ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកលោក Anatoly Antonov

ទីភ្នាក់ងារសារព័ត៌មាន TASS របស់រុស្ស៊ីបានរាយការណ៍ថា នៅថ្ងៃទី ២០ ខែមីនាឯកអគ្គរដ្ឋទូតរុស្ស៊ីប្រចាំសហរដ្ឋអាមេរិកលោក Anatoly Antonov បានចាកចេញពីអគារនៃស្ថានទូតរុស្ស៊ីនៅវ៉ាស៊ីនតោនឌីស៊ី ធ្វើដំណើរវិលត្រឡប់ទៅកាន់ទីក្រុងម៉ូស្គូវិញ ដើម្បីចូលរួមបណ្តាកិច្ចពិគ្រោះយោបល់ស្តីពីទំនាក់ទំនង រវាងប្រទេសទាំងពីរ។ លោក Anatoly Antonov បានវិលត្រឡប់មកទីក្រុងម៉ូស្គូវិញ តាមជើងហោះហើរ Airline Aeroflot ពីអាកាសយានដ្ឋានអន្តរជាតិ John Kennedy ក្នុងទីក្រុងញូវយ៉ក។

ថ្លែងទៅកាន់អ្នកសារព័ត៌មាននៅអាកាសយានដ្ឋាន លោកឯកអគ្គរដ្ឋទូត Anatoly Antonov  បានឲ្យដឹងថា ចាំបាច់ត្រូវវិភាគពីស្ថានភាពទំនាក់ទំនងរុស្ស៊ី - អាមេរិក ហើយរុស្ស៊ីតែងតែចាប់អារម្មណ៍ក្នុងការអភិវឌ្ឍទំនាក់ទំនងទ្វេភាគីជាមួយសហរដ្ឋអាមេរិក។ លោក Anatoly Antonov បានប្រកាសថា នឹងមានជំនួបចំនួននៅទីក្រុងម៉ូស្គូហើយ “ពិបាកប្រាប់” ជាមុន អំពីអំឡុងពេលស្នាក់នៅរបស់លោកនៅម៉ូស្គូ។

មុននេះ នៅថ្ងៃទី ១៧ ខែមីនា ក្រសួងការបរទេសរុស្ស៊ីបានប្រកាសថា ឯកអគ្គរដ្ឋទូតរុស្ស៊ីប្រចាំនៅសហរដ្ឋ អាមេរិកត្រូវបានកោះហៅឲ្យវិលត្រឡប់មកប្រទេសវិញដើម្បីពិគ្រោះយោបល់សំដៅ កំណត់ជំហានបន្ទាប់សម្រាប់ទំនាក់ទំនងរុស្ស៊ី - អាមេរិក៕