យោងតាមការសន្យានោះ ប្រទេសម្ចាស់ផ្ទះនៃ COP២៨ គឺអេមីរ៉ាតអារ៉ាប់រួម (UAE) បានចូលរួមចំណែកទឹកប្រាក់ចំនួន ១០០ លានដុល្លារអាមេរិក ហើយមូលនិធិ Bill and Melinda Gates Foundation ក៏បានបរិច្ចាគ ១០០ លានដុល្លារផងដែរ។ ការរួមវិភាគទានដែលនៅសេសសល់ជារបស់អង្គការនានាក្នុងប្រទេសបែលហ្សិក អាល្លឺម៉ង់ អាមេរិក។ នេះជាផ្នែកមួយនៃកិច្ចខិតខំប្រឹងប្រែងរបស់សហគមន៍អន្តរជាតិដើម្បីឆ្លើយតបទៅនឹងបញ្ហាសុខភាព ទាក់ទងនឹងការប្រែប្រួលអាកាសធាតុ។

យោងតាមអ្នកជំនាញផ្នែកសុខាភិបាល បន្ទុកនៃជំងឺត្រូពិចនឹងកាន់តែអាក្រក់ទៅៗ នៅពេលដែលភពផែនដីឡើងកំដៅ រួមជាមួយនឹងការគំរាមកំហែងសុខភាពទាក់ទងនឹងអាកាសធាតុ ដូចជាកង្វះអាហារូបត្ថម្ភ គ្រុនចាញ់ និងជំងឺរាគរូស។ ជាក់ស្តែង ការប្រែប្រួលអាកាសធាតុបានបង្កឲ្យមានការកើនឡើងនៃករណីកង្វះអាហារូបត្ថម្ភ គ្រុនចាញ់ និងរាគរូស នៅតំបន់មួយចំនួន។ ជាឧទាហរណ៍ ទឹកជំនន់យ៉ាងធ្ងន់ធ្ងរនៅប្រទេសប៉ាគីស្ថានកាលពីឆ្នាំមុនបានបណ្តាលឱ្យចំនួនករណីជំងឺគ្រុនចាញ់នៅទីនេះ នឡើង ៤០០%។ អគ្គនាយកអង្គការសុខភាពពិភពលោក (WHO) លោក Tedros Adhnom Ghebreyus បានព្រមានថា៖ "ចំនួនករណីស្លាប់ដោយសារកំដៅនៅក្នុងមនុស្សដែលមានអាយុលើសពី ៦៥ឆ្នាំបានកើនឡើង ៧៥% នៅទូទាំងពិភពលោកក្នុងរយៈពេលពីរទសវត្សរ៍កន្លងមកនេះ។ ជារៀងរាល់ឆ្នាំមនុស្ស ៧ លាននាក់បានស្លាប់ដោយសារតែការបំពុលបរិស្ថាន។ ការប្រែប្រួលអាកាសធាតុដោយសារសកម្មភាពមនុស្ស និងការប្រើប្រាស់ឥន្ធនៈហ្វូស៊ីល បាននាំឱ្យមានការផ្ទុះជំងឺរាគរូសយ៉ាងច្រើននៅជុំវិញពិភពលោក។ ការឡើងកំដៅផែនដីក៏ពង្រីកប្រភេទមូសដែលផ្ទុកមេរោគដ៏គ្រោះថ្នាក់ដូចជា៖ គ្រុនឈាម គ្រុនក្តៅលឿង... នៅក្នុងតំបន់ដែលជំងឺទាំងនេះមិនធ្លាប់មានពីមុនមក”។

ក្រៅពីជំងឺត្រូពិច ការឡើងកំដៅផែនដីក៏បង្កើនភ្លើងឆេះព្រៃ បង្កឱ្យមានធូលីនិងផ្សែងដ៏គ្រោះថ្នាក់សម្រាប់អ្នកដែលមានជំងឺផ្លូវដង្ហើម។ ដូចនៅប្រទេសកាណាដាក្នុងឆ្នាំនេះ កុមារជាច្រើនដែលមានជំងឺហឺតបានស្លាប់ដោយសារស្រូបផ្សែងពីភ្លើងឆេះព្រៃ៕