កិច្ចប្រជុំរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ (រូបថត៖ telesuenglish)

នាថ្ងៃទី ២ មិនា ថ្លែងមតិក្នុងអង្គប្រជុំជាន់ខ្ពស់ បើកសម័យប្រជុំ រដ្ឋមន្ត្រីក្រសួងការបរទេស លោក Bui Thanh Son បានអះអាងសារជាថ្មីថា វៀតណាមមានបំណងចង់រួមចំណែកក្នុងកិច្ចខិតខំប្រឹងប្រែងរួមរបស់ពិភពលោក សំដៅលើកកម្ពស់និងការពារសិទ្ធិមនុស្ស តាមរយៈការឈរឈ្មោះជាបេក្ខភាពនៃក្រុមប្រឹក្សាសិទ្ធិមនុស្សអាណត្តិ ២០២៣-២០២៥។ វៀតណាមតែងតែត្រៀមខ្លួនជាស្រេច សហប្រតិបត្តិការជាមួយភាគីពាក់ព័ន្ធ ដើម្បីលើកកម្ពស់គោលការណ៍នៃធម្មនុញ្ញអង្គការសហប្រជាជាតិនិងច្បាប់អន្តរជាតិ; យកចិត្តទុកដាក់លើការធានាសិទ្ធិមនុស្សយ៉ាងទូលំទូលាយលើគ្រប់ទិដ្ឋភាព ដោយផ្តល់អាទិភាពលើកិច្ចការពារសិទ្ធិរបស់ក្រុមងាយរងគ្រោះ សមភាពយេនឌ័រ ធានាសិទ្ធិមនុស្សក្នុងការដោះស្រាយបញ្ហាសកល ជាពិសេសក្នុងការឆ្លើយតបទៅនឹងការប្រែប្រួលអាកាសធាតុ។

នៅក្នុងកិច្ចប្រជុំនេះ គណៈប្រតិភូវៀតណាមបានចូលរួមថ្លែងមតិ និងពិគ្រោះយោបល់នៅការពិភាក្សានិងកិច្ចសន្ទនា ដោយបានលើកតម្កើងគោលនយោបាយ ការចូលរួមកិច្ចសហប្រតិបត្តិការអន្តរជាតិ និងសមិទ្ធិផលរបស់វៀតណាមក្នុងការលើកកម្ពស់និងការពារសិទ្ធិមនុស្ស ឆ្ពោះទៅគោលដៅអភិវឌ្ឍន៍ប្រកបដោយចីរភាព។ គណៈប្រតិភូវៀតណាមក៏បានចូលរួមយ៉ាងសកម្មក្នុងការអភិវឌ្ឍខ្លឹមសារនៃឯកសារ និងសេចក្តីសម្រេចចិត្តដែលបានក្រុមប្រឹក្សាសិទ្ធិមនុស្សអនុម័តក្នុងសម័យប្រជុំនេះ ជាពិសេសគឺសេចក្តីសម្រេចចិត្តស្តីពីការធានាសមត្ថភាពទទួលបានវ៉ាក់សាំងបង្ការកូវីដ-១៩ ប្រកបដោយសមភាព ទាន់ពេលវេលានិងយ៉ាងទូលំទូលាយ ក្នុងការឆ្លើយតបទៅនឹងជំងឺរាតត្បាត៕