ប្រធានាធិបតីបារាំងលោក Emmanuel Macron និងសមភាគីលោក Volodymyr Zelensky ក្នុងពិធីចុះហត្ថលេខាលើកិច្ចព្រមព្រៀងសន្តិសុខទ្វេភាគី។ រូបថត៖ France Bleu

ទាក់ទិននឹងការលំបាកដែលអ៊ុយក្រែនកំពុងប្រឈមមុខនៅលើសមរភូមិ ក្នុងអំឡុងដំណើរទស្សនកិច្ចទៅកាន់ទីក្រុងប៊ែរឡាំង និងទីក្រុងប៉ារីសកាលពីដើមសប្តាហ៍នេះ ប្រធានាធិបតីអ៊ុយក្រែនលោក Volodymyr Zelensky បានឲ្យដឹងថា កងទ័ពអ៊ុយក្រែនបន្តប្រឈមមុខនឹងការវាយប្រហារពីកងទ័ពរុស្ស៊ី និងមិនអាចវាយតបវិញបាន ដោយសារតែខ្វះគ្រាប់រំសេវយ៉ាងធ្ងន់ធ្ងរ ជាពិសេសនៅពេលដែលកញ្ចប់ជំនួយ ៦០ពាន់លានដុល្លាររបស់អាមេរិកមិនទាន់ត្រូវបានអនុម័តនៅឡើយទេ។ ក្នុងអំឡុងពេលពិធីចុះហត្ថលេខាលើកិច្ចព្រមព្រៀងសន្តិសុខទ្វេភាគីជាមួយប្រធានាធិបតីអ៊ុយក្រែន Zelensky នៅទីក្រុងប៉ារីស ប្រធានាធិបតីបារាំងលោក Emmanuel Macron បានសន្យាថា នឹងបន្ថែមជំនួយយោធាដល់អ៊ុយក្រែនរហូតដល់ ៣ ពាន់លានអឺរ៉ូនៅឆ្នាំ ២០២៤ ហើយបានប្រកាសថា លោកនឹងធ្វើដំណើរទស្សនកិច្ចនៅអ៊ុយក្រែននៅពាក់កណ្តាលខែមីនា។