ជម្លោះហាម៉ាស - អ៊ីស្រាអែល ៖ អេហ្ស៊ីបនិងអារ៉ាប៊ីសាអូឌីតអះអាងពីភាពចាំបាច់នៃការសម្រេចបានបទឈប់បាញ់ជាបន្ទាន់នៅតំបន់ហ្គាហ្សា
(VOVWORLD) - នៅក្នុងកិច្ចសន្ទនាតាមទូរស័ព្ទកាលពីថ្ងៃទី ១ ខែកញ្ញា ប្រធានាធិបតីអេហ្ស៊ីប លោក Abdel-Fattah El-Sisi និងនាយករដ្ឋមន្ត្រីអារ៉ាប៊ីសាអូឌីត លោក Mohammed bin Salman បានពិភាក្សាអំពីការវិវត្តថ្មីបំផុតនៅក្នុងទឹកដីប៉ាឡេស្ទីន ក៏ដូចជាវិធីពង្រឹងសកម្មភាពរួម ដើម្បីឆ្លើយតបទៅនឹងបញ្ហាប្រឈម ដែលប៉ះពាល់ដល់សន្តិសុខនិងសន្តិភាពក្នុងតំបន់។
យោងតាមសេចក្តីប្រកាសរបស់វិមានប្រធានាធិបតីអេហ្ស៊ីប លោក El-Sisi និងលោក bin Salman បានសង្កត់ធ្ងន់លើភាពចាំបាច់នៃការសម្រេចបានបទឈប់បាញ់ជាបន្ទាន់នៅតំបន់ហ្គាហ្សា និងបញ្ឈប់ស្ថានភាពឡើងជណ្ដើរក្នុងតំបន់ West Bank សំដៅទប់ស្កាត់ជម្លោះរីករាលដាលបន្ថែមទៀត និងស្តារស្ថិរភាពនៅមជ្ឈិមបូព៌ាឡើងវិញ។
 គំនរបែកបាក់ដែលបង្កឡើងដោយជម្លោះហាម៉ាស-អ៊ីស្រាអែល នៅក្នុងក្រុង Deir al-Balah តំបន់ហ្គាហ្សា ថ្ងៃទី ៣០ ខែសីហា ឆ្នាំ ២០២៤។ រូបថត៖ THX/TTXVN |
លោក El-Sisi និងលោក bin Salman ក៏បានលើកឡើងពីសារៈសំខាន់នៃការពង្រឹងកិច្ចសហប្រតិបត្តិការរវាងប្រទេសអារ៉ាប់ ដើម្បីដោះស្រាយបញ្ហាប្រឈមនានាដែលគំរាមកំហែងដល់សន្តិសុខ និងសន្តិភាពក្នុងតំបន់។ អេហ្ស៊ីប រួមជាមួយកាតានិងសហរដ្ឋអាមេរិកកំពុងដឹកនាំកិច្ចខិតខំប្រឹងប្រែងសម្រុះសម្រួលដើម្បីសម្រេចបាននូវកិច្ចព្រមព្រៀងបទឈប់បាញ់ និងការផ្លាស់ប្តូរចំណាប់ខ្មាំងរវាងអ៊ីស្រាអែលនិងក្រុមហាម៉ាស់ ជាមួយនឹងគោលដៅនៃការសម្រេចបានបទឈប់បាញ់ជាអចិន្ត្រៃយ៍នៅតំបន់ហ្គាហ្សា។ យោងតាមអាជ្ញាធរសុខាភិបាលនៅតំបន់ហ្គាហ្សា ជម្លោះអូសបន្លាយជិត ១១ ខែរវាងអ៊ីស្រាអែល និងក្រុមហាម៉ាសបានឆក់យកអាយុជីវិតរបស់ប្រជាជនប៉ាឡេស្ទីនចំនួន ៤០.៧៣៨នាក់៕