នៅព្រឹកថ្ងៃទី ១១ ខែសីហានេះ ក្រសួងសុខាភិបាលឲ្យដឹងថា វៀតណាមរកឃើញករណីឆ្លងជំងឺកូវីដ ១៩ ថ្មីចំនួន ៤.៨០២ នាក់បន្ថែមទៀត ក្នុងនោះ មានករណីនាំចូលចំនួន ១០ ករណី ហើយករណីសេសសល់ឆ្លងនៅតាមខេត្ត - ក្រុងចំនួន ២១។ ទីក្រុងហូជីមិញនៅតែជាតំបន់ដែលមានករណីច្រើនជាងគេ គឺចំនួន ២.១២៨ ករណីនិងខេត្ត Binh Duong មានអ្នកឆ្លងជំងឺចំនួន ៩៣៦ ករណី។

ដូច្នេះ គិតត្រឹមព្រឹកថ្ងៃទី ១១ ខែសីហា ប្រទេសទាំងមូលមានករណីឆ្លងជំងឺកូវីដ ១៩ ចំនួន ២៣២.៩៣៧ នាក់។ ករណីព្យាបាលជាសះស្បើយសរុបមានចំនួន ៨០.៣៤៨ ករណី។

នៅថ្ងៃទី ១០ ខែសីហា តំបន់នានានៅទូទាំងប្រទេសបានចាក់វ៉ាក់សាំងការពារជំងឺកូវីដ ១៩ ចំនួនជាង ១.៤ លានដូស ដែលនាំឱ្យចំនួនសរុបនៃការចាក់វ៉ាក់សាំងនៅវៀតណាមឡើងទៅដល់ជាង ១១.៣ លានដូស។ នេះគឺជាថ្ងៃដែលមានចំនួនវ៉ាក់សាំងត្រូវបានចាក់ខ្ពស់បំផុតមិនធ្លាប់មានក្នុងមួយថ្ងៃនៅប្រទេសវៀតណាម៕