ជាមួយនឹងអត្រាកំណើន ២០% ក្នុងមួយឆ្នាំ វៀតណាមជាប់ចំណាត់ថ្នាក់ក្នុងចំណោមប្រទេសកំពូលទាំង ៥ ដែលមានអត្រាកំណើនពាណិជ្ជកម្មតាមអេឡិច ត្រូនិកជួរមុខរបស់ពិភពលោក។ ជាពិសេសនៅឆ្នាំ ២០២២ តម្លៃនាំចេញនៅលើវេទិកាពាណិជ្ជកម្មអេឡិចត្រូនិកអន្តរជាតិនឹងកើនឡើងយ៉ាងខ្លាំង។

យោងតាមរបាយការណ៍របស់ Amazon Global Selling ក្នុងឆ្នាំ ២០២២ ចំនួននៃអាជីវកម្មវៀតណាមដែលចូលរួមក្នុងការលក់នៅលើទីផ្សារពាណិជ្ជកម្មអនឡាញ Amazon   បានកើនឡើងជាង ៨០% ក្នុងរយៈពេលដូចគ្នា ពោលគឺមានផលិតផលម៉ាកវៀតណាមជិត ១០ លានលក់ត្រូវបានលក់នៅលើទីផ្សារ Amazon។ របាយការណ៍ក៏បានឲ្យដឹងថា ការលក់រាយទំនិញឆ្លងប្រទេសរបស់វៀតណាមនឹងឈានដល់ ៨០.០០០ ពាន់លានដុងក្នុងឆ្នាំ ២០២២ ហើយគ្រោងនឹងឈានដល់ ២៥០.០០០ ពាន់លានដុងនៅឆ្នាំ ២០២៦។ លោក Gijae Seong នាយកប្រតិបត្តិនៃក្រុមហ៊ុន Amazon Global Selling Vietnam បានឲ្យដឹងថា វៀតណាមមានគុណសម្បត្តិជាច្រើនក្នុងការលើកកម្ពស់ការនាំចេញតាមអ៊ីនធឺណិត ដូចជាបរិស្ថាន គោលនយោបាយគាំទ្រ សមត្ថភាពផលិតដ៏សម្បូរបែប និងសហគមន៍អ្នកលក់ដ៏ច្រើនដែលមានភាពស្វាហាប់។

ដើម្បីឆ្លើយតបនឹងតម្រូវការកើនឡើងក្នុងការចូលរួមក្នុងទីផ្សារនាំចេញតាមរយៈទីផ្សារពាណិជ្ជកម្មអេឡិចត្រូនិក ក្រសួងឧស្សាហកម្ម និងពាណិជ្ជកម្មវៀតណាមកំពុងសម្របសម្រួលជាមួយទីផ្សារពាណិជ្ជកម្មអេឡិចត្រូនិកឆ្លងព្រំដែនជាច្រើន ដើម្បីរៀបចំវគ្គបណ្តុះបណ្តាល និងសកម្មភាពជាក់ស្តែង  ដើម្បីលើកកំពស់គុណភាពនៃ ផលិតផល  សេវាកម្ម និងជំនាញសម្រាប់អាជីវកម្ម នាំយកផលិតផល Made in Vietnam ទៅកាន់ពិភពលោក។ លោកស្រី Lai Viet Anh អនុប្រធាននាយកដ្ឋានពាណិជ្ជកម្មអេឡិចត្រូនិកនិងសេដ្ឋកិច្ចឌីជីថល នៃក្រសួងឧស្សាហកម្ម និងពាណិជ្ជកម្មបានឲ្យដឹងថា៖ “នាយកដ្ឋានទីផ្សារពាណិជ្ជកម្មអេឡិចត្រូនិកនិងសេដ្ឋកិច្ចឌីជីថល មានកម្មវិធីកិច្ចសហប្រតិបត្តិការជាច្រើន ជាមួយវេទិកាពាណិជ្ជកម្មអេឡិចត្រូនិកឆ្លងព្រំដែន ដើម្បីគាំទ្រដល់អាជីវកម្មវៀតណាម បង្កើនសមត្ថភាពប្រើប្រាស់ទីផ្សារពាណិជ្ជកម្មអេឡិចត្រូនិកឆ្លងព្រំដែន  បំពាក់នូវជំនាញលក់ប្រកបដោយប្រសិទ្ធភាពនៅលើផ្សារពាណិជ្ជកម្មអេឡិចត្រូនិកសកលលោក ហើយតាមនោះ នាំផលិតផលទៅកាន់ទីផ្សារសក្តានុពល។ គោលដៅគឺនៅចុងឆ្នាំ ២០២៦ អាចបណ្ដុះបណ្ដាលអាជីវកម្មចំនួន ១០.០០០ អំពីជំនាញនិងការប្រើប្រាស់ទីផ្សារពាណិជ្ជកម្មអេឡិចត្រូនិកឆ្លងដែន ក៏ដូចជាទាញយកមុខងារដែលមានស្រាប់ពីទីផ្សារពាណិជ្ជកម្មអេឡិចត្រូនិកសកល”។

ការសិក្សាថ្មីបំផុតរបស់ក្រុមហ៊ុន Access Partnership បង្ហាញថា ប្រាក់ចំណូលនាំចេញពាណិជ្ជកម្មរបស់វៀតណាមអាចឈានដល់ជិត ៣០០.០០០ ពាន់លានដុងនៅឆ្នាំ ២០២៧ ប្រសិនបើអាជីវកម្មក្នុងប្រទេស ត្រូវបានគាំទ្រយ៉ាងពេញលេញ និងបង្កើនល្បឿននៃការអនុម័តពាណិជ្ជកម្មតាមអេឡិចត្រូនិកសម្រាប់ការនាំចេញ៕