ទិដ្ឋភាពទូទៅមើលពីអាកាសនៅពេលយប់នៅរោងចក្រ Samsung ខេត្ត Bac Ninh (រូបថតៈ vietnamhoinhap.vn)

ដោយមានចម្ងាយប្រមាណ ៣០ គីឡូម៉ែត្រពីទីក្រុងហាណូយ ខេត្ត Bac Ninh ស្ថិតក្នុងក្រុមខេត្តភាគខាងជើងវៀតណាម ដែលមានហេដ្ឋារចនាសម្ព័ន្ធដឹកជញ្ជូន និងមានតំបន់ឧស្សាហកម្មទំនើបៗបំផុត និងជាតំបន់មានកម្លាំងពលករ     វ័យក្មេងដ៏ច្រើនសម្បូរបែបផងដែរ។ លើសពីនេះទៅទៀតវត្តមានរបស់សម្ព័ន្ធក្រុមហ៊ុន និងសហគ្រាសធំៗជាច្រើននៅលើពិភពលោកអស់រយៈពេល រាប់សិបឆ្នាំកន្លងមកដូចជា Samsung, Canon, Foxcon ជាដើម ក៏បាននិងកំពុងក្លាយទៅជាកត្តាសំខាន់ ដើម្បីធានាបរិយាកាសវិនិយោគប្រកបដោយសុវត្ថិភាព និងភាព ជំនាញវិជ្ជាជីវៈ។ ទោះបីជារងផលប៉ះពាល់យ៉ាងខ្លាំងពីការរីករាលដាលនៃជំងឺ Covid-19 ក៏ដោយ ប៉ុន្តែដោយមានបរិយាកាសអាជីវកម្មបើកចំហ ទីតាំងធ្វើពាណិជ្ជកម្មអំណោយផល និងហេដ្ឋារចនាសម្ព័ន្ធកាន់តែមានភាពប្រសើរឡើង ខេត្ត Bac Ninh នៅតែកំលាំងទាក់ទាញចំពោះវិនិយោគិននៅឆ្នាំ ២០២០ ។ លោក Nguyen Dinh Xuan ប្រធានមន្ទីរផែនការនិងវិនិយោគខេត្ត  Bac Ninh បានអោយដឹងថា៖ « ក្នុងដំណាក់កាល ២០១០-២០១៥ យើងខ្ញុំបានទាក់ទាញទុនវិនិយោគ ៨,៨ ពាន់លានដុល្លារអាមេរិក ហើយនៅក្នុងដំណាក់កាល ២០១៦-២០២០ យើងខ្ញុំក៏បានទាក់ទាញទុនវិនិយោគ ៨,៣ ពាន់លានដុល្លារអាមេរិកដែរ។ សូម្បីតែនៅឆ្នាំ ២០២០ ដែលជាឆ្នាំដ៏លំបាកសម្រាប់ពិភពលោក ក៏ដូចជាសម្រាប់ប្រទេសវៀតណាមដោយសារជំងឺរាតត្បាត Covid-19 ក៏ដោយ ប៉ុន្តែ ខេត្ត Bac Ninh យើងខ្ញុំក៏បានអនុវត្តរាល់ដំណោះស្រាយទាំងអស់ ដែលអាចធ្វើបាន ហើយយើងខ្ញុំបានទាក់ទាញដើមទុនវិយោគជិត ១ ពាន់លានដុល្លារអាមេរិក។ អាចនិយាយបានថានេះគឺជាចំណុចភ្លឺស្វាងមួយនៃការទាក់ទាញវិនិយោគផ្ទាល់ពីបរទេសរបស់ខេត្ត Bac Ninh ក្នុងរយៈពេលយូរអង្វែងផងដែរ»។

