(vovworld)- ພາຍຫຼັງເຄື່ອນໄຫວມາເປັນເວລາເກືອບ 2 ເດືອນ, ສະໂມສອນອາສາສະໝັກຂອງຫໍພິພິທະພັນປະຫວັດສາດແຫ່ງຊາດໄດ້ດຶງດູດເພື່ອນຫນຸ່ມເຂົ້າຮ່ວມເປັນຈຳນວນຫລວງຫລາຍ. ສະໂມສອນກາຍເປັນຂົວເຊື່ອມຕໍ່ລະຫວ່າງຜູ້ຊົມກັບຫໍພິພິທະພັນຢ່າງແທ້ຈິງ. ບັນດາເພື່ອນຫນຸ່ມໄດ້ນຳພະລັງຊີວິດໃຫມ່ ມາໃຫ້ຫໍພິພິທະພັນ, ຕອບສະຫນອງຄວາມຕ້ອງການດ້ານວັດທະນະທຳ, ຊອກຮູ້ບັນດາຄຸນຄ່າວັດທະນະທຳ, ປະຫວັດສາດຂອງຜູ້ຊົມຢູ່ພາຍໃນ ແລະ ຕ່າງປະເທດ.
ເພື່ອນຫນຸ່ມອາສາສະໝັກເກືອບ 80 ຄົນຂອງຫໍພິພິທະພັນປະຫວັດສາດແຫ່ງຊາດ ລ້ວນແຕ່ແມ່ນຜູ້ເມົາມົວກັບຄວາມຮູ້ດ້ານປະຫວັດສາດ, ວັດທະນະທຳຊົນເຜົ່າ. ເຂົາເຈົ້າແມ່ນນັກຮຽນ, ນັກສຶກສາຢູ່ບັນດາມະຫາວິທະຍາໄລ, ໂຮງຮຽນມັດທະຍົມຢູ່ ຮ່າໂນ້ຍ. ໃນເວລາເກືອບ 2 ເດືອນເປັນອາສາສະໝັກຂອງຫໍພິພິທະພັນປະຫວັດສາດ, ບັນດາເພື່ອນຫນຸ່ມໄດ້ປະກອບສ່ວນໂຄສະນາພາບພົດ, ການເຄື່ອນໄຫວຂອງຫໍພິພິທະພັນຢ່າງມີປະສິດທິຜົນຜ່ານບົດຂຽນ, ຮູບເງົາ… ນາງເລຫວູເຫົ້າ, ນັກສຶກສາປີທີ 3, ມະຫາວິທະຍາໄລການຄ້າຕ່າງປະເທດ ຮ່າໂນ້ຍ ເວົ້າວ່າ:
“ນ້ອງຄິດວ່າເລື່ອງອະນຸລັກຮັກສາ ແລະ ພັດທະນາວັດທະນະທຳຂອງປະເທດແມ່ນສິ່ງສຳຄັນທີ່ສຸດ. ຫວຽດນາມ ກໍຄືຫລາຍປະເທດອື່ນໆ ລ້ວນແຕ່ມີວັດທະນະທຳທີ່ເປັນເອກະລັກສະເພາະ. ດັ່ງນັ້ນ ຖ້າມີຄວາມຮູ້ດ້ານປະຫວັດສາດ ຈະດີທີ່ສຸດເພື່ອແນະນຳໃຫ້ເພື່ອນມິດສາກົນໄດ້ຮັບຊາບ ກ່ຽວກັບວັດທະນະທຳ ແລະ ປະຫວັດສາດຂອງຫວຽດນາມ”
ບັນດາສະມາຊິກໃນສະໂມສອນອາສາສະໝັກຫໍພິພິທະພັນແຫ່ງຊາດ
ພາບ:baotanglichsu.vn
|
ສະໂມສອນບໍ່ພຽງແຕ່ແມ່ນສະຖານທີ່ເພື່ອໃຫ້ບັນດານັກສຶກສາມີໂອກາດໄດ້ຊອກຮູ້ກ່ຽວກັບປະຫວັດສາດ, ວັດທະນະທຳຜ່ານວັດຖຸພັນຕ່າງໆຢູ່ຫໍພິພິທະພັນເທົ່ານັ້ນ ຫາກເຂົາເຈົ້າຍັງມີໂອກາດໄດ້ພົບປະ, ແລກປ່ຽນກັບບັນດານັກປະຫວັດສາດທີ່ມີຊື່ສຽງ, ໂອ້ລົມສົນທະນາກັບນັກທ່ອງທ່ຽວຕ່າງປະເທດມາຢ້ຽມຢາມຫໍພິພິທະພັນອີກດ້ວຍ. ນັ້ນກໍແມ່ນສິ່ງດຶງດູດ ຫງຽມທູຮ່າ, ນັກສຶກສາປີທີ 4, ພະແນກພາສາຝລັ່ງ, ມະຫາວິທະຍາໄລແຫ່ງຊາດ ຮ່າໂນ້ຍ, ເຂົ້າຮ່ວມສະໂມສອນ. ສຳລັບ ທູຮ່າ ແລ້ວ, ນີ້ແມ່ນກາລະໂອກາດເພື່ອສຳພັດກັບສະພາບຕົວຈິງ.
