នាថ្ងៃទី ៦ ខែធ្នូ នៅក្នុងកិច្ចប្រជុំគណៈរដ្ឋមន្ត្រី ប្រធានាធិបតីបារាំងលោក Emmanuel Macron បានស្នើឲ្យភាគីប្រឆាំងគប្បីអំពាវនាវឲ្យប្រជាជនរក្សាភាពស្ងប់ស្ងាត់។ នាយករដ្ឋមន្រ្តី លោក Edouard Philippe ក៏បានសង្កត់ធ្ងន់ក្នុងបទថ្លែងទៅកាន់សភាជាន់ទាបផងដែរ។

ដើម្បីប្រឆាំងជំទាស់នឹងរលកអំពើហឹងក្សាថ្មីនោះ ប្រធានាធិបតីបារាំងលោក Emmanuel Macron បានអំពាវនាវឲ្យភាគីប្រឆាំងមានការទទួលខុសត្រូវ។ លោកបានសង្តត់ធ្ងន់ថា មុខសញ្ញាមួយចំនួនកំពុងប្រដេញតាមគោលដៅតែមួយគត់គឺ វាយប្រហារលើខឿនសាធារណរដ្ឋ។ លោកក៏បាន ថ្កោលទោសចំពោះ ការសមគំនិត និងឆ្លៀតយកឱកាស របស់អ្នកគាំទ្រសកម្មភាពបំផ្លិចបំផ្លាញខឿនសាធារណរដ្ឋនេះ ដែលកំពុងកើតមានឡើងតាមរយៈប្រព័ន្ធផ្សព្វផ្សាយកាន់តែច្រើនផងដែរ៕