ວັນທີ 29/9, ສະຖານີໂທລະພາບຫວຽດນາມ ແລະ ສະຖານີໂທລະພາບ TBS ຂອງຍີປຸ່ນຈະນຳຟິມຮູບເງົາ“ເພື່ອນຮ່ວມງານ” ມາສາຍເພື່ອແນະນຳຕໍ່ຜູ້ຊົມ ຊຶ່ງກົງກັບໂອກາດສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງຫວຽດນາມ-ຍີປຸ່ນ. ຮູບເງົາເລື່ອງນີ້ແມ່ນເວົ້າເຖິງນ້ຳໃຈເພື່ອນມິດອັນສູງສົ່ງລະຫວ່າງນັກປັນຍາຊົນຜູ້ຮັກຊາດ ຟານໂບ້ຍເຈົາ ຂອງຫວຽດນາມ ແລະ ທ່ານໝໍ Sakitaro Asaba ຂອງຍີປຸ່ນ ໃນໄລຍະກ່ອນນີ້ກ່ວາ 100 ປີ, ຂະນະທີ່ ຟານໂບ້ຍເຈົາ ໄປຍີປຸ່ນເພື່ອຊອກຫາເສັ້ນທາງປົດປ່ອຍຊາດ. ຮູບເງົາເລື່ອງນີ້ບໍ່ພຽງແຕ່ບັນລຸຄຸນນະພາບກ່ຽວກັບເນື້ອໃນ, ສິລະປະເທົ່ານັ້ນ, ຫາກຍັງສອດຄ່ອງກັບກັບວັດທະນະທຳ, ຄວາມນິຍົມຊົມຊອບຂອງຜູ້ຊົມ 2 ປະເທດອີກດ້ວຍ.
ຟິມຮູບເງົາ“ເພື່ອນຮ່ວມງານ” ຈະຖືກສາຍເພື່ອແນະນຳຕໍ່ຜູ້ຊົມ ຊຶ່ງກົງກັບໂອກາດສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງຫວຽດນາມ-ຍີປຸ່ນ
(ພາບ : dienanh)
|
ຟິມຮູບເງົາ“ເພື່ອນຮ່ວມງານ” ແມ່ນໝູນອ້ອມເລ່ືອງລາວທີ່ປະສົມປະສານລະຫວ່າງອະດີດຕະການ ແລະ ປະຈຸບັນໂດຍຜ່ານບັນດາການພົບປະທີ່ບໍ່ຕັ້ງໃຈລະຫວ່າງບັນດາເພື່ອນຫວຽດນາມ ແລະ ຍີປຸ່ນ. Tetsuya ແມ່ນນັກທຸລະກິດຍີປຸ່ນທີ່ມາຫວຽດນາມເພື່ອຊອກຫາກາລະໂອກາດຮ່ວມທຸລະກິດ. ເມື່ອພົບປະກັບ ແທ່ງນາມ ຜູ້ອຳນວຍການທີ່ຍັງໜຸ່ມຂອງບໍລິສັດຕັດຫຍິບອາຊີ, Tetsuya ຕົກສະເງີ້ທີ່ສຸດຕໍ່ໜ້າເງື່ອນໄຂຮ່ວມມືທີ່ ແທ່ງນາມ ນຳສະເໜີ. ນັ້ນແມ່ນເລື່ອງ Tetsuya ຕ້ອງໄປຊອກຫາສາງວັດຖຸປະເສີດທີ່ກ່ຽວຂ້ອງເຖິງພາບຖ່າຍ ແລະ ຊື່ຂອງຊາວຫວຽດນາມຄົນໜຶ່ງ ນັ້ນແມ່ນ ຟານໂບ້ຍເຈົາ. Tetsuya ໄດ້ເລີ່ມເດີນທາງຊອກຫາຄຳຕອບ ແລະ ຄວາມລັບຈາກບັນດາເລື່ອງລາວມີຈິງກ່ຽວກັບ ຟານໂບ້ຍເຈົາ ຊຶ່ງແມ່ນຜູ້ໄດ້ເຄີຍໄປຍີປຸ່ນໃນຈຸດເວລາກ່ອນນີ້ 100 ປີເພື່ອຊອກຫາເສັ້ນທາງປົດປ່ອຍຊາດ ໄດ້ຄ່ອຍໆຖືກເປີດເຜີຍ. ສຸດທ້າຍ Tetsuya ບໍ່ພຽງແຕ່ເຊັນໄດ້ໂຄງການຮ່ວມມືກັບເພື່ອນຮ່ວມງານຫວຽດນາມເທົ່ານັ້ນ, ຫາກຍັງເຫັນໄດ້ເຖິງຄຸນຄ່າແທ້ຈິງຂອງຄວາມຮັກ, ການແບ່ງປັນລະຫວ່າງລາວກັບ ຮົ່ງລຽນ ເພື່ອນຍິງຊາວຫວຽດນາມ. ທ່ານ Jun Muto ຜູ້ກຳກັບການສະແດງຟິມຮູບເງົາ“ເພື່ອນຮ່ວມງານ” ໃຫ້ຮູ້ວ່າ :
