(vovworld)-ພິທີບູຊາເທວະດາຜູ້ດູເເລເຕົາໄຟແມ່ນປະເພນີທີ່ຂາດບໍ່ໄດ້ໃນວັນທີ 23 ເດືອນ 12 ໄລ່ຕາມຈັນທະປະຕິທິນ, ກ່ອນທີ່ຊາວຫວຽດນາມ ຕ້ອນຮັບບຸນປີໃໝ່ປະຈຳຊາດ. ປີນີ້, ຫໍພິພິທະພັນຊົນເຜົ່າວິທະຍາຫວຽດນາມ ໄດ້ຈັດງານສະແດງປະເພນີທີ່ເປັນມູນເຊື້ອນີ້ເພື່ອແນະນຳກັບແຂກມາຊົມ, ພິເສດແມ່ນພວກເພື່ອນໜຸ່ມ ແລະ ແຂກທ່ອງທ່ຽວຕ່າງປະເທດ
ພາເຂົ້າບູຊາເທວະດາຜູ້ດູເລເຕົາໄຟ
(ພາບ: vov)
ຢູ່ເຂດວາງສະແດງເຮືອນຫວຽດໃນຫໍພິພິທະພັນຊົນເຜົ່າວິທະຍາຫວຽດນາມ, ແຂກທ່ອງທ່ຽວຫຼາຍຄົນພວມຕິດຕາມພໍ່ຕູ້ຜູ້ໜຶ່ງໃນຊຸດອາພອນປະຈຳຊາດປະຕິບັດພິທີບູຊາເທວະດາຜູ້ດູເເລເຕົາໄຟ.
ພາຍຫຼັງປະຕິບັດແຕ່ລະຂັ້ນຕອນໃນພິທີຕາມປະເພນີ, ທ່ານເຈິ່ນວັນຮົ່ງ, ຢູ່ໂກ້ລວາ, ເມືອງດົງແອງ, ຮ່າໂນ້ຍ ໄດ້ປະຕິບັດແຕ່ລະຂັ້ນຕອນຄືນໃໝ່ຢ່າງຊັກຊ້າ.
ທ່ານເຈິ່ນວັນຮົ່ງແນະນຳກ່ຽວກັບຊຸດໝວກ ແລະ ເກີບແດງຂອງເທວະດາຜູ້ດູເເລເຕົາໄຟວ່າ:
“ນີ້ແມ່ນເຄື່ອງບູຊາເຈົ້າດິນ, ເທວະດາ. ການບູຊາເທວະດາຜູ້ດູເລເຕົາໄຟຕ້ອງຜ່ານເທວະດາກ່ອນ. ກ່ອນອື່ນຕ້ອງນະໂມຕະຊະ 3 ເທື່ອ, ນົບໄຫ້ວ 3 ເທື່ອ, ຫຼັງຈາກນັ້ນ, ເມື່ອ ດຳເນີນພິທີຕ້ອງຍົກຊື່ຜູ້ບູຊາ, ລວມມີເຄື່ອງບູຊາໃດ ແລະ ບູຊາຜູ້ໃດ….”
ຕາມຮີດຄອງປະເພນີແລ້ວ, ວັນທີ 23 ເດືອນ 12 ແມ່ນວັນເທວະດາຜູ້ດູເລເຕົາໄຟແດນສະຫວັນລາຍງານຕໍ່ ເທພະຍະເຈົ້າວຽກງານທຸກຢ່າງທີ່ເຈົ້າຂອງເຮືອນໄດ້ເຮັດໃນປີກໍ່ຄືເຫດການຕ່າງໆເກີດຂຶ້ນຢູ່ໂລກມະນຸດໃນຕະຫຼອດປີຜ່ານມາ. ສະນັ້ນ, ຊາວຫວຽດນາມ ເຄີຍກະກຽມພາເຂົ້າບູຊາດ້ວຍຄວາມເຄົາລົບນັບຖື. ທ່ານຮົ່ງ ແນະນຳກ່ຽວກັບພາເຂົ້າບູຊາໃນວັນທີ 23 ເດືອນ 12 ວ່າ:
“ກ່ອນອື່ນໝົດຕ້ອງມີໄຟ ແລະ ທູບ, ມີໝາກໄມ້, ດອກໄມ້, ຢໍ່, ຊີ້ນ, ເຂົ້າຕົ້ມ, ເຂົ້າໜຽວ, ນ້ຳຊາ, ເຫຼົ້າ ແລະ ຊຸດອາພອນຂອງເທວະດາຜູ້ດູເເລເຕົາໄຟ, ປາໃນຄຳ. ພາໝາກໄມ້ລວມມີ 5 ຊະນິດ, ໃນນັ້ນຕ້ອງມີໝາກພຸກ ແລະ ໝາກກວ້ຍ, ສ່ວນ 3 ຊະນິດຍັງເຫຼືອແມ່ນຕາມຄວາມນິຍົມຂອງເຈົ້າຂອງ”
