វៀតណាមគឺជាប្រទេសដំបូងមួយដែលបានចុះហត្ថលេខាលើកិច្ចព្រមព្រៀងនេះ ដោយបានផ្ញើសារដ៏រឹងមាំថា វៀតណាមជាសមាជិកសកម្ម មានការទទួលខុសត្រូវរបស់សហគមន៍អន្តរជាតិ រួមដៃជាមួយបណ្តាប្រទេសនៅលើពិភពលោកដើម្បីដោះស្រាយបញ្ហាសកល រួមចំណែកដល់សន្តិភាព វិបុលភាព និងការអភិវឌ្ឍន៍ប្រកបដោយចីរភាព។ ប្រទេសជាង ៦០ បានចុះហត្ថលេខាលើកិច្ចព្រមព្រៀងនេះក្នុងអំឡុងពេលសប្តាហ៍ជាន់ខ្ពស់នៃមហាសន្និបាតអង្គការសហប្រជាជាតិ។

រដ្ឋមន្ត្រីការបរទេស Bui Thanh Son ចុះហត្ថលេខាលើកិច្ចព្រមព្រៀងស្តីពីការអភិរក្ស និងការប្រើប្រាស់ប្រកបដោយនិរន្តរភាពជីវចម្រុះនៅដែនសមុទ្រស្ថិតនៅក្រៅសិទ្ធិយុត្តាធិការជាតិ ។ រូបថត៖ VGP/Nhat Bac

ការអនុម័តនិងចុះហត្ថលេខាលើកិច្ចព្រមព្រៀងនេះគឺជាព្រឹត្តិការណ៍ប្រវត្តិសាស្ត្រមួយក្នុងកិច្ចខិតខំប្រឹងប្រែងរបស់សហគមន៍អន្តរជាតិដើម្បីការពារបរិស្ថានសមុទ្រ ក្នុងបរិបទនៃការអនុវត្តរបៀបវារៈឆ្នាំ ២០៣០ ជាពិសេសគោលដៅអភិវឌ្ឍន៍ប្រកបដោយចីរភាពលេខ១៤ ស្តីពីការអភិរក្សនិងប្រើប្រាស់ប្រកបដោយនិរន្តរភាពសមុទ្រនិងធនធានសមុទ្រ។ នេះគឺជាកិច្ចព្រមព្រៀងទី៣ ដែលបានចរចានិងចុះហត្ថលេខាក្នុងក្របខ័ណ្ឌនៃអនុសញ្ញាស្តីពីច្បាប់សមុទ្រឆ្នាំ ១៩៨២ ដោយអះអាងសារជាថ្មីអំពីតួនាទី និងសារៈសំខាន់នៃអនុសញ្ញានេះដែលជាក្របខ័ណ្ឌច្បាប់សម្រាប់សកម្មភាពទាំងអស់នៅលើសមុទ្រនិងមហាសាគរ។ កិច្ចព្រមព្រៀងនេះនឹងចូលជាធរមានបន្ទាប់ពីមានប្រទេសចំនួន ៦០ បានផ្តល់សច្ចាប័ន និងអនុម័ត។

ថ្លែងជាមួយសារព័ត៌មានក្រោយពិធីចុះហត្ថលេខានោះ លោករដ្ឋមន្ត្រី Bui Thanh Son បានឲ្យដឹងថា កិច្ចព្រមព្រៀងនេះគឺជាឯកសារដំបូងបង្អស់ដើម្បីកែសម្រួលលើគ្រប់ជ្រុងជ្រោយនៃការអភិរក្សនិងការប្រើប្រាស់ធនធានហ្សែនសមុទ្រប្រកបដោចីរភាពនៅដែនសមុទ្រអន្តរជាតិ។ ការចុះហត្ថលេខាលើសេចក្តីព្រាងកិច្ចព្រមព្រៀងនេះគឺជាព្រឹត្តិការណ៍ប្រវត្តិសាស្ត្រមួយក្នុងកិច្ចខិតខំប្រឹងប្រែងរបស់សហគមន៍អន្តរជាតិដើម្បីការពារបរិស្ថានសមុទ្រ បើកឱកាសសម្រាប់ប្រទេសកំពុងអភិវឌ្ឍន៍ក្នុងការទទួលបាន ចូលរួមការស្រាវជ្រាវ និងទទួលផលពីធនធានហ្សែននៅក្នុងដែនសមុទ្រអន្តរជាតិ៕