ប្រធានាធិបតីអ៊ុយក្រែនលោក Volodymyr Zelensky  (រូបថត៖ AP)

នៅក្នុងការដាក់ទណ្ឌកម្មលើកដំបូង មានពលរដ្ឋរុស្ស៊ីនិងបេឡារុស្សចំនួន ៨៧ នាក់ ដែលក្នុងនោះមានអត្តពលិកល្បីៗរបស់រុស្ស៊ី ក៏ដូចជារដ្ឋមន្ត្រីក្រសួងកីឡានិងទេសចរណ៍បេឡារុស្ស លោក Sergei Kovalchuk ផងដែរ។ ក្រឹត្យដាក់ទណ្ឌកម្មទីពីររួមមានអង្គការ និងសហគ្រាសចំនួន ២៥៤ ដែលទាក់ទងនឹងឧស្សាហកម្មការពារជាតិ និងសន្តិសុខរបស់រុស្ស៊ី ក៏ដូចជាអ្នកផ្តល់សេវាអ៊ីនធឺណែត។ បញ្ជីនេះ រួមបញ្ចូលទាំងក្រុមហ៊ុនល្បីៗរបស់រុស្ស៊ី ដូចជា "Yandex" និង "Rambler" ក៏ដូចជាក្រុមហ៊ុន "Intermeh" របស់បេឡារុស្សផងដែរ។

មុននោះ នាថ្ងៃទី ១ មេសា ប្រធានាធិបតី Zelensky បានដាក់ទណ្ឌកម្មលើជនជាតិរុស្ស៊ីចំនួន ៣៣នាក់ និងក្រុមហ៊ុនរុស្ស៊ីចំនួន ២២៥។ ការរឹតបន្តឹងរួមមានការបង្កកទ្រព្យសកម្ម ការបិទការជួញដូរ ការដកហូតអាជ្ញាប័ណ្ណ និងការរឹតបន្តឹងផ្សេងទៀត សរុបចំនួន ១១ វិធានការ៕