ទិដ្ឋភាពនៃកិច្ចប្រជុំកំពូលអាស៊ាន-ជប៉ុន (រូបថត៖ VGP/Nhat Bac)

នៅក្នុងកិច្ចប្រជុំកំពូលអាស៊ាន-ជប៉ុនលើកទី២៥ នាយករដ្ឋមន្ត្រីលោក Pham Minh Chinh បានសង្កត់ធ្ងន់ថា កិច្ចសហប្រតិបត្តិការសេដ្ឋកិច្ច ពាណិជ្ជកម្ម និងការវិនិយោគអភិវឌ្ឍន៍គួរតែជាមូលដ្ឋានគ្រឹះ កម្លាំងជំរុញ និងជាអាទិភាពសម្រាប់កិច្ចសហប្រតិបត្តិការរវាងភាគីទាំងពីរនាពេលខាងមុខ។ រដ្ឋាភិបាលនៃបណ្តាប្រទេសអាស៊ាននឹងបន្តបង្កើតលក្ខខណ្ឌអំណោយផលសម្រាប់ធុរកិច្ច និងវិនិយោគិនជប៉ុន ដើម្បីរក្សាស្ថិរភាព ពង្រីកផលិតកម្ម និងអាជីវកម្ម។ ទន្ទឹមនឹងនោះ លោកសង្ឃឹមថា ជប៉ុននឹងបង្កើតលក្ខខណ្ឌអំណោយផលបន្ថែមទៀតសម្រាប់ការនាំចេញកសិផលរបស់វៀតណាម និងបណ្តាប្រទេសអាស៊ាន ធ្វើពិពិធកម្មខ្សែសង្វាក់ផ្គត់ផ្គង់។ លោកនាយករដ្ឋមន្ត្រីបានស្នើភាគីទាំងពីរពង្រឹងការអភិវឌ្ឍសេដ្ឋកិច្ចបៃតង សេដ្ឋកិច្ចឌីជីថល និងសេដ្ឋកិច្ចវិលជុំ ដោយសង្ឃឹមថា ជប៉ុននឹងគាំទ្រអាស៊ានក្នុងការជំរុញការផ្លាស់ប្តូរថាមពល និងឆ្លើយតបប្រកបដោយប្រសិទ្ធភាពចំពោះការប្រែប្រួលអាកាសធាតុ; ផ្តល់អាទិភាពដល់ការអភិវឌ្ឍហេដ្ឋារចនាសម្ព័ន្ធយុទ្ធសាស្ត្រក្នុងបណ្តាប្រទេសអាស៊ាន ជាពិសេសការអភិវឌ្ឍផ្លូវរថភ្លើងល្បឿនលឿន ធានាសន្តិសុខហិរញ្ញវត្ថុ ថាមពល និងសន្តិសុខស្បៀង។ ទន្ទឹមនឹងនោះ លោកនាយករដ្ឋមន្ត្រីបានស្នើឱ្យជប៉ុននិងអាស៊ានជំរុញការជួបប្រាស្រ័យរវាងប្រជាជន ផ្លាស់ប្តូរវប្បធម៌ ផ្សព្វផ្សាយទេសចរណ៍ ផ្តោតលើការអភិវឌ្ឍធនធានមនុស្សប្រកបដោយគុណភាពខ្ពស់ បង្កើតលក្ខខណ្ឌអំណោយផលសម្រាប់ការងារ និងកម្មសិក្សារបស់សិក្ខាកាមវៀតណាម និងអាស៊ានដែលកំពុងធ្វើការនៅប្រទេសជប៉ុន។

មេដឹកនាំអាស៊ាន និងសហរដ្ឋអាមេរិកស្វាគមន៍ចំពោះវឌ្ឍនភាពកិច្ចសហប្រតិបត្តិការជាវិជ្ជមានរវាងភាគីទាំងពីរនាពេលកន្លងមក - (រូបថត៖ VGP/Nhat Bac)

