ប្រធានរដ្ឋគុយបា លោក Miguel Diaz-Canel

នៅសារបង្ហោះលើបណ្តាញ Twitter មេដឹកនាំគុយបាបានរិះគន់ទីក្រុងវ៉ាស៊ីន តោនដែលបន្តអនុវត្ត បទដាក់ទណ្ឌកម្មដែលប៉ះពាល់ផ្ទាល់ ដល់ប្រជាជនគុយបា ខណៈពេលដែល ប្រជាជនអាមេរិកកំពុងរងផលប៉ះពាល់យ៉ាងធ្ងន់ធ្ងរពីជំងឺរាតត្បាត COVID-19 និងការកើនឡើងនៃការរើសអើងជាតិសាសន៍។

មុននេះរដ្ឋមន្ត្រីការបរទេសគុយបា លោក Bruno Rodriguez ក៏បានសម្តែងការប្រឆាំងជំទាស់នឹងការបង្កើនទណ្ឌកម្មរបស់អាមេរិកលើអង្គធាតុមួយចំនួនរបស់គុយបា ដែលយោងតាមលោករូបនេះថា បទដាក់ទណ្ឌកម្មទាំងនេះ មានបំណងធ្វើបាបប្រជាជនគុយបា ក្នុងបរិបទនៃជំងឺរាតត្បាត COVID-19 ប៉ុណ្ណោះ។

សូមគូសបញ្ជាក់ថា ក្រសួងការបរទេសសហរដ្ឋអាមេរិកនៅថ្ងៃទី ៣ ខែមិថុនា បានប្រកាសដាក់បញ្ចូលអង្គធាតុរបស់គុយបាចំនួន ៧ បន្ថែមទៀត ទៅក្នុងបញ្ជីក្រុមហ៊ុនជាង ២០០ ដែលស្ថិតក្រោមការដាក់ទណ្ឌកម្មរបស់ខ្លួន។ តាមនោះ អង្គធាតុរបស់គុយបាទាំងនេះ នឹងរងបទដាក់ទណ្ឌកម្ម ដោយហាមឃាត់ទំនាក់ទំនងហិរញ្ញវត្ថុនិងហាមមិនឲ្យធ្វើការរកស៊ីជាមួយបុគ្គលនិងក្រុមហ៊ុនណាមួយរបស់អាមេរិកឡើយ៕