WHO៖ ពិភពលោកអាចនឹងខកខាន "សន្ធិសញ្ញាជំងឺរាតត្បាត"
(VOVWORLD) - កាលពីថ្ងៃទី ២២ ខែមករា អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus បានសម្តែងការព្រួយបារម្ភថា ប្រទេសជាច្រើនជុំវិញពិភពលោកអាចនឹងខកខានកាលបរិច្ឆេទក្នុងខែឧសភាឆ្នាំនេះ ដើម្បីកិច្ចព្រមព្រៀងស្តីពី "សន្ធិសញ្ញាជំងឺរាតត្បាត"មានលក្ខណៈចាប់បង្ខំផ្លូវច្បាប់ ដើម្បីធានាបាននូវការឆ្លើយតបប្រកបដោយប្រសិទ្ធភាពបន្ថែមទៀតក្នុងការប្រយុទ្ធប្រឆាំងនឹងជំងឺរាតត្បាតនាពេលអនាគត។
ថ្លែងនៅក្នុងកិច្ចប្រជុំក្រុមប្រឹក្សាប្រតិបត្តិរបស់ WHO នៅទីក្រុងហ្សឺណែវ (ស្វីស) អគ្គនាយក WHO បាននិយាយថា ប្រទេសជាច្រើនប្រហែលជាមិនអាចបំពេញការសន្យាខាងលើបានទេ ខណៈដែលនៅតែមានក្តីកង្វល់មួយចំនួនដែលត្រូវដោះស្រាយ។
 ការយកសំណាកធ្វើតេស្ត COVID-១៩ នៅទីក្រុង Richmond រដ្ឋ Virginia សហរដ្ឋអាមេរិក។ រូបថត៖ Getty Images/ TTXVN |
គិតត្រឹមដំណាច់ខែធ្នូឆ្នាំ២០២៣ តួលេខរបស់អង្គការសុខភាពពិភពលោកបានកត់ត្រាថាមនុស្សជាង ៧ លាននាក់បានស្លាប់ដោយសារ COVID-១៩។ បើទោះបីជាចំនួនអ្នកស្លាប់ដែលទាក់ទងនឹង COVID-១៩ មានការថយចុះគួរឱ្យកត់សម្គាល់បើប្រៀបធៀបទៅនឹងរយៈពេលខ្ពស់បំផុតក៏ដោយ ក៏នៅតែមានអ្នកស្លាប់ប្រហែល ១០ ០០០ នាក់ជារៀងរាល់ខែដោយសារជំងឺនេះនៅក្នុងប្រទេសចំនួន ៥០ ជុំវិញពិភពលោក។ កាលពីមុន ក្រុមប្រឹក្សាអនុសញ្ញាសុខភាពសាធារណៈសកលបានអំពាវនាវឱ្យមានការបង្កើត "សន្ធិសញ្ញាជំងឺរាតត្បាត" ថ្មីមួយដោយផ្អែកលើគោលការណ៍នៃសាមគ្គីភាព តម្លាភាព គណនេយ្យភាព និងយុត្តិធម៌ ហើយដើម្បីធ្វើវិសោធនកម្ម និងបន្ថែមបទប្បញ្ញត្តិសុខភាពអន្តរជាតិដែលមានស្រាប់។ សន្ធិសញ្ញាបែបនេះមានគោលបំណងជួយប្រទេសនានាក្នុងការគ្រប់គ្រងការរីរាលដាលនៃជំងឺរាតត្បាតឱ្យកាន់តែប្រសើរឡើង និងផ្តល់នូវការឆ្លើយតបប្រកបដោយប្រសិទ្ធភាពចំពោះជំងឺរាតត្បាតនាពេលអនាគត៕