ទំនិញទាំងនេះត្រូវបានប្រមូលផ្តុំនៅអាកាសយានដ្ឋាន Al Arish នៅភាគខាងជើងឧបទ្វីប Sinai នៃប្រទេសអេហ្ស៊ីប ជាជំនួយមនុស្សធម៌ដែលត្រូវបានគៀងគរដោយរដ្ឋាភិបាលអេហ្ស៊ីប ដោយមានការចូលរួមចំណែកពីប្រទេសក្នុងតំបន់និងអន្តរជាតិរាប់សិបប្រទេស ដើម្បីគាំទ្រដល់ប្រជាជននៅតំបន់ហ្គាហ្សាដែលរងផលប៉ះពាល់ដោយជម្លោះ។

រថយន្តដឹកប្រេងពីឧបទ្វីប Sinai ទៅកាន់តំបន់ហ្គាហ្សាតាមច្រកព្រំដែនRafah។ រូបថត៖ VOV Cairo

យោងតាម SIS ផងដែរ ចាប់តាំងពីការចាប់ផ្តើមនៃជម្លោះ បរិមាណជំនួយមនុស្សធម៌សរុបដែលត្រូវបានបញ្ជូនទៅតំបន់ហ្គាហ្សាបានឈានដល់ជាង ២៥.០០០ តោន ហើយទាំងអស់បានឆ្លងកាត់ច្រកព្រំដែន Rafah របស់ប្រទេសអេហ្ស៊ីប។ ក្នុងអំឡុងពេលនេះ អេហ្ស៊ីបក៏បានទទួលជនប៉ាឡេស្ទីនដែលរងរបួសសរុបចំនួន ៥៦៦ នាក់ដែលត្រូវបានផ្ទេរពីតំបន់ហ្គាហ្សាទៅកាន់ឧបទ្វីប Sinai  និងមន្ទីរពេទ្យនៅក្នុងប្រទេសអេហ្ស៊ីបសម្រាប់ការព្យាបាល។ ជនបរទេសឬជនមានសញ្ជាតិពីរ ចំនួន ៨.៦៩១នាក់ ត្រូវបាននាំយកពីតំបន់ហ្គាហ្សា ទៅកាន់ឧបទ្វីប Sinai ដើម្បីវិលត្រឡប់ទៅប្រទេសរបស់ពួកគេវិញ ឬទៅកាន់ប្រទេសទីបី។

ទាក់ទិននឹងបញ្ហាចំណាប់ខ្មាំង នៅក្នុងសេចក្តីប្រកាសមួយកាលពីយប់ថ្ងៃទី ២៨ វិច្ឆិកា កងកម្លាំងការពារអ៊ីស្រាអែល (IDF) បានបញ្ជាក់ថា ចំនួនចំណាប់ខ្មាំងថ្មីបំផុត រួមមានស្ត្រីអ៊ីស្រាអែល ១០នាក់ និងពលរដ្ឋថៃ ២នាក់ ត្រូវបានក្រុមហាម៉ាសប្រគល់ឲ្យកាកបាទក្រហមអន្តរជាតិនៅតំបន់ហ្គាហ្សា ហើយកំពុងធ្វើដំណើរវិលត្រឡប់ទៅអ៊ីស្រាអែលវិញ។ ក្នុងពេលជាមួយគ្នានោះ ប្រភពព័ត៌មានក្នុងតំបន់មួយចំនួនបានបញ្ជាក់ថា អ្នកទោសប៉ាឡេស្ទីនចំនួន ៣០នាក់ត្រូវបានដោះលែងដោយអាជ្ញាធរអ៊ីស្រាអែលនៅតំបន់ West Bank ដោយបានបញ្ចប់ការផ្លាស់ប្តូរអ្នកទោសលើកទី៥ រវាងអ៊ីស្រាអែល និងក្រុមហាម៉ាស់ ចាប់តាំងពីបទឈប់បាញ់មនុស្សធម៌នៅហ្គាហ្សាចូលជាធរមាននៅព្រឹកថ្ងៃទី២៤ ខែវិច្ឆិកា៕