລ້ວ, ພຽງແຕ່ເສຍເວລາປະມານ 20 ນາທີ່ກໍ່ໄປຮອດເຂດໃຈກາງນະຄອນ.
“ກ້າວເຂົ້າສູ່ປີໃຫມ່, ຂ້າພະເຈົ້າປາດຖະຫນາວ່າ ພື້ນຖານເສດຖະກິດຂອງປະເທດຈະໄດ້ຮັບການປັບປຸງໃຫ້ດີຂຶ້ນ. ເສດຖະກິດໃນປີຜ່ານມາແມ່ນປະສົບກັບຄວາມຫຍຸ້ງຍາກຫລາຍ, ຫວັງວ່າປີໃຫມ່ຈະດີກວ່າ, ມີຄວາມສະດວກກວ່າປີເກົ່າ. ອວຍພອນໃຫ້ປະຊາຊົນນະຄອນ ໂຮ່ຈິມິນກໍຄືທັງປະເທດ ມີຄວາມຜາສຸກຕະຫລອດປີ.”
ຊາວນະຄອນໂຮ່ຈິມິນ ຕ້ອນຮັບບຸນເຕັດ
ພາບ:internet
|
ລະດູບານໃຫມ່ປີນີ້ ນະຄອນໂຮ່ຈິມິນ ຍັງມີສະຖານທີ່ສວຍງາມຕື່ມອີກແຫ່ງຫນຶ່ງເພື່ອໃຫ້ປະຊາຊົນຮັບຊົມບັ້ງໄຟດອກ, ນັ້ນແມ່ນຕຶກ Bitexco Ficancial Tower ສູງ 68 ຊັ້ນ. ຕຶກແຫ່ງນີ້ໄດ້ຮັບການກໍສ້າງຕາມສະຖາປັດຕະຍະກຳຮູບດອກບົວດ້ວຍແກ້ວທ່ີສວຍງາມ, ໂດຍຕັ້ງຢູ່ໃຈກາງນະຄອນ ຕຶກຫຼັງນີ້ແມ່ນສະຖາປັດຕະຍະກຳທີ່ເປັນເອກະລັກສະເພາະ ແລະ ກາຍເປັນສັນຍາລັກກ່ຽວກັບຄວາມວັດທະນາຖາວອນ, ຂະຫຍັນຂັນເຄື່ອນຂອງນະຄອນ ໂຮ່ຈິມິນ. ສິ່ງທີ່ສ້າງຄວາມປະທັບໃຈໃຫ້ທຸກຄົນນັ້ນແມ່ນໄດ້ຮັບຊົມຮູບພາບທົ່ວນະຄອນຈາກຄວາມສູງນີ້. ອ້າຍ ໂດ໋ກວກເລ, ພະນັກງານເຮັດວຽກຢູ່ ເຮືອນຕຶກດັ່ງກ່າວໃຫ້ຮູ້ວ່າ:
“ໃນຈຸດເວລາສົ່ງທ້າຍປີເກົ່າ ຕ້ອນຮັບປີໃຫມ່ຢູ່ທີ່ນີ້ ໄດ້ຈັດລາຍການສະແດງສິລະປະດົນຕີ ແລະ ງານລາຕີນ້ຳຊາ, ພ້ອມກັນນັ້ນ ມີລາຍການຟ້ອນສິງໂຕ, ແລະຮອດເວລາ 24 ໂມງກາງຄືນແຂກຄົນຈະໄດ້ຮັບຊົມບັ້ງໄຟດອກ.”
ເຈືອຈານເຂົ້າກັບບັນຍາກາດຕ້ອນຮັບປີໃຫມ່ຢ່າງຟົດຟື້ນມ່ວນຊື່ນຂອງຊາວນະຄອນໂຮ່ຈິມິນ ແລະ ຍ່າງເລາະຫລິ້ນຖະຫນົນຫົນທາງສາຍຕ່າງໆໃນຊຸມມື້ລະດູບານໃຫມ່ ຈຶ່ງຮູ້ສຶກໄດ້ຄວາມສວຍສົດງົດງາມ, ອາກາດອົບອຸ່ນຂອງເຂດພາກໃຕ້ ແລະ ນະຄອນທີ່ຂະຫຍັນຂັນເຄື່ອນ, ມີລະດັບພັດທະນາໄວກວ່າໝູ່ຂອງ ຫວຽດນາມ.