របាយការណ៍បច្ចុប្បន្នភាពអំពីម៉ាក្រូសេដ្ឋកិច្ចវៀតណាមប្រចាំខែមេសា ឆ្នាំ ២០២២ ដែលទើបបានប្រកាសដោយធនាគារពិភពលោក (WB) បានវាយតម្លៃខ្ពស់ចំពោះសមិទ្ធិផលក្នុងការអភិវឌ្ឍសេដ្ឋកិច្ចរបស់វៀតណាមក្នុងត្រីមាសទី១ ឆ្នាំ ២០២២។ តាមនោះ របាយការណ៍បានកត់ត្រាថា ផលិតផលក្នុងស្រុកសរុប (GDP) ក្នុងត្រីមាសទីមួយនៃឆ្នាំ ២០២២ បានកើនឡើង ៥% បើធៀបនឹងរយៈពេលដូចគ្នាកាលពីឆ្នាំមុន អាស្រ័យលើលទ្ធផលដ៏រឹងមាំពីឧស្សាហកម្មកែច្នៃនិងបង្កើត ជាមួយនឹងវិស័យសេវាកម្មដែលកំពុងស្ដារឡើងវិញផងដែរ។

ធនាគារពិភពលោកបានសង្កត់ធ្ងន់ថា ចំនួននៃការឆ្លងជំងឺ កូវីដ-១៩ ដែលត្រូវបានកត់ត្រា និងចំនួនករណីស្លាប់ពាក់ព័ន្ធបានចាប់ផ្តើមថយចុះនៅក្នុងខែមីនា ដូច្នេះសេដ្ឋកិច្ចវៀតណាមមានសញ្ញាវិជ្ជមានជាច្រើនដូចជាសន្ទស្សន៍ផលិតកម្មឧស្សាហកម្មបានបន្តកើនឡើង ហើយការលក់រាទំនិញយសរុបបន្តស្ដារឡើងវិញ។ យោងតាមធនាគារពិភពលោក សន្ទស្សន៍ផលិតកម្មឧស្សាហកម្មបានកើនឡើង ៨,៥% (បើធៀបនឹងរយៈពេលដូចគ្នាកាលពីឆ្នាំមុន) ក្នុងខែមីនា ដែលស្មើនឹងកម្រិតមុនការផ្ទុះឡើងនៃជំងឺរាតត្បាត អាស្រ័យលើការស្ដារឡើងវិញនូវតម្រូវការក្នុងស្រុក និងតម្រូវការរឹងមាំពីតំបន់សេដ្ឋកិច្ចបរទេស។ វិស័យដ៏ស្វាហាប់បំផុត រួមមាន គ្រឿងម៉ាស៊ីន បរិក្ខារអេឡិចត្រូនិច សម្លៀកបំពាក់ ស្បែកជើង និងភេសជ្ជៈ សុទ្ធតែសម្រេចបានកំណើនពីរខ្ទង់។ ការនាំចេញ និងនាំចូលទំនិញក៏កើនឡើង ១៤,៨% និង ១៤,៦% (បើធៀបនឹងរយៈពេលដូចគ្នាកាលពីឆ្នាំមុន) ផងដែរ។

ចំណុចភ្លឺមួយទៀតដែលត្រូវបាន WB លើកឡើងនោះ គឺដើមទុន FDI ចុះបញ្ជីបានឈានដល់កម្រិត ៣,៩ ពាន់លានដុល្លាអាមេរិកក្នុងខែមីនា ឆ្នាំ ២០២២កើនឡើង ៣៥,២% បើធៀបនឹងខែមុន។ ប្រការនេះបង្ហាញថា វៀតណាមនៅតែជាគោលដៅគួរឲ្យទាក់ទាញសម្រាប់លំហូរទុន FDI៕