ການສົນທະນາຮ່ວມມືດ້ານກະສິກຳ ຫວຽດນາມ - ຍີ່ປຸ່ນ
(vovworld) - ໃນຂອບເຂດການຮ່ວມມືລະຫວ່າງ ຫວຽດນາມ ແລະ ຍີ່ປຸ່ນ ໃນຂົງເຂດກະສິກຳ, ຕອນເຊົ້າວັນທີ 12/8, ຢູ່ຮ່າໂນ້ຍ, ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ສົມທົບກັບກະຊວງກະສິກຳ, ປ່າໄມ້ ແລະ ການປະມົງ ຍີ່ປຸ່ນ ຈັດຕັ້ງກອງປະຊຸມຂັ້ນສູງຄັ້ງທີ 2 ກ່ຽວກັບ “ການສົນທະນາຮ່ວມມືດ້ານກະສິກຳ ຫວຽດນາມ - ຍີ່ປຸ່ນ”. 2 ຝ່າຍໄດ້ເຫັນດີເປັນເອກະພາບເພີ່ມທະວີຊຸກຍູ້ການຄ້າຂາຍຜະລິດຕະພັນກະສິກຳ, ເຄື່ອງປ່າຂອງດົງ ແລະ ສິນໃນນ້ຳ. ຫວຽດນາມ ສະເໜີຝ່າຍ ຍີ່ປຸ່ນ ອະນຸຍາດການນຳເຂົ້າໝາກມ່ວງຂອງ ຫວຽດນາມ ເຂົ້າຕະຫລາດ ຍີ່ປຸ່ນ, ພ້ອມທັງພິຈາລະນາສົ່ງເສີມເປີດປະຕູຕະຫລາດສຳລັບໝາກມັງກອນໄສ້ແດງ ແລະ ໝາກລິ່ນຈີ່ສົດຂອງ ຫວຽດນາມ. 2 ຝ່າຍຈະສ້າງເງື່ອນໄຂ ເພື່ອໃຫ້ບັນດາວິສາຫະກິດ ຍີ່ປຸ່ນ ລົງທຶນໂດຍກົງເຂົ້າຕະຫລາດ ຫວຽດນາມ ກໍຄືການຮ່ວມທຸລະກິດ, ຮ່ວມສຳພັນລົງທຶນຜະລິດກະສິກຳ, ລ້ຽງສັດ, ປູກຝັງ, ປຸງແຕ່ງຜະລິດຕະພັນ ກະສິກຳ, ເຄື່ອງປ່າຂອງດົງ ແລະ ສິນໃນນ້ຳ.
ສິ້ນສຸດກອງປະຊຸມ, ບັນດາລັດຖະມົນຕີກະຊວງກະສິກຳຂອງ 2 ປະເທດ ໄດ້ເຊັນບົດບັນທຶກການຮ່ວມມືກ່ຽວກັບ “ວິໄສທັດໄລຍະກາງ ແລະ ໄລຍະຍາວໃນການຮ່ວມມືດ້ານກະສິກຳ ຫວຽດນາມ - ຍີ່ປຸ່ນ”.