នៅថ្ងៃដដែល ប្រព័ន្ធផ្សព្វផ្សាយរុស្ស៊ីបានដកស្រង់ប្រសាសន៍រដ្ឋមន្ត្រីការបរទេសហុងគ្រី លោក Peter Szijjarto ដែលបាននិយាយថា បណ្ដាប្រទេសជាសមាជិក EU បានឯកភាពគ្នាលើកញ្ចប់ទណ្ឌកម្មថ្មីប្រឆាំងនឹងរុស្ស៊ី។ ជាពិសេស ពលរដ្ឋចំនួន ៤៨ នាក់ រួមទាំងឧបនាយករដ្ឋមន្ត្រីមួយរូប និងប្រធានតំបន់មួយចំនួន និងក្រុមហ៊ុនរុស្ស៊ីចំនួន ៩ អង្គភាពត្រូវបានដាក់កំហិត។ លើសពីនេះទៅទៀត EU នឹងដាក់ទណ្ឌកម្មលើមាស និងរឹតបន្តឹងការធ្វើពាណិជ្ជកម្មលើទំនិញដែលប្រើប្រាស់បានទាំងក្នុងផ្នែកយោធា និងស៊ីវិល រឹតបន្តឹងបន្ថែមទៀតលើការទិញដូររបស់រដ្ឋាភិបាល និងការទទួលប្រាក់បញ្ញើ ហាមប្រាមសេវាកម្មគណនេយ្យ សវនកម្ម និងការផ្ដល់ប្រឹក្សា ។ ការដាក់កំហិតថ្មីទាំងនេះមិនប៉ះពាល់ដល់ប្រភពផ្គត់ផ្គង់ថាមពល និងធនាគារ Gazprombank ដែលតាមនោះអឺរ៉ុបអាចទូទាត់លើការផ្គត់ផ្គង់ឧស្ម័នរបស់រុស្ស៊ីផងដែរ៕