បេក្ខជននាំមុខពីររូបក្នុងការប្រកួតប្រជែងសម្រាប់ការបោះឆ្នោតប្រធានាធិបតី Türkiye  (រូបថត៖ skynewsarabia)

នៅក្នុងបញ្ជីបេក្ខជនប្រកាសបេក្ខភាពប្រធានាធិបតីមានឈ្មោះចំនួន ៣ ប៉ុន្តែតាមពិត នេះគ្រាន់តែជា "ការប្រណាំងសេះពីរ"  រវាងប្រធានាធិបតីដែលកំពុងកាន់អំណាច Recep Tayyip Erdogan ដែលជាមេដឹកនាំគណបក្សយុត្តិធម៌ និងអភិវឌ្ឍន៍ (AKP) និង លោក Kemal Kilicdaroglu - មេដឹកនាំគណបក្សសាធារណៈរដ្ឋ (CHP) ដែលជាគណបក្សប្រឆាំងដ៏ធំបំផុតនៅទួរគី។

នៅក្នុងសេចក្តីថ្លែងការណ៍យុទ្ធនាការមួយ ប្រធានាធិបតីដែលកំពុងកាន់អំណាច លោក Tayyip Erdogan បានសន្យាថា រដ្ឋាភិបាលថ្មីនឹងដាក់កិច្ចខិតខំប្រឹងប្រែងទាំងអស់របស់ខ្លួនក្នុងការដោះស្រាយវិបត្តិសេដ្ឋកិច្ច ការកសាងលំនៅដ្ឋានសម្រាប់ប្រជាជនដែលមានប្រាក់ចំណូលទាប និងកាត់បន្ថយអត្រាអតិផរណាដែលស្ថិតនៅខាងក្រៅការគ្រប់គ្រងក្នុងរយៈពេលយូរ។ មួយវិញទៀត បេក្ខភាព Kilicdaroglu បានចូលក្នុងការបោះឆ្នោតជាមួយនឹងពាក្យស្លោក "វិបុលភាព សន្តិភាព និងសុភមង្គល" ហើយបានសន្យាថានឹងផ្លាស់ប្តូរវិធីដឹកនាំរបស់ប្រទេស។

មុនពេលលទ្ធផលត្រូវបានប្រកាស តើអ្នកណានឹងឈ្នះនៅតែចាត់ទុកថាជាអាថ៌កំបាំង ព្រោះសមាមាត្រនៃការគាំទ្ររបស់បេក្ខជនទាំងពីរមានតុល្យភាព។ គណៈកម្មាធិការរៀបចំការបោះឆ្នោតកំពូលរបស់ទួរគីបានឲ្យដឹងថា លទ្ធផលបឋមនៃការបោះឆ្នោតត្រូវបានប្រកាសនាយប់ថ្ងៃទី ១៤ ឧសភា។

យោងតាមអ្នកសង្កេតការណ៍ អ្នកណាឈ្នះតំណែងប្រធានាធិបតីថ្មីក៏ដោយ ក៏នឹងត្រូវទទួលនូវ "បេសកកម្ម" ដ៏លំបាកបំផុតមួយ ពោលគឺនាំសេដ្ឋកិច្ចទួរគីចេញពីវិបត្តិ ជាពិសេសការកសាងប្រទេសឡើងវិញ បន្ទាប់ពីគ្រោះរញ្ជួយដី។ ទន្ទឹមនឹងនោះ ទាក់ទងនឹងកិច្ចការបរទេស ការបោះឆ្នោតនេះនឹងជះឥទ្ធិពលយ៉ាងខ្លាំងដល់តំបន់ ព្រោះទួរគីដើរតួយ៉ាងសំខាន់ និងសកម្មក្នុងកិច្ចចរចា Astana ស្តីពីស៊ីរី ដែលឧបត្ថម្ភដោយរុស្ស៊ី ទួរគី និងអ៊ីរ៉ង់។ ទីក្រុងអង់ការ៉ាក៏បានដើរតួនាទីយ៉ាងសំខាន់ក្នុងការចរចាររុស្ស៊ី-អ៊ុយក្រែនលើបញ្ហាស្បៀងអាហារពីអ៊ុយក្រែនឆ្លងតាមរយៈទួរគីទៅកាន់មជ្ឈិមបូព៌ា និងអាហ្វ្រិក។ ការបោះឆ្នោតនេះក៏កំណត់រូបរាង នូវបញ្ហាមួយចំនួននៅក្នុងគោលនយោបាយការបរទេសរបស់ទីក្រុងអង់ការ៉ា ដូចជា៖ តួនាទីរបស់ទួរគីនៅក្នុងអង្គការសន្ធិសញ្ញាអាត្លង់ទិកខាងជើង (NATO); ទំនាក់ទំនងជាមួយសហភាពអឺរ៉ុប (EU) សហរដ្ឋអាមេរិក និងរុស្ស៊ី; គោលនយោបាយការធ្វើចំណាកស្រុក; ភាពតានតឹងនៅសមុទ្រមេឌីទែរ៉ាណេខាងកើត…ជាដើម៕