ប្រធានាធិបតី El-Sisi និងស្តេច Abdullah II បានអំពាវនាវឱ្យបញ្ឈប់ជម្លោះនៅតំបន់ហ្គាហ្សា ។ រូបថត៖ VOV-Cairo

នៅក្នុងសេចក្តីថ្លែងការណ៍រួម មេដឹកនាំទាំងពីររូបបានព្រមានពីសោកនាដកម្មនៅក្នុងតំបន់ ប្រសិនបើជម្លោះនៅតំបន់ហ្គាហ្សាបន្តរីករាលដាល។ ប្រធានាធិបតី El-Sisi និងស្តេច Abdullah II ក៏បានថ្កោលទោសការវាយប្រហារលើមន្ទីរពេទ្យ Al-Ahli ក្នុងតំបន់ហ្គាហ្សា ដែលបានសម្លាប់មនុស្សរាប់រយនាក់។ មេដឹកនាំទាំងពីរបានអំពាវនាវឱ្យការពារជនស៊ីវិលប៉ាឡេស្ទីន លុបចោលការបិទជិត និងផ្តល់ជំនួយមនុស្សធម៌សម្រាប់ប្រជាជននៅតំបន់ហ្គាហ្សា។

ក្នុងការវិវឌ្ឍន៍ពាក់ព័ន្ធមួយទៀត កងទ័ពអ៊ីស្រាអែលនាយប់ថ្ងៃទី ១៩ ខែតុលា បានប្រកាសពីការត្រៀមរៀបចំសម្រាប់យុទ្ធនាការលើគោកមួយក្នុងតំបន់ហ្គាហ្សា។ លើសពីនេះ កងទ័ពអ៊ីស្រាអែលក៏បានបញ្ជាក់ថា ពលរដ្ឋអ៊ីស្រាអែលចំនួន ២០៣នាក់ត្រូវបានចាប់ខ្លួននៅតំបន់ហ្គាហ្សា និងប្រហែល ១០០នាក់ទៀតកំពុងបាត់ខ្លួន។

នៅថ្ងៃដដែលនោះ ប្រព័ន្ធផ្សព្វផ្សាយអ៊ីស្រាអែលបានរាយការណ៍ថា ស្ថានទូតអ៊ីស្រាអែលនៅតាមបណ្តាប្រទេសមួយចំនួនក្នុងតំបន់ដូចជា បារ៉ែន ហ្ស៊កដានី ម៉ារ៉ុក អេហ្ស៊ីប និងទួរគី ត្រូវបានជម្លៀសចេញប្រកបដោយសុវត្ថភាព។ ក្រសួងការបរទេសអ៊ីស្រាអែលក៏បានតម្រូវឱ្យកម្ត្រីការទូតនៅតាមស្ថានទូតចំនួន ២០ របស់ប្រទេសនេះ នៅជុំវិញពិភពលោក ជាពិសេសអឺរ៉ុប និងអាមេរិកឡាទីន ស្នាក់នៅក្នុងផ្ទះ ដោយសារតែមានការព្រួយបារម្ភអំពីហានិភ័យនៃអសន្តិសុខ៕