អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកម្ពុជា លោក ជុំ សុន្ទរី បាននិយាយនៅថ្ងៃទី២ ខែមិថុនា ថា កម្ពុជាកំពុងត្រៀមរៀបចំដំណើរទស្សនកិច្ចលើកទី២ ទៅកាន់ប្រទេសមីយ៉ាន់ម៉ា របស់ប្រេសិតពិសេសរបស់ប្រធានសមាគមប្រជាជាតិអាស៊ីអាគ្នេយ៍ (អាស៊ាន)។ ដំណើរទស្សនកិច្ចនេះត្រូវបានគេរំពឹងថានឹងធ្វើឡើងនៅចុងខែមិថុនា ឬដើមខែកក្កដា។ ដំណើរទស្សនកិច្ចនេះធ្វើឡើងដោយ ចំណុចសំខាន់ចំនួនពីរគឺត្រួតពិនិត្យ ការអនុវត្តការប្តេជ្ញាចិត្តរបស់រដ្ឋាភិបាលយោធាមីយ៉ាន់ម៉ាក្នុងអំឡុងពេលកិច្ចប្រជុំពិគ្រោះយោបល់ស្តីពីការគាំទ្រមនុស្សធម៌ដែលបានធ្វើឡើងនៅរាជធានីភ្នំពេញនៃប្រទេសកម្ពុជា នៅថ្ងៃទី៦ ខែឧសភា កន្លងមកនេះ; បង្កើតបរិយាកាសអំណោយផលសម្រាប់កិច្ចសន្ទនានយោបាយដ៏ទូលំទូលាយរវាងភាគីនានា ដោយរៀបចំកិច្ចប្រជុំមួយជាមួយក្រុមប្រឹក្សាអភិបាលកិច្ចរដ្ឋមីយ៉ាន់ម៉ា អង្គការកងកម្លាំងប្រដាប់អាវុធជាតិ និងភាគីពាក់ព័ន្ធទាំងអស់។

លើសពីនេះ លោក ជុំ សុន្ទរី ក៏បានបញ្ជាក់ផងដែរថា ដំណើរទស្សនកិច្ចលើកដំបូងរបស់បេសកជនពិសេសលោក ប្រាក់ សុខុន ទៅកាន់ប្រទេសមីយ៉ាន់ម៉ា បានជួយអាស៊ានឱ្យយល់កាន់តែច្បាស់អំពីស្ថានភាពបច្ចុប្បន្ននៅក្នុងប្រទេសមីយ៉ាន់ម៉ា ហើយពីទីនោះអាចឈានដល់ដំណោះស្រាយសមស្រប ដើម្បីនាំមកនូវវឌ្ឍនភាពក្នុងការអនុវត្តអាទិភាពចំនួន ៣របស់អាស៊ាន គឺ បញ្ឈប់អំពើហឹង្សា; ធានានូវការផ្តល់ជំនួយមនុស្សធម៌ទាន់ពេលវេលា និងបង្កើតបរិយាកាសអំណោយផលសម្រាប់ការសន្ទនានយោបាយដ៏ទូលំទូលាយមួយ ដើម្បីដោះស្រាយវិបត្តិនៅក្នុងប្រទេសមីយ៉ាន់ម៉ា៕