(vovworld) - ແຕ່ລະຄົນເມື່ອໄດ້ກຳເນີດມາກໍ່ແມ່ນສິ່ງທີ່ຜາສຸກແລ້ວ, ແຕ່ບໍ່ແມ່ນຜູ້ໃດກໍໄດ້ຮັບຄວາມຜາສຸກນັ້ນຢ່າງຄົບຖ້ວນ. ໃນຊີວິດຍັງຄົງມີຫລາຍຄົນດ້ອຍໂອກາດກວ່າພວກເຮົາເມື່ອເຂົາເຈົ້າຂາດຄວາມສົມບູນດ້ານຮ່າງກາຍຫຼືມັນສະໝອງ, ແຕ່ບໍ່ແມ່ນຍ້ອນເຫດດັ່ງນັ້ນເຂົາເຈົ້າຈະຂາດຄວາມເຊື່ອໝ້ັນຕໍ່ຊີວິດ ເພາະວ່າຄົນພິການຫລາຍຄົນຮູ້ສຶກວ່າ ຄຽງຂ້າງເຂົາເຈົ້າຍາມໃດກໍໄດ້ຮັບຄວາມຮັກແພງ, ຄວາມເອົາໃຈໃສ່, ດູແລຈາກວົງຄະນາຍາດ ແລະ ສັງຄົມ.
ອາຈານ Tran Duyen Hai ພວມສອນວິທີຫຍິບເຄື່ອງ
ໃຫ້ເດັກພິການ
ພາບ: internet
|
ສຽງຈັກຫຍິບດັງຟົດສະຫນັ່ນໄປທ່ົວຫ້ອງຮຽນໃນຫລັງຄາເຮືອນທີ່ມີລວງກວ້າງປະມານ 100 ຕາລາງແມດ ຢູ່ ຫ່ອມທາງ Linh Quang ຕາແສງ Van Chuong ເມືອງ Dong Da ນະຄອນ Ha Noi. ໃນຫລາຍປີມານີ້, ເຮືອນຫລັງນີ້ໄດ້ກາຍເປັນສະຖານທີ່ຊີນເຄີຍຂອງບັນດາຄົນພິການທີ່ມາຈາກຫລາຍແຫ່ງໃນທົ່ວປະເທດ. ນັ້ນແມ່ນສູນສອນວິຊາຊີບມະນຸດສະທຳ ແລະສ້າງວຽກເຮັດງານທຳໃຫ້ແກ່ເດັກພິການ Linh Quang ຂອງອາຈານ Tran Duyen Hai. ຍ້ອນມີຄວາມເຫັນອົກເຫັນໃຈຕໍ່ບັນດາຄົນພິການນັ້ນ, ອາຈານ Tran Duyen Hai ອະດີດຄູສອນວິຊາຊີບຢູ່ ບໍລິສັດຝ້າຍ, ແພ, ໄໝ ໄດ້ສ້າງຕັ້ງສູນດັ່ງກ່າວດ້ວຍຕົນເອງພາຍຫລັງປີ 1975 ດ້ວຍຄວາມປາດຖະຫນາວ່າ ຢາກພ້ອມກັບສັງຄົມຮ່ວມແຮງຮ່ວມໃຈຫນູນຊ່ວຍບັນດາຄົນພິການ. ຈາກນັ້ນ ທ່ານຈຶ່ງເລືອກເຟັ້ນການສອນຕັດຫຍິບໃຫ້ແກ່ພວກນ້ອງ ເພາະວ່າ ນີ້ແມ່ນວຽກງານທີ່ເໝາະສົມກັບພວກນ້ອງກວ່າໝູ່. ຢູ່ສູນດັ່ງກ່າວ, ບັນດານັກຮຽນຊຶ່ງແມ່ນຄົນພິການໄດ້ຮັບການສອນວິຊາຊີບ ແລະ ມີບ່ອນພັກອາໄສໂດຍບໍ່ເສຍຄ່າ. ນອກນັ້ນ ສູນດັ່ງກ່າວຍັງເປີດສູນຊອກຫາວຽກເຮັດງານທຳໃຫ້ແກ່ຄົນພິການດ້ວຍຈຸດປະສົງເພື່ອຊອກຫາກາລະໂອກາດ, ຊ່ວຍຄົນພິການມີວຽກງານເປັນປົກກະຕິ. ທ່ານ Hai ໃຫ້ຮູ້ວ່າ:
“ພວກຂ້າພະເຈົ້າສົມທົບກັບບັນດາວິສາຫະກິດຕາມ 2 ຮູບການ. ທີຫນຶ່ງ ເພື່ອໃຫ້ນັກຮຽນມີວຽກເຮັດງານທຳ, ພວກຂ້າພະເຈົ້າໄດ້ຊອກຫາວຽກເຮັດງານທຳໃຫ້ແກ່ພວກນ້ອງ. ທີສອງ ພວກຂ້າພະເຈົ້າສົມທົບກັບບັນດາວິສາຫະກິດສະຫນອງບັນດາຜະລິດຕະພັນເປັນຊິ້ນສ່ວນເພື່ອໃຫ້ພວກນ້ອງທັງຍົກສູງສີມືການຊ່າງທັງສ້າງລາຍຮັບສ່ວນໃດສ່ວນຫນຶ່ງ. ຢູ່ ສູນສອນວິຊາຊີບຂອງພວກຂ້າພະເຈົ້າ ພວກນ້ອງໄດ້ຊົມໃຊ້ 100% ຄ່າຜະລິດຕະພັນທີ່ເຮັດດ້ວຍຕົນເອງ.”
