ທ່ານລັດຖະມົນຕີການຕ່າງປະເທດຫວຽດນາມ ບຸຍແທັງເຊີນ (ພາບ: TTXVN)

ໃນຂອບເຂດບັນດາການກະກຽມໃຫ້ແກ່ກອງປະຊຸມຂັ້ນສູງອາຊຽນ ຄັ້ງທີ 38 ແລະ 39 ແລະ ບັນດາກອງປະຊຸມທີ່ກ່ຽວຂ້ອງ, ວັນທີ 04 ຕຸລາ, ບັນດາກອງປະຊຸມປະຊາຄົມການເມືອງ - ຄວາມໝັ້ນຄົງ ອາຊຽນ ຄັ້ງທີ 24, ສະພາປະສານງານອາຊຽນ ຄັ້ງທີ 30 ແລະ ກອງປະຊຸມລັດຖະມົນຕີການຕ່າງປະເທດອາຊຽນ ໄດ້ດຳເນີນແບບທາງໄກ ພາຍໃຕ້ການເປັນປະທານຂອງປະເທດປະທານ ບຣຸໄນ.

        ກ່າວຄຳເຫັນທີ່ບັນດາກອງປະຊຸມ, ທ່ານລັດຖະມົນຕີການຕ່າງປະເທດຫວຽດນາມ ບຸຍແທັງເຊີນ ຢືນຢັນວ່າ, ຫວຽດນາມ ໄດ້ຕັ້ງໜ້າເຂົ້າຮ່ວມຜັນຂະຫຍາຍບັນດາບຸລິມະສິດປີ 2021 ແລະ ຈະສົມທົບກັນຢ່າງແໜ້ນແຟ້ນ ເພື່ອຮັບປະກັນຜົນສຳເລັດຂອງບັນດາກອງປະຊຸມຂັ້ນສູງຈະມາເຖິງ.

        ກ່ຽວກັບບັນດາສິ່ງທ້າທາຍທີ່ພວມວາງອອກໃຫ້ແກ່ ອາຊຽນ ແລະ ພາກພື້ນ, ທ່ານລັດຖະມົນຕີການຕ່າງປະເທດ ບຸຍແທັງເຊີນ ຖືວ່າ, ການແກ່ງແຍ້ງທີ່ນັບມື້ນັບຮ້າຍແຮງ ແລະ ເລິກເຊິ່ງລະຫວ່າງບັນດາປະເທດໃຫຍ່ ພວມສ້າງຜົນຕາມມາທີ່ໃຫຍ່ຫຼວງສຳລັບພາກພື້ນ; ທ່ານເນັ້ນໜັກວ່າຕ້ອງຕິດຕາມບັນດາສະພາບການຢ່າງໃກ້ຊິດ, ຮັກສາຄວາມສາມັກຄີ, ສ້າງຄວາມເຂັ້ມແຂງດ້ວຍຕົນເອງ ແລະ ຮັກສາບົດບາດໃຈກາງ ແລະ ເອກະລາດຂອງອາຊຽນ. ຫວຽດນາມ ກໍ່ສະເໜີໃຫ້ອາຊຽນ ຈົ່ງຮັກສາວິທີສຳຜັດຢ່າງກົມກຽວ, ທັງຮັກສາຫຼັກໝັ້ນ ຫຼັກການສຳລັບບັນດາບັນຫາທີ່ສົ່ງຜົນກະທົບຕໍ່ສັນຕິພາບ, ຄວາມໝັ້ນຄົງຢູ່ພາກພື້ນ, ທັງສົ່ງເສີມບັນດາຄູ່ຮ່ວມມືຕັ້ງໜ້າເຂົ້າຮ່ວມບັນດາກົນໄກໂດຍ ອາຊຽນ ນຳພາ ເພື່ອຊຸກຍູ້ການເຈລະຈາ ແລະ ຄວາມໄວ້ເນື້ອເຊື່ອໃຈ, ພ້ອມກັນແກ້ໄຂບັນດາບັນຫາທີ່ຕ່າງຝ່າຍຕ່າງມີຄວາມສົນໃຈ.

        ກ່ຽວກັບບັນຫາທະເລຕາເວັນອອກ, ທ່ານລັດຖະມົນຕີ ບຸຍແທັງເຊີນ ໄດ້ຢືນຢັນຄືນໃໝ່ຄວາມສຳຄັນຂອງການຊຸກຍູ້ຄວາມໄວ້ເນື້ອເຊື່ອໃຈ, ປະຕິບັດຄວາມລະງັບໃຈ, ແກ້ໄຂບັນດາການຂັດແຍ້ງກັນໃຫ້ເໝາະສົມກັບກົດໝາຍສາກົນ, ໃນນັ້ນມີສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລປີ 1982, ພ້ອມກັນນັ້ນ ອາຊຽນ ຄວນສົມທົບກັນກັບຈີນ ຢ່າງແໜ້ນແຟ້ນ ເພື່ອຮັບປະກັນການປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ ແລະ ສ້າງກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ຢ່າງມີປະສິດທິຜົນ, ແທດຈິງ, ເໝາະສົມກັບກົດໝາຍສາກົນ…

        ເມື່ອແລກປ່ຽນກ່ຽວກັບສະພາບການຢູ່ ມຽນມາ, ທ່ານລັດຖະມົນຕີ ບຸຍແທັງເຊີນ ໄດ້ສະໜັບສະໜູນບັນດາຄວາມມານະພະຍາຍາມຂອງປະທານ ອາຊຽນ ກໍ່ຄືທູດພິເສດຂອງປະທານ ອາຊຽນ ກ່ຽວກັບ ມຽນມາ ຜັນຂະຫຍາຍໜ້າທີ່ໂດຍໄວ ແລະ ປາດຖະໜາວ່າ ມຽນມາ ຈະສ້າງເງື່ອນໄຂສະດວກເພື່ອໃຫ້ທູດພິເສດປະຕິບັດບັນດາໜ້າທີ່ຢ່າງມີປະສິດທິຜົນ.