ឯកអគ្គរដ្ឋទូត លោក Dang Dinh Quy ប្រធានស្ថានបេសកកម្មវៀតណាមប្រចាំនៅអង្គការសហប្រជាជាតិ

សុន្ទរកថារបស់បណ្តាប្រទេសនៅឯកិច្ចប្រជុំនេះ សុទ្ធតែលើកកំពស់នូវគុណតម្លៃជាសកលរួមនិងពេញលេញនៃអនុសញ្ញាអង្គការសហប្រជាជាតិស្តីពីច្បាប់សមុទ្រ (UNCLOS) ឆ្នាំ ១៩៨២ ក៏ដូចជាគូសបញ្ជាក់ពីសារៈសំខាន់នៃអនុសញ្ញានេះដែលជាក្រប ខ័ណ្ឌច្បាប់ដើម្បីគ្រប់គ្រងប្រតិបត្តិការលើសមុទ្រ។

ជាពិសេសប្រទេសអាមេរិក អង់គ្លេស អាល្លឺម៉ង់ ជប៉ុន និងអូស្រ្តាលី បានលើកឡើងជាសាធារណៈអំពីជំលោះនៅសមុទ្រខាងកើត ដោយសម្តែងការព្រួយបារម្ភចំពោះការទាមទារខាងគតិយុត្តិនៅសមុទ្រខាងកើត ព្រមទាំងអះអាងថា រាល់ការទាមទារអំពីសិទ្ធិប្រវត្តិសាស្ត្រចំពោះធនធានសមុទ្រ ការកំណត់មូលដ្ឋានគ្រឹះត្រង់ប្រជុំកោះនិងស្ថាប័នកោះនានា ត្រូវអនុលោមតាម UNCLOS ដោយសង្កត់ធ្ងន់លើតម្រូវការដើម្បីធានានូវសេរីភាពខាងនាវាចរណ៍លើសមុទ្រខាងកើត ក៏ដូចជា កាតព្វកិច្ចសម្រាប់ការដោះស្រាយជម្លោះអន្តរជាតិដោយសន្តិវិធីស្របតាម UNCLOS ផងដែរ។

ថ្លែងមតិនៅឯអង្គប្រជុំ ឯកអគ្គរដ្ឋទូត លោក Dang Dinh Quy ប្រធានស្ថានបេសកកម្មវៀតណាមប្រចាំនៅអង្គការសហប្រជាជាតិបានអះអាងថា វៀតណាមតែងតែលើកកំពស់គុណតម្លៃជាសកលនិងពេញលេញរបស់ UNCLOS។ ទាក់ទងនឹងស្ថានភាពសមុទ្រខាងកើត លោកឯកអគ្គរដ្ឋទូតបានអះអាងគោលជំហរមុនក៏ដូចជាក្រោយរបស់វៀតណាម នោះគឺ រាល់ជម្លោះទាំងអស់ត្រូវតែត្រូវបានដោះស្រាយតាមសន្តិវិធី ដោយឈរ លើមូលដ្ឋាននៃការគោរពច្បាប់អន្តរជាតិ ក្នុងនោះមាន UNCLOS ឆ្នាំ ១៩៨២ ព្រមទាំងគោរពដំណើរការការទូតនិងផ្លូវច្បាប់ មិនប្រើប្រាស់កម្លាំងនិងគំរាមប្រើកម្លាំង។ លោកឯកអគ្គរដ្ឋទូតបានសម្តែងការព្រួយបារម្ភអំពីការប្រព្រឹត្តមួយចំនួននៅសមុទ្រខាងកើត ដែលបានរំលោភយ៉ាងធ្ងន់ធ្ងរលើអធិបតេយ្យភាពនិងសិទ្ធិយុត្តាធិការរបស់វៀតណាម និងអំពាវនាវឲ្យភាគីពាក់ព័ន្ធអត់ធ្មត់ មិនធ្វើយោធូបនីយកម្ម ឬដំណើរការសកម្មភាពដែលធ្វើឱ្យស្មុគស្មាញដល់សភាពការណ៍ បង្កើនជម្លោះ និងប៉ះពាល់ដល់សុវត្ថិភាពនិងសន្តិសុខនាវាចរណ៍និងអាកាសចរណ៍នៅសមុទ្រខាងកើត គំរាមកំហែងដល់សន្តិភាពនិងស្ថិរភាពក្នុងតំបន់។ ទន្ទឹមជាមួយគ្នានោះ  អនុវត្តពេញលេញនូវសេចក្តីថ្លែងការណ៍រួមស្តីពី ការប្រព្រឹត្តរបស់ភាគីនានានៅសមុទ្រខាងកើត (DOC) និងការបញ្ចប់ក្រមប្រតិបត្តិ (COC) ប្រកបដោយខ្លឹមសារជាក់ស្តែងនិងមានប្រសិទ្ធភាពស្របតាម UNCLOS៕