លោកឯកអគ្គរដ្ឋទូត Vu Ho ប្រធានស្តីទី SOM អាស៊ានវៀតណាម។ (រូបថត៖ TTXVN)

កិច្ចប្រជុំមន្ត្រីជាន់ខ្ពស់នៃវេទិកាតំបន់អាស៊ាន (ARF) បានប្រព្រឹត្តទៅតាម ប្រព័ន្ធវីដេអូ នៅថ្ងៃទី៩ ខែមិថុនា ក្រោមអធិបតីភាពកម្ពុជា ដែលជាប្រធានអាស៊ាន ឆ្នាំ២០២២។ លោកឯកអគ្គរដ្ឋទូត Vu Ho ប្រធានស្តីទី SOM អាស៊ានវៀតណាមបាន ដឹកនាំគណៈប្រតិភូវៀតណាមចូលរួមកិច្ចប្រជុំនេះ។

ក្នុងកិច្ចប្រជុំ បណ្តាប្រទេសបានពិនិត្យមើលឡើងវិញ ហើយកត់សម្គាល់នូវ វឌ្ឍនភាពជាវិជ្ជមានក្នុងកិច្ចសហប្រតិបត្តិការនៃវេទិកាតំបន់អាស៊ាន នាពេលកន្លងមក ជាពិសេសការអនុវត្តន៍ផែនការសកម្មភាពទីក្រុងហាណូយទី២ (២០២០-២០២៥) ក៏ដូច ជាសកម្មភាពសហប្រតិបត្តិការដ៏ជាក់ស្ដែងនៃវេទិកាតំបន់អាស៊ាន ក្នុងវិស័យអាទិភាព នានាដូចជា ការទូតការពារ ការសង្គ្រោះគ្រោះមហន្តរាយ ការប្រយុទ្ធប្រឆាំងភេរវកម្ម និងបទល្មើសឆ្លងដែន សន្តិសុខសមុទ្រ សន្តិសុខតាមអ៊ីនធឺណិត ការប្រឆាំងការរីក សាយភាយនុយក្លេអ៊ែរ និងការរំសាយអាវុធ ក៏ដូចជាកិច្ចសហប្រតិបត្តិការការពារជាតិ និងការថែរក្សាសន្តិភាពផងដែរ។

ប្រទេសនានាបានចំណាយពេលវេលាច្រើនដើម្បីពិភាក្សាអំពីបញ្ហាក្ដៅគគុកក្នុងតំបន់ និងអន្តរជាតិនាពេលបច្ចុប្បន្ន។ ទាក់ទិននឹងបញ្ហាសមុទ្រខាងកើត បណ្តាប្រទេសបានសង្កត់ធ្ងន់លើសារៈសំខាន់នៃសន្តិភាព ស្ថិរភាព សន្តិសុខ សុវត្ថិភាព និងសេរីភាពខាងនាវាចរណ៍ និងអាកាសចរណ៍នៅសមុទ្រខាងកើត៕