យោងតាមទីភ្នាក់ងារសារព័ត៌មាន Shehab របស់ប៉ាឡេស្ទីនបានឲ្យដឹងថា នាថ្ងៃទី ២៩ឧសភា កងទ័ពអ៊ីស្រាអែលបានធ្វើការវាយប្រហារតាមជើងអាកាសជាច្រើនលើកនៅទូទាំងទីក្រុង Rafah ភាគខាងត្បូងតំបន់ហ្គាហ្សា ពីរបីម៉ោងបន្ទាប់ពីរថក្រោះអ៊ីស្រាអែលចូលដល់កណ្តាលទីក្រុងនេះ។ ប្រភពព័ត៌មានសន្តិសុខប៉ាឡេស្ទីនបានឲ្យដឹងថា កងទ័ពអ៊ីស្រាអែលក៏បានគ្រប់គ្រងភាគច្រើនច្រករបៀង Philadelphia ហើយកំពុងឈានចូលកាន់តែជ្រៅទៅក្នុងច្រករបៀងដែលនៅសល់ - ផ្នែកខាងលិចនៃទីក្រុង Rafah ។

ទីប្រឹក្សាសន្តិសុខជាតិអ៊ីស្រាអែល លោក Tzachi Hanegbi បានបញ្ជាក់ថា កងទ័ពរបស់ប្រទេសនេះបានគ្រប់គ្រង ៧៥% នៃច្រករបៀង Philadelphia ហើយបានឲ្យដឹងថា នឹងគ្រប់គ្រងតំបន់នេះទាំងមូលតាមពេលវេលា។ លោកក៏បានប្រកាសថា ការប្រយុទ្ធគ្នានៅតំបន់ហ្គាហ្សានឹងបន្តប្រព្រឹត្តិទៅយ៉ាងហោចណាស់ ៧ ខែទៀត។