នាបច្ចុប្បន្ននេះ ខេត្ត Bac Ninh មានតំបន់ឧស្សាហកម្មសរុបចំនួន ១៦ ដែលត្រូវបានអនុម័តលើការកែសម្រួលនិងបំពេញបន្ថែមដោយនាយករដ្ឋមន្ត្រីវៀតណាម ក្នុងនោះមានតំបន់ឧស្សាហកម្មចំនួន ១០ ត្រូវបានដាក់ឱ្យដំណើរការផងដែរ។ ចំនួនអង្គភាពអាជីវកម្មដែលកំពុងប្រតិបត្តិការនៅលើផ្ទៃដីនៅតំបន់ឧស្សាហកម្ម របស់ខេត្តសម្រេចបានលើសពី ៨០% ។ ម្យ៉ាងវិញទៀត រួមជាមួយក្រុមតំបន់ឧស្សាហកម្មចំនួន ២៦ ដែលមានវត្តមាននៅលើផ្ទៃដីសរុបជិត ៩០០ ហិកតា ខេត្ត Bac Ninh កំពុងតែជាតំបន់ដែលមានផលិតកម្មធំ ដើម្បីស្វាគមន៍វិនិយោគិនក្នុងស្រុកនិងអន្តរជាតិផងដែរ។ លោក Bui Hoang Mai ប្រធានគណៈគ្រប់គ្រងតំបន់ឧស្សាហកម្មនៃខេត្ត Bac Ninh បានមានប្រសាសន៍ថា៖ «គណៈគ្រប់គ្រងនៃតំបន់ឧស្សាហកម្មខេត្ត Bac Ninh មានកន្លែងទទួលភ្ញៀវ ហើយទី ២ គឺ ប្រអប់អ៊ីម៉ែលអេឡិចត្រូនិចទាំងមូលរបស់ប្រធាននិងអនុប្រធានគណៈគ្រប់គ្រងតំបន់ឧស្សាហកម្ម ក៏ត្រូវបានបើកជាប្រចាំផងដែរ។ ហេតុដូច្នេះ រាល់នីតិវិធីរដ្ឋបាល និងអ្វីៗដែលទាក់ទងនឹងពាក្យបណ្តឹងតវ៉ា ក៏ត្រូវបាន គណៈគ្រប់គ្រងដោះស្រាយទាន់ពេលវេលា ហើយវិនិយោគិនបានវាយតម្លៃខ្ពស់ចំពោះការងារនេះតែម្តង។ នៅឆ្នាំ ២០២០ យើងខ្ញុំបានដោះស្រាយនីតិវិធីរដ្ឋបាលបញ្ជរតែមួយប្រមាណ ៤.៦០០ ច្បាប់។ ក្នុងនោះ ភាគច្រើនដោះស្រាយរាល់បញ្ហាទាន់ពេលវេលា ប្រមាណ ២០% មុនថ្ងៃផុតកំណត់»។

ទិដ្ឋភាពនៃតំបន់ឧទ្យានឧស្សាហកម្ម Yen Phong ( ខេត្ត Bac Ninh) ដែលជាតំបន់ប្រមូលផ្តុំសហគ្រាសវិនិយោគផ្ទាល់ពីបរទេសជាច្រើន (រូបថត៖ dangcongsan.vn)

