ផ្សែងហុយឡើងបន្ទាប់ពីកងកម្លាំងអ៊ីស្រាអែលបានទម្លាក់គ្រាប់បែកលើទីក្រុង Khan Yunis ភាគខាងត្បូង Gaza Strip កាលពីថ្ងៃទី៩ ខែធ្នូ ឆ្នាំ២០២៣។ រូបថត៖ AFP/TTXVN

អាជ្ញាធរប៉ាឡេស្ទីន និងប្រទេសជាច្រើនកាលពីថ្ងៃទី ៩ ធ្នូ បានសម្តែងការព្រួយបារម្ភថា ស្ថានភាពជម្លោះរវាងកងកម្លាំងហាម៉ាស់ និងកងកម្លាំងអ៊ីស្រាអែលនឹងកាន់តែអាក្រក់ទៅៗ បន្ទាប់ពីសហរដ្ឋអាមេរិកបានបោះឆ្នោតវេតូលើសេចក្ដីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិ អំពាវនាវឱ្យមានបទឈប់បាញ់នៅក្នុងតំបន់ហ្គាហ្សា។

ប្រធានាធិបតីប៉ាឡេស្ទីនលោក Mahmoud Abbas ជំទាស់នឹងសេចក្តីសម្រេចរបស់អាមេរិក ហើយមានការព្រួយបារម្ភថា ចំនួនកុមារ ស្ត្រី និងមនុស្សចាស់ប៉ាឡេស្ទីនត្រូវស្លាប់នៅតែបន្តកើនឡើងនៅក្នុងតំបន់ហ្គាហ្សា។ ទន្ទឹមនឹងនោះ នាយករដ្ឋមន្ត្រីប៉ាឡេស្ទីនលោក Mohammad Shtayyeh ក៏បានបញ្ចេញប្រតិកម្មស្រដៀងគ្នា និងបានអំពាវនាវដល់ប្រទេសសមាជិកក្រុមប្រឹក្សាសន្តិសុខអង្គការសហប្រជាជាតិបន្តទប់ស្កាត់ជម្លោះនៅតំបន់ហ្គាហ្សា ស្វែងរកមធ្យោបាយដឹកជញ្ជូនទំនិញសង្គ្រោះ និងស្តារជីវភាពរស់នៅឡើងវិញនៅតំបន់ហ្គាហ្សា។

នាថ្ងៃដដែល រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បានព្រមានអំពីហានិភ័យនៃស្ថានការណ៍នៅមជ្ឈិមបូព៌ា “ផ្ទុះឡើងដោយមិនអាចគ្រប់គ្រងបាន” បន្ទាប់ពីទង្វើរបស់អាមេរិក។ រដ្ឋមន្ត្រីការបរទេស Abdollahian ក៏បានអំពាវនាវឱ្យបើកជាបន្ទាន់នូវច្រកព្រំដែន Rafah ដែលតភ្ជាប់តំបន់ ហ្គាហ្សាជាមួយប្រទេសអេហ្ស៊ីប ដើម្បីអនុញ្ញាតឱ្យនាំទំនិញមនុស្សធម៌ចូលទៅក្នុងទឹកដីដែលត្រូវបានរារាំងនេះ៕