(ພາບ: vov)
ເຈິ່ນແຄງລິນ, ນັກສຶກສາມະຫາວິທະຍາໄລເຕັກໂນໂລຊີຮ່າໂນ້ຍ ມີຄວາມປະທັບໃຈທີ່ສຸດເມື່ອເຫັນພາເຂົ້າບູຊາເທວະດາຜູ້ດູເເລເຕົາໄຟຕາມປະເພນີຂອງຊາວຫວຽດນາມໃນເມື່ອກ່ອນ:
“ເມື່ອເຫັນພິທີບູຊາເທວະດາຜູ້ດູເເລເຕົາໄຟ, ນ້ອງເຫັນວ່າ, ຊາວຫວຽດນາມ ໃນເມື່ອກ່ອນຖືການ ເຫຼື້ອມໃສເປັນສຳຄັນທີ່ສຸດ. ຢູ່ບ້ານ, ແມ່ນ້ອງ ຈັດພິທີບູຊາເທວະດາຜູ້ດູເເລເຕົາໄຟກໍ່ຄ້າຍຄືກັນກັບພິທີຢູ່ທີ່ນີ້ ແຕ່ແມ່ຂອງນ້ອງເຮັດແບບງ່າຍດາຍກວ່າ, ຂັ້ນຕອນກໍ່ໜ້ອຍກ່ວາ, ຢູ່ນີ້ເຄື່ອງບູຊາຄົບຖ້ວນກ່ວາ ແລະ ລະອຽດກ່ວາ“.
ຄະນະນັກທ່ອງທ່ຽວມາຈາກຝະລັ່ງ ມີຄວາມປະທັບໃຈທີ່ສຸດຍ້ອນເປັນຄັ້ງທຳອິດທີ່ເຂົາເຈົ້າໄດ້ເຫັນປະຈັກຕາພາເຂົ້າບູຊາເທວະດາຜູ້ດູແລເຕົາໄຟ ແລະ ໄດ້ຮັບຟັງແນະນຳກ່ຽວກັບປະເພນີບູຊານີ້ຂອງຊາວຫວຽດນາມ. ປ້າ Annique de Faille ແຂກທ່ອງທ່ຽວໃນຄະນະດັ່ງກ່າວເວົ້າວ່າ:
“ຂ້າພະເຈົ້າຫາກໍ່ມາຫວຽດນາມ ໄດ້ພຽງ 2 ມື້ ແຕ່ກໍ່ຄົ້ນຫາໄດ້ຫຼາຍສິ່ງຫຼາຍຢ່າງ. ມີຫຼາຍສິ່ງທີ່ແຕກຕ່າງກັບວັດທະນະທຳຂອງຊາວຝະລັ່ງ. ມີ້ນີ້, ຂ້າພະເຈົ້າໄດ້ເຫັນປະຈັກຕາພິທີບູຊາເທວະດາຜູ້ດູແລເຕົາໄຟ. ຜ່ານນີ້ ຂ້າພະເຈົ້າເຫັນໄດ້ຄວາມສັກກະລະບູຊາຂອງພິທີ ແລະ ປະເພນີອັນດີງາມຂອງຊາວຫວຽດນາມ“.
ພ້ອມກັບການແນະນຳພິທີບູຊາເທວະດາຜູ້ດູແລເຕົາໄຟແລ້ວ, ໃນໂອກາດນິ້, ຫໍພິພິທະພັນຊົນເຜົ່າວິທະຍາ ຍັງຈັດຕັ້ງພິທີຕັ້ງອູ່ແກວ່ງ, ການຂຽນໜັງສືສິລະປະ, ພິມຮູບພາບດົງໂຮ່, ສະແດງຕຸກກະຕານ້ຳ…ດ້ວຍບັນດາການເຄື່ອນໄຫວວັດທະນະທຳນີ້, ຊາວຫວຽດນາມ ລຸ້ນໜຸ່ມ ແລະ ແຂກທ່ອງທ່ຽວຕ່າງປະເທດຈະມີໂອກາດເຂົ້າໃຈຕື່ມກ່ຽວກັບປະເພນີໃນໂອກາດບຸນປີໃໝ່ປະຈຳຊາດຫວຽດນາມ./.