(vovworld) - ເວທີປາໄສວິສາຫະກິດຫວຽດນາມປະຈຳປີ ຈະຖືກຈັດຂຶ້ນຢູ່ຮ່າໂນ້ຍ ໃນວັນທີ 3/12 ຈະມາເຖິງ. ດ້ວຍຫົວຂໍ້ວ່າ “ເພີ່ມທະວີຄວາມຂະຫຍັນຂັນເຄື່ອນຂອງພື້ນຖານເສດຖະກິດຫວຽດນາມ”, ເວທີປາໄສຈະປຶກສາຫາລືບັນດາບັນຫາທີ່ກ່ຽວຂ້ອງເຖິງສະພາບແວດລ້ອມແຫ່ງການລົງທຶນສຳລັບວິສາຫະກິດຫວຽດນາມ, ແກ້ໄຂຄວາມຫຍຸ້ງຍາກໃຫ້ແກ່ວິສາຫະກິດຄື ນະໂຍບາຍດ້ານພາສີ, ວິທີສຳພັດກັບແຫຼ່ງທຶນ, ດອກເບ້ຍ. ຈາກນັ້ນ ໄດ້ຍົກອອກຂໍ້ສະເໜີຕໍ່ກັບລັດຖະບານຫວຽດນາມ ເພື່ອແກ້ໄຂຄວາມຫຍຸ້ງຍາກ, ຍົກສູງປະສິດທິຜົນການດຶງດູດການລົງທຶນໂດຍກົງຈາກຕ່າງປະເທດ. ກ່າວຄຳເຫັນທີ່ກອງປະຊຸມຂ່າວ, ທ່ານວຸຕຽນໂລກ (Vu Tien Loc), ຫົວໜ້າອົງການການຄ້າ ແລະ ອຸດສາຫະກຳຫວຽດນາມ, ທັງເປັນປະທານຮ່ວມສຳພັນທະມິດເວທີປາໄສວິສາຫະກິດຫວຽດນາມ ໃຫ້ຮູ້ວ່າ.
“ໃນກອງປະຊຸມຄັ້ງນີ້, ຂ້າພະເຈົ້າປາດຖະໜາວ່າ ບັນດາສະຫະສະມາຄົມວິສາຫະກິດພາຍໃນ ແລະ ຕ່າງປະເທດ ຈະມີສຽງເວົ້າຂອງຕົນດ້ວຍຫຼາຍຮູບຫຼາຍແບບທີ່ແຕກຕາງກັນ ແລະ ມີລະບົບຂໍ້ສະເໜີແນະນຳບັນດາອົງການລັດຖະບານຢ່າງທັນການໃນໄລຍະປະຈຸບັນ ເພື່ອໃຫ້ພວກເຮົາມີລະບົບນະໂຍບາຍຢ່າງຄົບຊຸດ, ຕອບສະໜອງໄດ້ຕາມຄວາມຮຽກຮ້ອງຕ້ອງການຂອງວິສາຫະກິດໃນໄລຍະຈະມາເຖິງ.”
ເວທີປາໄສວິສາຫະກິດຫວຽດນາມ ປະຈຳປີ ແມ່ນກົນໄກຄູ່ເຈລະຈາຢ່າງລຽນຕິດ ແລະ ແໜ້ນແຟ້ນ ລະຫວ່າງລັດຖະບານຫວຽດນາມ ກັບປະຊາຄົມບັນດາວິສາຫະກິດພາຍໃນ ແລະ ຕ່າງປະເທດ ເພື່ອແນໃສ່ແກ້ໄຂຄວາມຫຍຸ້ງຍາກ ແລະ ຊອກຫາມາດຕະການແກ້ໄຂ ບົນທັດສະນະດຳເນີນທຸລະກິດຢ່າງໝັ້ນຄົງ ແລະ ຍາວນານ. ຈຸດໃໝ່່ຂອງເວທີປາໄສປີນີ້ ແມ່ນມີການເຂົ້າຮ່ວມຂອງ 2 ສະຫະສະມາຄົມວິສາຫະກິດຕ່າງປະເທດທີ່ມາຈາກສະວິດ ແລະ ອິນເດຍ.