ឯកអគ្គរដ្ឋទូតវៀតណាមប្រចាំនៅសិង្ហបុរីលោក Mai Phuoc Dung (រូបថត៖ VNA)

ដំណើរទស្សនកិច្ចផ្លូវរដ្ឋនៅវៀតណាមចាប់ពីថ្ងៃទី ១៦ ដល់ថ្ងៃទី ២០ ខែតុលា របស់ប្រធានាធិបតីសិង្ហបុរីលោកស្រី Halimah Yacob និងស្វាមីគឺសំដៅលើកកំពស់ទំនាក់ទំនងទ្វេភាគី និងធ្វើឲ្យស៊ីជម្រៅថែមទៀតទំនាក់ទំនងភាពជាដៃគូយុទ្ធសាស្ត្ររវាងប្រទេសទាំងពីរ។ នេះជាការបញ្ជាក់របស់ឯកអគ្គរដ្ឋទូតវៀតណាមប្រចាំនៅសិង្ហបុរីលោក Mai Phuoc Dung ក្នុងបទសំភាសន៍ជាមួយទីភ្នាក់ងារសារព័ត៌មានវៀតណាមប្រចាំនៅសិង្ហបុរីអំពីអត្ថន័យនៃដំណើរទស្សនកិច្ចនេះ។

លោកឯកអគ្គរដ្ឋទូត Mai Phuoc Dung បានសង្កត់ធ្ងន់ថា ដំណើរទស្សនកិច្ចនេះមិនត្រឹមតែរឹតបន្តឹងទំនាក់ទំនងនយោបាយដ៏ល្អប្រសើរ និងរឹងមាំរវាងប្រទេសទាំងពីរប៉ុណ្ណោះទេ ថែមទាំងជំរុញពាណិជ្ជកម្ម និងវិនិយោគ រួមចំណែកធ្វើឱ្យសិង្ហបុរីបន្តក្លាយជា វិនិយោគិនធំជាងគេនៅវៀតណាម ពីមួយឆ្នាំទៅមួយឆ្នាំ និងកំណើនពាណិជ្ជកម្មទ្វេភាគីខ្ពស់។ លោកឯកអគ្គរដ្ឋទូតបានមានប្រសាសន៍ថា គិតត្រឹមដំណាច់ខែសីហា ឆ្នាំ២០២២ ការវិនិយោគសរុបរបស់សិង្ហបុរីនៅវៀតណាមមានទឹកប្រាក់ជាង ៤,៥ ពាន់លានដុល្លារអាមេរិក ហើយពាណិជ្ជកម្មទ្វេភាគីរវាងប្រទេសទាំងពីរសម្រេចបានប្រមាណ ១៥ ពាន់លានដុល្លារអាមេរិក កើនឡើងជិត ២៥% បើធៀបនឹងរយៈពេលដូចគ្នា ក្នុងឆ្នាំ ២០២១ ។

លោកឯកអគ្គរដ្ឋទូត Mai Phuoc Dung បានឲ្យដឹងថា ក្នុងដំណើរទស្សនកិច្ចរបស់ប្រធានាធិបតីលោកស្រី Halimah Yacob មកកាន់វៀតណាមលើកនេះ ប្រទេសទាំងពីរនឹងជំរុញកិច្ចសហប្រតិបត្តិការលើវិស័យថាមពលកកើតឡើងវិញថ្មី។ លោកឯកអគ្គរដ្ឋទូតសង្ឃឹមថា ក្នុងដំណើរទស្សនកិច្ចនេះ កិច្ចព្រមព្រៀងសហប្រតិបត្តិការថាមពលរវាងប្រទេសទាំងពីរនឹងត្រូវបានចុះហត្ថលេខា បង្កើតកម្លាំងចលករថ្មីសម្រាប់ទំនាក់ទំនងទ្វេភាគី ព្រោះថាវៀតណាមមានសក្ដានុពលជាច្រើនសម្រាប់ថាមពលកកើតឡើងវិញ ខណៈដែលសិង្ហបុរីមានតម្រូវការថាមពលកកើតឡើងវិញផងដែរ៕