អ៊ូសបេគីស្ថានរៀបចំសន្និសីទអន្តរជាតិស្តីពីការកសាងឡើងវិញនៅអាហ្វហ្គានីស្ថានក្រោយជម្លោះ
(VOVWORLD) - នាថ្ងៃទី១ ខែកក្កដា ក្រសួងការបរទេសអ៊ូសបេគីស្ថានបានប្រកាសពីការរៀបចំសន្និសីទអន្តរជាតិមួយ ដែលគ្រោងនឹងប្រព្រឹត្តទៅចាប់ពីថ្ងៃទី២៥-២៦ខែកក្កដា ដោយមានការចូលរួមពីគណៈប្រតិភូមកពីប្រទេសនិងអង្គការអន្តរជាតិជាង២០ ដើម្បីពិភាក្សាអំពីការលើកកម្ពស់ស្ថិរភាព សន្តិសុខ និងការកសាងឡើងវិញក្រោយជម្លោះនៅក្នុងប្រទេសជិតខាង អាហ្វហ្គានីស្ថាន។
 ទិដ្ឋភាពទូទៅនៃសន្និសីទអន្តរជាតិស្តីពីអាហ្វហ្គានីស្ថាន ថ្ងៃទី ២០ ខែតុលា ឆ្នាំ២០២១ នៅរុស្ស៊ី។ (រូបថត៖ AFP/TTXVN) |
លើសពីនេះទៅទៀតរបៀបវារៈក៏បានផ្តោតលើការចូលរួមរបស់អាហ្វហ្គានីស្ថានក្នុងដំណើរការនៃកិច្ចសហប្រតិបត្តិការក្នុងតំបន់ផងដែរ។
ចាប់តាំងពីក្រុមតាលីបង់បានវិលត្រឡប់មកកាន់អំណាចក្នុងប្រទេសអាហ្វហ្គានីស្ថាននៅពាក់កណ្តាលខែសីហាឆ្នាំ២០២១មក ប្រទេសនេះបានធ្លាក់ចូលវិបត្តិហិរញ្ញវត្ថុជាមួយនឹងអត្រាបាត់បង់ការងារធ្វើនិងអតិផរណាកើនឡើងខ្ពស់។ ទីក្រុងវ៉ាស៊ីនតោនបានបង្កកទ្រព្យសម្បត្តិរាប់ពាន់លានដុល្លាររបស់អាហ្វហ្គានីស្ថាននៅក្នុងប្រព័ន្ធធនាគារអាមេរិក ខណៈពេលដែលប្រតិបត្តិការជួយសង្គ្រោះនិងផ្តល់ជំនួយត្រូវបានអាក់ខាន។ កាលពីឆ្នាំមុន អាហ្វហ្គានីស្ថានបានរងការបាត់បង់រដូវប្រមូលផលដោយសារតែគ្រោះរាំងស្ងួតដ៏អាក្រក់បំផុតក្នុងរយៈពេលជាច្រើនទសវត្សរ៍៕