អគ្គលេខាធិការណាតូ បានអំពាវនាវឱ្យហុងគ្រី ឆាប់ផ្តល់សច្ចាប័នលើពិធីសារបញ្ចូលស៊ុយអែតជាសមាជិក
(VOVWORLD) - កាលពីថ្ងៃទី ២៦ ខែមករា អគ្គលេខាធិការនៃអង្គការសន្ធិសញ្ញាអាត្លង់ទិកខាងជើង (NATO) លោក Jens Stoltenberg បានសម្តែងក្តីសង្ឃឹមថា សភាហុងគ្រីនឹងផ្តល់សច្ចាប័នលើពិធីសារដើម្បីបញ្ចូលប្រទេសស៊ុយអែតជាសមាជិកសម្ព័ន្ធភាពយោធានេះ បន្ទាប់ពីកិច្ចប្រជុំនៅចុងខែកុម្ភៈខាងមុខនេះ។
លោក Stoltenberg បានធ្វើការអំពាវនាវខាងលើ មួយថ្ងៃបន្ទាប់ពីប្រធានាធិបតីទួរគី លោក Recep Tayyip Erdogan បានអនុម័តជាផ្លូវការលើច្បាប់ទទួលស្គាល់សមាជិកភាពរបស់ស៊ុយអែតនៅក្នុងអង្គការណាតូ។ ដូច្នេះ នាបច្ចុប្បន្ន ហុងគ្រី គឺជាប្រទេសតែមួយគត់ ដែលមិនបានផ្តល់សច្ចាប័នលើសំណើរបស់ស៊ុយអែត ដើម្បីចូលជាសមាជិកណាតូ។
 អគ្គលេខាធិការនៃអង្គការ ណាតូ លោក Jens Stoltenberg ។ រូបថត៖ AFP/TTXVN |
ក្នុងសប្តាហ៍នេះ នាយករដ្ឋមន្ត្រីហុងគ្រី លោក Viktor Orban បានអញ្ជើញសមភាគីស៊ុយអែត លោក Ulf Kristersson ទៅកាន់ទីក្រុង Budapest ដើម្បីពិភាក្សាអំពីបញ្ហាខាងលើ។ លោក Kristersson បានទទួលយកសេចក្តីអញ្ជើញ។ ថ្លែងទៅកាន់ទូរទស្សន៍ស៊ុយអែត TV៤ នាយករដ្ឋមន្ត្រី លោក Kristersson បានចែករំលែកថា "ខ្ញុំសប្បាយរីករាយណាស់ដែលបានមកទីក្រុង Budapest... យើងមានរឿងជាច្រើនដែលត្រូវការពិភាក្សា... ប៉ុន្តែយើងមិនចរចាលើសមាជិកភាពណាតូនោះទេ មិនមានការចរចាណាមួយលើបញ្ហានេះទេ... ទោះជាយ៉ាងណាក៏ដោយ យើងអាចពិភាក្សាអំពីវិធីសហប្រតិបត្តិការឲ្យបានល្អបំផុតក្នុងក្របខណ្ឌនៃអង្គការណាតូ”៕