“ພວກນ້ອງຮຽນພາສາຕ່າງປະເທດ ບໍ່ມີໂອກາດຮຽນວິຊາວັດທະນະທຳ, ປະຫວັດສາດ ຫວຽດນາມ, ສະນັ້ນ ນ້ອງປາດຖະຫນາວ່າ ຫໍພິພິທະພັນຈະຈັດການເຄື່ອນໄຫວຫລາຍຢ່າງຄືແນວນີ້ ເພື່ອຊ່ວຍພວກເພື່ອນນັກສຶກສາຄືນ້ອງຊອກຮູ້ກ່ຽວກັບວັດທະນະທຳ, ປະຫວັດສາດ ຫວຽດນາມຢ່າງເລິກເຊິ່ງກວ່າ.”
ໃນຫນຶ່ງປີຜ່ານມາ, ຟານທູຮ່າ ນັກສຶກສາປີທີ 4 ມະຫາວິທະຍາໄລເສດຖະກິດແຫ່ງຊາດ ໄດ້ສະໝັກໃຈເຂົ້າຮ່ວມການເຄື່ອນໄຫວຕ່າງໆຂອງຫໍພິພິທະພັນປະຫວັດສາດ. ວຽກງານນີ້ໄດ້ຊ່ວຍໃຫ້ນ້ອງບໍ່ພຽງແຕ່ຍົກສູງຄວາມຮູ້ກ່ຽວກັບປະຫວັດສາດ, ວັດທະນະທຳເທ່ົານັ້ນ ຫາກຍັງຮູ້ວິທີວາງແຜນການ, ຂຽນບົດລາຍງານໄດ້ດີກວ່າ ແລະ ມີໝູ່ເພື່ອນຫລາຍກວ່າ.
ຫໍພິພິທະພັນປະຫວັດສາດແຫ່ງຊາດ
ພາບ:baotanglichsu.vn
|
ເອື້ອຍໂຕທິທູ່ຍເລີມ, ຮອງຫົວຫນ້າພະແນກສື່ສານ, ຫົວຫນ້າສະໂມສອນອາສາສະໝັກຂອງຫໍພິພິທະພັນປະຫວັດສາດແຫ່ງຊາດຕີລາຄາວ່າ:
“ພວກນ້ອງນັກຮຽນ, ນັກສຶກສາແມ່ນຜູ້ມີພອນສະຫວັນ, ມັກຊອກຮູ້ກ່ຽວກັບປະຫວັດສາດ, ວັດທະນະທຳ ແລະ ໄດ້ເຂົ້າຮ່ວມການເຄື່ອນໄຫວຕ່າງໆຢ່າງມີປະສິດທິຜົນ. ພວກນ້ອງໄດ້ປະກອບສ່ວນອັນໃຫຍ່ຫລວງເຂົ້າໃນການເຄື່ອນໄຫວລວມຂອງຫໍພິພິທະພັນ.”
ຈາກຮູບແບບສະໂມສອນ “ນ້ອງນິຍົມປະຫວັດສາດ,” “ຊົ່ວໂມງຮຽນປະຫວັດສາດ” ທີ່ສະຫງວນໃຫ້ແກ່ພວກນ້ອງນັກຮຽນຈາກຊັ້ນປະຖົມ, ມັດທະຍົມຕອນຕົ້ນຕະຫລອດຮອດຊັ້ນມັດທະຍົມຕອນປາຍ, ເລື່ອງສ້າງຕັ້ງສະໂມສອນອາສາສະໝັກຂອງຫໍພິພິທະພັນປະຫວັດສາດແຫ່ງຊາດໄດ້ສ້າງເງື່ອນໄຂເພື່ອໃຫ້ບັນດາເພື່ອນຫນຸ່ມເປັນເຈົ້າການເຂົ້າຮ່ວມບັນດາການເຄື່ອນໄຫວປະຫວັດສາດ, ວັດທະນະທຳ, ຈາກນັ້ນ ສ້າງຄວາມດຶງດູດເຮັດໃຫ້ພວກນ້ອງເມົາມົວກັບວິຊາປະຫວັດສາດ ແລະ ວັດທະນະທຳຂອງຊາດກວ່າອີກ.