អគ្គលេខាបក្សកុម្មុយនិស្តវៀតណាមលោក Nguyen Phu Trong បានទទួលជួបនាយករដ្ឋមន្ត្រីបេឡារុសលោក Roman Golovchenko។

នៅក្នុងជំនួបនេះ អគ្គលេខាបក្ស លោក Nguyen Phu Trong បានអះអាងថា វៀតណាមជានិច្ចកាលយកចិត្តទុកដាក់ដល់ការអភិវឌ្ឍ និងការពង្រឹងទំនាក់ទំនងជាមួយបណ្តាប្រទេសជាមិត្តភក្តិប្រពៃណី ក្នុងនោះមានបេឡារុស្ស និងជាមួយកម្លាំងជឿនលឿននានាលើពិភពលោក។ អគ្គលេខាបក្ស លោក Nguyen Phu Trong ជឿជាក់ថា ដំណើរទស្សនកិច្ចរបស់នាយករដ្ឋមន្ត្រី លោក Roman Golovchenko នឹងបង្កើតកម្លាំងចលករថ្មីដើម្បីជំរុញទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការពហុវិស័យរវាងវៀតណាមនិងបេឡារុស្សនាពេលខាងមុខ។ ក្នុងឱកាសនេះ អគ្គលេខាបក្ស លោក Nguyen Phu Trong ក៏បានពិភាក្សាជាមួយនាយករដ្ឋមន្ត្រី លោក Roman Golovchenko អំពីទិសដៅមួយចំនួន ដើម្បីជំរុញទំនាក់ទំនងមិត្តភាពជាប្រពៃណីរវាងប្រទេសទាំងពីរឡើងកំពស់ថ្មី ផ្លាស់ប្តូរបទពិសោធន៍ និងពង្រឹងកិច្ចសហប្រតិបត្តិការគ្រប់ជ្រុងជ្រោយ។ បក្សកុម្មុយនិស្តវៀតណាមត្រៀមខ្លួនជាស្រេចពង្រឹង និងពង្រីកកិច្ចសហប្រតិបត្តិការជាមួយគណបក្សនយោបាយនានានៅបេឡារុស្ស។

រីឯខ្លួនវិញ នាយករដ្ឋមន្ត្រី លោក Roman Golovchenko បានសង្កត់ធ្ងន់ថា បេឡារុស្ស យកចិត្តទុកដាក់យ៉ាងខ្លាំងចំពោះកិច្ចសហប្រតិបត្តិការរវាងគណបក្សនយោបាយបេឡារុស្ស និងបក្សកុម្មុយនិស្តវៀតណាម ដោយចាត់ទុកថានេះជាកាណាល់ដ៏សំខាន់មួយដើម្បីជំរុញទំនាក់ទំនងរវាងប្រទេសទាំងពីរ។ លោកនាយករដ្ឋមន្ត្រីបានឯកភាពជាមួយវិធានការសំខាន់ៗដែលអគ្គលេខាបក្សលោក Nguyen Phu Trong បានលើកឡើង ដើម្បីជំរុញទំនាក់ទំនងរវាងប្រទេសទាំងពីរឲ្យកាន់តែស៊ីជម្រៅ ក្នុងនោះមានការជំរុញទំនាក់ទំនងពាណិជ្ជកម្មផងដែរ។

ប្រធានរដ្ឋ លោក Vo Van Thuong និងនាយករដ្ឋមន្ត្រី លោក Roman Golovchenko បានឯកភាពជំរុញប្រទេសទាំងពីរអនុវត្តន៍ឱ្យបានល្អនូវកិច្ចព្រមព្រៀងដែលសម្រេចបាននៅក្នុងជំនួបពិភាក្សាការងាររវាងនាយករដ្ឋមន្ត្រីទាំងពីរ។ (រូបថត៖ VNA)

នារសៀលថ្ងៃដដែល នៅវិមានប្រធានរដ្ឋ លោក Vo Van Thuong ប្រធានរដ្ឋវៀតណាមបានទទួលជួបនាយករដ្ឋមន្ត្រីនៃសាធារណរដ្ឋបេឡារុស លោក Roman Golovchenko។

ប្រធានរដ្ឋ លោក Vo Van Thuong និងនាយករដ្ឋមន្ត្រី លោក Roman Golovchenko បានឯកភាពជំរុញបណ្ដាក្រសួង ស្ថាប័ន និងមូលដ្ឋាននៃប្រទេសទាំងពីរអនុវត្តន៍ឱ្យបានល្អនូវកិច្ចព្រមព្រៀងដែលសម្រេចបាននៅក្នុងជំនួបពិភាក្សាការងាររវាងនាយករដ្ឋមន្ត្រីទាំងពីរ។ តាមនោះ ធ្វើឲ្យកាន់តែស៊ីជម្រៅថែមទៀតនូវទំនាក់ទំនងមិត្តភាពជាប្រពៃណី និងកិច្ចសហប្រតិបត្តិការពហុវិស័យរវាងវៀតណាម និងបេឡារុស្ស៕