“ ຮູບພາບ ນັກປັນຍາຊົນຜູ້ຮັກຊາດ ຟານໂບ້ຍເຈົາ ໄດ້ຍອມເສຍສະຫຼະຊີວິດເພື່ອກູ້ຊາດໃຫ້ຫຼຸດພົ້ນອອກຈາກແອກຄອບຄອງຂອງພວກລ່າເມືອງຂຶ້ນຝະລັ່ງ ແລະ ໄດ້ປຸກລຸກຂະບວນການ ດົງຢູ່ ແມ່ນບຸກຄົນເຮັດໃຫ້ຂ້າພະເຈົ້ານິຍົມນັບຖື. ຂ້າພະເຈົ້າຫວັງວ່າ ຮູບເງົາເລື່ອງນີ້ຈະຊ່ວຍໃຫ້ປະຊາຊົນ 2 ປະເທດສາມາດເຂົ້າໃຈກ່ຽວກັບສາຍພົວພັນທີ່ສະໜິດຕິດພັນລະຫວ່າງຫວຽດນາມ-ຍີປຸ່ນ”
ໃນຮູບເງົາເລື່ອງນີ້, ນັກສະແດງຮູບເງົາ ຮີ່ງດົງ ຂອງຫວຽດນາມ ໄດ້ສວມບົດທັງ 2 ຕົວລະຄອນຄື : ຟານໂບ້ຍເຈົາ ແລະ ຜູ້ອຳນວຍການ ແທ່ງນາມ. ນັກສະແດງຮູບເງົາ ຮີ່ງດົງ ແບ່ງປັນວ່າ ລາວສວມບົດຕົວລະຄອນໃນຍຸກທັນສະໄໝ ແລະ ອີກຕົວລະຄອນໜຶ່ງໃນອະດີດຕະການ. ເຖິງວ່າ 2 ຕົວລະຄອນມີຄວາມແຕກຕ່າງກັນກ່ຽວກັບສະພາວະ ແລະ ການນຸ່ງຖື ກໍຄືກິລີຍາທ່າທາງ, ແຕ່ລະຫວ່າງ 2 ຕົວລະຄອນ ພັດມີຄວາມສະເໜ່ເພື່ອສ້າງເປັນສາຍພົວພັນເພື່ອນ ມິດໃນລຸ່ນຄົນຕໍ່ໄປ. ນັກສະແດງຮູບເງົາ ຮີ່ງດົງ ເວົ້າວ່າ :
“ ຂ້າພະເຈົ້າກໍເຊັ່ນດຽວກັນກັບຜູ້ໜຶ່ງສືບທອດຄົນລຸ່ນກ່ອນ, ສືບທອດສາຍສຳພັນທີ່ດີງາມຊຶ່ງພໍ່ຕູ້ ຟານໂບ້ຍເຈົາ ໄດ້ສ້າງຂຶ້ນລະຫວ່າງຊາວຫວຽດນາມ ແລະ ຍີປຸ່ນ. ຂ້າພະເຈົາປາຖະໜາວ່າ ຜ່ານ ຮູບເງົາເລື່ອງນີ້, ສາຍພົວພັນລະຫວ່າງ 2 ປະເທດຫວຽດນາມ-ຍີປຸ່ນຈະນັບມື້ນັບດີກ່ວາເກົ່າ”
ສ່ວນນັກສະແດງຮູບເງົາ Noriyuki Higashiyama ຂອງຍີປຸ່ນ ກໍສວມບົດທັງ 2 ຕົວລະຄອນຄື : ຕົວລະຄອນ ທ່ານໝໍ Sakitaro Asaba ແລະ ນັກທຸລະກິດ Tetsuya. Noriyuki Higashiyama ເວົ້າວ່າ :
“
ເລື່ອງລາວກ່ອນນີ້ 100 ປີນັ້ນ, ຂ້າພະເຈົາ້ເອງ ກໍຍັງບໍ່ທັນຮູ້. ເນື່ອງໃນ ໂອກາດສະເຫຼີມສະຫຼອງ 40 ປີແຫ່ງວັນສ້າງສາຍພົວພັນທາງການທູດລະຫວ່າງຫວຽດນາມ-ຍີປຸ່ນ, ຂ້າພະເຈົ້າໄດ້ມີໂອກາດເຂົ້າຮ່ວມການສະແດງຮູບເງົານີ້ ຊຶ່ງໄດ້ຫວນຄືນອະນຸສອນທີ່ດີງາມ, ສາຍສຳພັນເພື່ອນມິດຫວຽດນາມ-ຍີປຸ່ນກ່ອນນີ້ 100 ປີ. ນີ້ແມ່ນຜາສຸກຢ່າງໃຫຍ່ຫຼວງສຳລັບຂ້າພະເຈົ້າ ” .