ໂດຍແມ່ນຄົນເປ້ຍລ່ອຍມາແຕ່ເກີດ, ເລື່ອງໄປມາກໍຫຍຸ້ງຍາກຫລາຍ, ແຕ່ບໍ່ດັ່ງນັ້ນນາງ Ho Thi Thuong ຢູ່ ເມືອງ Quynh Luu ແຂວງ Nghe An ເສຍຫວັງຕໍ່ຊີວິດ. ເຖິງວ່າ ປະສົບກັບຄວາມຫຍຸ້ງຍາກໃນການນຳໃຊ້ຈັກຫຍິບກໍຕາມ ແຕ່ດ້ວຍການລະດົມກຳລັງໃຈ, ການສົ່ງເສີມແນະນຳຂອງຄູສອນໃນສູນສອນວິຊາຊີບ ບວກກັບ ຄວາມມານະພະຍາຍາມຂອງຕົນເອງ, ພາຍຫລັງ 8 ເດືອນນາງ Thuong ສາມາດຫຍິບເຄື່ອງຊຸດລາດຊະການໄດ້ຢ່າງຄອ່ງແຄ້ວ
Thuong ເວົ້າວ່າ:
“ຂ້າພະເຈົ້າພຽງແຕ່ປາດຖະຫນາວ່າ ເຮັດແນວໃດຕົນເອງມີວຽກເຮັດງານທຳ.ເມື່ອຮຽນໄດ້ອາຊີບຕັດຫຍິບ ຂ້າພະເຈົ້າດີໃຈຫລາຍ ເພາະວ່າມີອາຊີບຊີວິດການເປັນຢູ່ຂອງຕົນມີຄວາມໝາຍກວ່າ. ຢູ່ທ່ີນີ້ ຄູສອນມີຄວາມຮັກແພງ ແລະ ເຫັນອົກເຫັນໃຈຕໍ່ນັກຮຽນ, ສອນໃຫ້ນັກຮຽນຮູ້ຈັກເຖິງວິທີຕັດຫຍິບຢ່າງລະອຽດ.”
ສອນວິຊາຊີບໃຫ້ແກ່ຄົນທຳມະດາກໍຫຍຸ້ງຍາກແລ້ວ, ດຽວນີ້ມາສອນໃຫ້ຄົນພິການຍິ່ງມີຄວາມຫຍຸ້ງຍາກກວ່າ. ເອື້ອຍຄູ Vu Thi Nga ແບ່ງປັນວ່າ:
“ຂ້າພະເຈົ້າຄິດວ່າ ພວກນ້ອງແມ່ນຜູ້ດ້ອຍໂອກາດໃນຊີວິດເມື່ອທຽບກັບຄົນທຳມະດາ, ຍາມໃດເຂົາເຈົ້າ ກໍຢາກມີວຽກເຮັດງານທຳ ແລະ ເມື່ອເຮັດວຽກເປັນແລ້ວ ເຂົາເຈົ້າແມ່ນຄົນດຸໝັ່ນທີ່ສຸດ. ຂ້າພະເຈົ້າກໍດີໃຈຫລາຍເມື່ອຊ່ວຍເຫລືອພວກນ້ອງໄດ້ເຈືອຈານເຂົ້າກັບວົງຄະນາຍາດ.”
ສຳລັບຄົນພິການ ບັນດາສູນສອນວິຊາຊີບມະນຸດສະທຳຄື ສູນສອນວິຊາຊີບມະນຸດສະທຳ Linh Quang ຫລືສູນສອນວິຊາຊີບມະນຸດສະທຳແຫ່ງອື່ນໃນທົ່ວປະເທດ ແມ່ນສະຖານທີ່ເພື່ອເຮັດໃຫ້ຄົນພິການມີຄວາມເຊື່ອໝັ້ນຕໍ່ຊີວິດກວ່າ, ຊ່ວຍໃຫ້ເຂົາເຈົ້າຢັ້ງຢືນກັບສັງຄົມວ່າ ຄົນພິການກໍຍັງມີປະໂຫຍດຕໍ່ສັງຄົມ.
ເລເຟືອງ