ក្នុងកិច្ចប្រជុំកំពូលអាស៊ាន-អាមេរិកលើកទី១០ នាយករដ្ឋមន្ត្រីលោក Pham Minh Chinh បានវាយតម្លៃខ្ពស់លើការប្តេជ្ញាចិត្តយ៉ាងមុតមាំរបស់អាមេរិកចំពោះអាស៊ាន; ឯកភាពខ្ពស់ក្នុងការអនុម័តលើសេចក្តីប្រកាសបង្កើតភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អាមេរិក។ លោកនាយករដ្ឋមន្ត្រីបានសង្កត់ធ្ងន់ថា នាពេលខាងមុខ អាស៊ាន និងអាមេរិកគួរតែផ្តល់អាទិភាពដល់ការជំរុញការផ្លាស់ប្តូរពាណិជ្ជកម្ម និងការវិនិយោគ ព្រមទាំងពន្លឿនកិច្ចខិតខំប្រឹងប្រែងសម្រាប់ការស្តារឡើងវិញប្រកបដោយនិរន្តរភាពបន្ទាប់ពីជំងឺរាតត្បាត។ លោកនាយករដ្ឋមន្ត្រីបានស្នើឱ្យសហរដ្ឋអាមេរិកជួយដល់អាស៊ាន ដើម្បីពង្រីកទំនិញចូលទៅក្នុងទីផ្សារសហរដ្ឋអាមេរិក ហើយទន្ទឹមនឹងនោះជួយផ្លាស់ប្តូររចនាសម្ព័ន្ធសេដ្ឋកិច្ច អភិវឌ្ឍសេដ្ឋកិច្ចឌីជីថល និងពាណិជ្ជកម្មតាមអេឡិចត្រូនិក។  នាយករដ្ឋមន្ត្រីក៏បានស្នើឱ្យសហរដ្ឋអាមេរិកពង្រឹងការគាំទ្ររបស់ខ្លួនចំពោះបណ្តាប្រទេសអាស៊ាន រួមទាំងប្រទេសវៀតណាមផងដែរ ដើម្បីបង្កើនភាពធន់នឹងសុខភាព ឆ្លើយតបយ៉ាងសកម្មចំពោះជំងឺរាតត្បាត ឆ្លើយតបទៅនឹងការប្រែប្រួលអាកាសធាតុ និងជំរុញកំណើនបៃតង រួមទាំងការបំប្លែងថាមពល។ ជាមួយគ្នានេះ លោកនាយករដ្ឋមន្ត្រីសង្ឃឹមថា សហរដ្ឋអាមេរិកនឹងបន្តជួយដល់អាស៊ានក្នុងការអភិវឌ្ឍប្រកបដោយចីរភាពនៃអនុតំបន់មេគង្គ។

នាយករដ្ឋមន្ត្រី លោក Pham Minh Chinh ក្នុងកិច្ចប្រជុំ (រូបថត៖ VGP/Nhat Bac)

នៅក្នុងកិច្ចប្រជុំកំពូលអាស៊ាន-កាណាដា លើកទី៤៥ នាយករដ្ឋមន្ត្រីលោក Pham Minh Chinh បានអះអាងនូវការគាំទ្រជាគោលការណ៍ក្នុងការធ្វើឱ្យទំនាក់ទំនងអាស៊ាន-កាណាដា ទៅជាដៃគូយុទ្ធសាស្ត្រ។ លោកនាយករដ្ឋមន្ត្រីបានសង្កត់ធ្ងន់ថា អាស៊ាន និងកាណាដាគួរតែផ្តល់អាទិភាពដល់ការជំរុញកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគ ដែលក្នុងនោះការអនុវត្តប្រកបដោយប្រសិទ្ធភាពនូវកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) និងការខិតខំប្រឹងប្រែងជំរុញការចរចាដើម្បីកសាងកិច្ចព្រមព្រៀងពាណិជ្ជកម្មសេរី (FTA) រវាងភាគីទាំងពីរ។

លោកនាយករដ្ឋមន្រ្តីក៏បានអំពាវនាវឱ្យធុរកិច្ចកាណាដាវិនិយោគបន្ថែមទៀតនៅក្នុងអាស៊ាន និងគាំទ្រដល់អាជីវកម្មអាស៊ានដើម្បីចូលរួមក្នុងខ្សែសង្វាក់ផ្គត់ផ្គង់ពិភពលោក; ស្នើឱ្យកាណាដាបន្តគាំទ្រ និងបង្កើតលក្ខខណ្ឌសម្រាប់ប្រទេសវៀតណាម និងអាស៊ាននាំចេញកាន់តែច្រើនទៅកាន់ទីផ្សារកាណាដា និងជួយអាស៊ានក្នុងការអភិវឌ្ឍធនធានមនុស្សប្រកបដោយគុណភាពខ្ពស់។

នាយប់ថ្ងៃទី១២ ខែវិច្ឆិកានេះ នាយករដ្ឋមន្ត្រីលោក Pham Minh Chinh និងថ្នាក់ដឹកនាំប្រទេសអាស៊ាន និងដៃគូនានាបានអញ្ជើញចូលរួមពិធីទទួលបដិសណ្ឋារកិច្ចដោយសម្តេចតេជោ ហ៊ុន សែន នាយករដ្ឋមន្រ្តីកម្ពុជា៕