អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក Nguyen Phu Trong អញ្ជើញជួបសន្ទនាជាមួយនាយករដ្ឋមន្ត្រីចិនលោក Li Keqiang

ក្នុងក្របខ័ណ្ឌដំណើរទស្សនកិច្ចផ្លូវការនៅចិន នាព្រឹកថ្ងៃទី១ ខែវិច្ឆិកានៅ ទីក្រុងប៉េកាំង អគ្គលេខាគណៈកម្មាធិការមជ្ឈិមបក្សកុម្មុយនិស្តវៀតណាម លោក Nguyen Phu Trong បានអញ្ជើញជួបសន្ទនាជាមួយនាយករដ្ឋមន្ត្រីចិនលោក Li Keqiang ។

អញ្ជើញថ្លែងនៅទីនេះ អគ្គលេខាបក្ស លោក Nguyen Phu Trong បានសង្កត់ធ្ងន់ថា វៀតណាម និងចិនគឺជាប្រទេសជិតខាងទាំងពីរដ៏ជិតស្និទ្ធិ មានទំនាក់ទំនងមិត្តភាពយ៉ាងយូរអង្វែង ហើយមានចំណុចស្រដៀងគ្នាជាច្រើនអំពីរបបនយោបាយ និងមាគ៌ាអភិវឌ្ឍន៍។ វៀតណាមគោរព ហើយជានិច្ចកាលផ្ដល់អាទិភាពចម្បងដល់ការអភិវឌ្ឍទំនាក់ទំនងជាមួយចិន ព្រមទាំងប្រកាន់ខ្ជាប់គោលនយោបាយ "ចិនតែមួយ" ដោយឥតងាករេ។

ជាការឆ្លើយតប នាយករដ្ឋមន្ត្រីចិនលោក Li Keqiang បានអះអាងថា ចិនគោរពការអភិវឌ្ឍទំនាក់ទំនងជាមួយវៀតណាម។ លោកជឿជាក់ថា ក្រោមការដឹកនាំរបស់បក្សកុម្មុយនិស្តវៀតណាម ដែលមានលោកអគ្គលេខាបក្ស លោក Nguyen Phu Trong ជាប្រមុខនោះ  បក្ស រដ្ឋ និងប្រជាជនវៀតណាមនឹងអនុវត្តន៍ប្រកបដោយជោគជ័យនូវសេចក្តីសម្រេចចិត្តនៃមហាសន្និបាតលើកទី XIII របស់បក្សកុម្មុយនិស្តវៀតណាម រាល់គោលដៅដល់ឆ្នាំ ២០៣០ និងចក្ខុវិស័យដល់ឆ្នាំ ២០៤៥ ។

ថ្នាក់ដឹកនាំទាំងពីរបានឯកភាពគ្នាថា ក្នុងដំណាក់កាលអភិវឌ្ឍន៍ថ្មីនៃបក្សទាំងពីរ ប្រទេសទាំងពីរ និងក្នុងបរិបទអន្តរជាតិបច្ចុប្បន្ន គឺចាំបាច់ត្រូវពង្រឹងកិច្ចសហប្រតិបត្តិការលើគ្រប់វិស័យ រក្សាការផ្លាស់ប្តូរ ជំនួបជាន់ខ្ពស់ បង្កើនទំនុកចិត្តនយោបាយ ស្តារការអភិវឌ្ឍន៍ឡើងវិញ  ជំរុញកិច្ចសហប្រតិបត្តិការលើវិស័យពាណិជ្ជកម្ម និងវិនិយោគ បង្កើតមូលដ្ឋានសម្ភារៈ និងកម្លាំងចលករសម្រាប់ការអភិវឌ្ឍទំនាក់ទំនងនៃប្រទេសទាំងពីរ សម្របសម្រួលគ្នានាំទំហំពាណិជ្ជកម្មទ្វេភាគីកើនឡើងស្ថិរភាព និងចីរភាព។ ទន្ទឹមនឹងនោះ បង្កើនកិច្ចសហប្រតិបត្តិការក្នុងការធានាការថែរក្សាស្ថិរភាពខ្សែសង្វាក់ផ្គត់ផ្គង់សម្របសម្រួលគ្នាទាញយកផលប្រយោជន៍ពីបណ្ដាកិច្ចព្រមព្រៀងពាណិជ្ជកម្មសេរី បង្កើនការតភ្ជាប់ជាយុទ្ធសាស្ត្រអភិវឌ្ឍន៍ រួមចំណែកស្តារការអភិវឌ្ឍសេដ្ឋកិច្ចឡើងវិញ ក្រោយជំងឺរាតត្បាតកូវីដ ១៩។ ភាគីទាំងពីរបានឯកភាពគ្នាបង្កើនការសម្របសម្រួលគ្នានៅតាមវេទិកាពហុភាគី តំបន់ និងអន្តរជាតិ ក៏ដូចជារួមគ្នាខិតខំប្រឹងប្រែងថែរក្សាសន្តិភាព និងស្ថិរភាពក្នុងតំបន់ផងដែរ៕