ຕອນເຊົ້າວັນທີ 29/11 ຢູ່ຮ່າໂນ້ຍ, ຄະນະບໍລິຫານງານສະມາຄົມມິດຕະພາບຫວຽດນາມ - ລາວ ໄດ້ຈັດຕັ້ງກອງປະຊຸມສະຫຼຸບວຽກງານປີ 2011. ເຂົ້າຮ່ວມກອງປະຊຸມມີທ່ານ ຫວູຈ້ອງກິມ, ກຳມະການສູນກາງພັກກອມມູນິດຫວຽດນາມ, ປະທານສະມາຄົມມິດຕະພາບຫວຽດນາມ - ລາວ. ບົດລາຍງານທີ່ກອງປະຊຸມສະຫຼຸບໃຫ້ຮູ້ວ່າ: ໃນປີທີ່ຜ່ານມາ, ສະມາຄົມມິດຕະພາບຫວຽດນາມ - ລາວ ໄດ້ດຳເນີນການເຄື່ອນໄຫວຫຼາຍຢ່າງ ທີ່ອຸດົມສົມບຸນ, ປະກອບສ່ວນສຳຄັນເຂົ້າໃນການປັບປຸງ ແລະ ພັດທະນາສາຍພົວພັນມິດຕະພາບແບບພິເສດ ແລະ ການຮ່ວມມີຢ່າງຮອບດ້ານ ລະຫວ່າງຫວຽດນາມ - ລາວ ຢ່າງບໍ່ຢຸດຢັ້ງ. ກ່ຽວກັບທິດທາງການເຄື່ອນໄຫວຂອງສະມາຄົມໃນປີ 2012, ທ່ານ ດ່ວານມິນເຈົາ, ປະທານສະມາຄົມມິດຕະພາບຫວຽດນາມ - ລາວ ຂອງນະຄອນຫຼວງຮ່າໂນ້ຍໃຫ້ຮູ້ວ່າ:“ປີ 2012, ຫວຽດນມ ແລະ ລາວ ຈະພ້ອມກັນສະເຫຼີມສະຫຼອງ 50 ປີ ແຫ່ງວັນ ສ້າງຕັ້ງສາຍພົວພັນທາງການທູດລະຫວ່າງ 2 ປະເທດ ແລະ 35 ປີ ແຫ່ງວັນເຊັນສົນທິສັນຍາມິດຕະພາບ ແລະ ຮ່ວມມືຫວຽດນາມ - ລາວ. ການນຳຂັ້ນສູງ 2 ປະເທດ ໄດ້ເຫັນດີກຳນົດວ່າປີ 2012 ແມ່ນ ປີແຫ່ງຄວາມສາມັກຄີມິດຕະພາບລະຫວ່າງຫວຽດນາມ - ລາວ. ສະມາຄົມມິດຕະພາບຫວຽດນາມ - ລາວ ຄວນຕັ້ງໜ້າຕອບສະໜອງດ້ວຍການເຄື່ອນໄຫວອັນລະອຽດ, ແທດຈິງຕ່າງໆຄື: ສົມທົບກັບກະຊວງການຕ່າງປະເທດ, ຄະນະພົວພັນການຕ່າງປະເທດສູນກາງພັກ, ຄະນະກຳມະການ ປຊຊ ນະຄອນ ຮ່າໂນ້ຍ ແລະ ບັນດາຫົວໜ່ວຍທີ່ກ່ຽວຂ້ອງຈັດຕັ້ງງານໂຮມຊຸມນຸມລະດັບຊາດ, ເປັນເຈົ້າພາບຈັດຕັ້ງງານມະໂຫລານມິດຕະພາບ ປຊຊ ຫວຽດນາມ - ລາວຄັ້ງທີ 3, ຈັດຕັ້ງການເຄື່ອນໄຫວສະເຫຼີມສະຫຼອງວັນສະຖາປານາ ສປປ ລາວ ແລະ ບຸນປີໃໝ່...”
ພາຍຫຼັງກອງປະຊຸມສະຫຼຸບ ກໍ່ໄດ້ດຳເນີນການພົບປະມິດຕະພາບ ເພື່ອສະເຫຼີມ ສະຫຼອງ 36 ປີ ແຫ່ງວັນ ສະຖາປານາ ສປປ ລາວ.