ជារៀងរាល់ឆ្នាំ ខេត្ត Bac Ninh នៅតែមានការជួបជុំគ្នា និងការសន្ទនារវាងថ្នាក់ដឹកនាំខេត្តនិងសហគ្រាស ដោយមានការផ្លាស់ប្តូរថ្មីនូវវិធីសាស្រ្ត ទម្រង់ និងខ្លឹមសារនៃការងារជំរុញវិនិយោគ តាមទិសដៅផ្តោតសំខាន់លើការទាក់ទាញវិនិយោគ តភ្ជាប់ជាមួយនឹងការកសាងរូបភាពពិសេសៗរបស់ខេត្ត ដើម្បីទាក់ទាញគម្រោងធំៗ ហើយក៏បង្កើតការរីកសាយភាយទាក់ទាញគម្រោង «ផ្កាយរណបជំនួយ»ផ្សេងៗទៀតផងដែរ។ លោក Oh Jea Hyun នាយកក្រុមហ៊ុន Anyone Vina ប្រទេសកូរ៉េខាងត្បូងបានឲ្យដឹងថា ៖ «សម្រាប់ក្រុមហ៊ុនឬអង្គភាពអាជីវកម្មបរទេសណាក៏ដោយ នៅពេល ដំបូង ឡើយក៏ជួបការលំបាកខ្លាំងដែរ ក៏ប៉ុន្តែយើងខ្ញុំទទួលបានការសហការនិងការគាំទ្រជាច្រើនពីស្ថាប័នពាក់ព័ន្ធនានារបស់ខេត្ត Bac Ninh ។ ហេតុដូច្នេះ នៅពេលក្រុមហ៊ុនរបស់យើងកំពុងដំណើរការ ប្រសិនបើមានចម្ងល់ឬការលំបាកណាមួយទាក់ទងនឹងការងារ យើងខ្ញុំតែងតែទាក់ទងនិងសាកសួរជាមួយស្ថាប័នរដ្ឋ ដូចជាស្ថាប័នទទួលបន្ទុកពន្ធដារ និងស្ថាប័នពាក់ព័ន្ធនានា ហើយក៏ ទទួលបានការឆ្លើយតបយ៉ាងឆាប់រហ័ស ក៏ដជាជំនួយឧបត្ថម្ភយ៉ាងយកចិត្តទុកដាក់ផងដែរ»។

ជាមួយនឹងគោលនយោបាយនិងយន្តការច្នៃប្រឌិតថ្មី ខេត្ត Bac Ninh បានទាក់ទាញវិនិយោគិនជាច្រើនមកពីប្រទេសនិងតំបន់ដែនដីចំនួន ៣៧ ដែលមានខឿនផលិតកម្មឧស្សាហកម្មទំនើបនិងវឌ្ឍនភាពដូចជា ជប៉ុន កូរ៉េខាងត្បូង អឺរ៉ុបនិងអាមេរិកជាដើម។ ក្នុងនោះឧស្សាហកម្មអេឡិចត្រូនិកគឺជាវិស័យមុខព្រួញដ៏សែនសំខាន់ដែលមានសមាមាត្រស្មើនឹងជាង ៨០% នៃតម្លៃផលិតកម្មនៃឧស្សាហកម្មទាំងមូល។ ដើម្បីបង្កើតការចាប់អារម្មណ៍ដោយឥតឈប់ឈរក្នុងការទាក់ទាញវិនិយោគិនក្នុងស្រុកនិងបរទេស ខេត្ត Bac Ninh បន្តផ្តោតការយកចិត្តទុកដាក់យ៉ាងខ្លាំងលើការកែលម្អបរិយាកាសវិនិយោគតាមទិសមានអត្ថប្រយោជន៍ដល់វិនិយោគិន ប៉ុន្តែនៅតែសមស្របតាមបទប្បញ្ញត្តិនាបច្ចុប្បន្ននៃ ច្បាប់ និងផ្តល់អាទិភាពដល់គម្រោងដែលប្រើប្រាស់ដីធ្លីនិងកម្លាំងពលកម្មតិចជាដើមផងដែរ។

ពិតណាស់ថា ខេត្ត Bac Ninh សម្រេចបានសមិទ្ធិផលដ៏លេចធ្លោ មាន         សន្ទស្សន៍សេដ្ឋកិច្ចសង្គមជាច្រើន ស្ថិតក្នុងក្រុមឈានមុខគេនៅទូទាំងប្រទេស ព្រមទាំងបង្កើតឡើងគំរូឆ្នើម ក្នុងការទាក់ទាញការវិនិយោគផ្ទាល់ពីបរទេស។ ខេត្ត Bac Ninh មានបំណងក្លាយទៅជាខេត្តមួយដែលមានបរិយាកាសធុរកិច្ចនិងវិនិយោគបើកចំហរកាន់តែខ្លាំងឡើង ហើយការប្រកួតប្រជែងថ្នាក់ខេត្តឈរនៅលំដាប់កំពូលនៃប្រទេសវៀតណាម និងជាចំណុចភ្លឺស្វាងក្នុងការទាក់ទាញវិនិយោគបរទេសផងដែរ៕