ជម្លោះរវាងរុស្ស៊ីនិងអ៊ុយក្រែននៅតែបន្ត។ រូបថត៖ Reuters

នៅក្នុងកិច្ចពិភាក្សានោះ ប្រតិភូការទូតអាហ្រ្វិកបានអំពាវនាវឱ្យរុស្ស៊ី និងអ៊ុយក្រែន ចូលមកតុចរចាដើម្បីបញ្ឈប់ជម្លោះឱ្យបានឆាប់តាមដែលអាចធ្វើទៅបាន ហើយអាហ្វ្រិកមានបំណងចង់ក្លាយជាអ្នកសម្រុះសម្រួលក្នុងដំណើរការស្វែងរកសន្តិភាពនេះ។ គណៈប្រតិភូអាហ្រ្វិកបានស្នើផែនការសន្តិភាពដែលផ្តោតលើចំណុចសំខាន់ៗចំនួន ១០ រួមទាំងកិច្ចចរចាការទូតឱ្យបានឆាប់តាមដែលអាចធ្វើទៅបាន; កាត់បន្ថយសកម្មភាពធ្វើឲ្យជម្លោះឡើងជណ្ដើរពីភាគីទាំងពីរ; ធានាអធិបតេយ្យភាពជាតិ និងជាតិសាសន៍ ស្របតាមធម្មនុញ្ញអង្គការសហប្រជាជាតិ; ធានាសន្តិសុខសម្រាប់ប្រទេសទាំងអស់; ធានាការដឹកជញ្ជូនគ្រាប់ធញ្ញជាតិ និងជីរបស់ភាគីទាំងពីរុស្ស៊ី និងអ៊ុយក្រែន; ការផ្លាស់ប្តូរឈ្លើយសឹក; ការកសាងឡើងវិញក្រោយសង្គ្រាម និងគាំទ្រដល់ជនរងគ្រោះដោយសារសង្គ្រាម។

រីឯខ្លួនវិញ ប្រធានាធិបតីរុស្ស៊ី លោក Vladimir Putin បានបញ្ជាក់ថា ទីក្រុងម៉ូស្គូបានត្រៀមខ្លួនជាស្រេច សម្រាប់រាល់កិច្ចសន្ទនាមានលក្ខណៈស្ថាបនាជាមួយភាគីទាំងអស់ដែលចង់បានសន្តិភាព ដោយឈរលើគោលការណ៍យុត្តិធម៌ និងគិតគូរពីផលប្រយោជន៍ស្របច្បាប់របស់គ្រប់ភាគីទាំងអស់ ហើយនឹងពិចារណាលើសំណើណាមួយពីបណ្តាប្រទេសអាហ្វ្រិកដើម្បីដោះស្រាយបញ្ហានៅអ៊ុយក្រែន។ ប្រធានាធិបតីរុស្ស៊ីបានវាយតម្លៃខ្ពស់ចំពោះវិធីសាស្រ្តអភិក្រមប្រកបដោយតុល្យភាពរបស់មេដឹកនាំសហភាពអាហ្វ្រិកចំពោះស្ថានភាពនៅអ៊ុយក្រែន៕