ທ່ານນາຍົກລັດຖະມົນຕີ ຫງວຽນເຕີນຢຸງ
ເຂົ້າຮ່ວມ ແລະ ຊີ້ນຳກອງປະຊຸມ
(ພາບ: chinhphu.vn)
(vovworld) - ວັນທີ 27/03, ຢູ່ຮ່າໂນ້ຍ ໄດ້ຈັດກອງປະຊຸມສະຫຼຸບ 25 ປີແຫ່ງການລົງທຶນໂດຍກົງຈາກຕ່າງປະເທດຢູ່ຫວຽດນາມ (FDI), ເພື່ອແນໃສ່ສະຫຼຸບ, ຕີລາຄາຢ່າງຮອບດ້ານບັນດາຜົນງານເຊິ່ງບັນລຸໄດ້ ກໍຄືບັນດາຂໍ້ຈຳກັດ, ສິ່ງທີ່ຄົງຄ້າງຂອງການລົງທຶນຈາກຕ່າງປະເທດ. ບົນພື້ນຖານນັ້ນ, ຈະກຳນົດບັນດາທິດທາງ, ມາດຕະການແກ້ໄຂໃນໄລຍະຈະມາເຖິງໃຫ້ແກ່ການເຄື່ອນໄຫວນີ້. ທ່ານນາຍົກລັດຖະມົນຕີຫວຽດນາມ ຫງວຽນເຕີນຢຸງ ໄດ້ເຂົ້າຮ່ວມ ແລະ ຊີ້ນຳກອງປະຊຸມ, ພ້ອມກັບການເຂົ້າຮ່ວມຂອງການນຳບັນດາກະຊວງ, ຂະແໜງການສູນກາງ; ການນຳຄະນະກຳມະການປະຊາຊົນບັນດາແຂວງ, ນະຄອນ, ຄະນະຄຸ້ມຄອງເຂດອຸດສາຫະກຳຂອງທ້ອງຖິ່ນຕ່າງໆ, ບັນດາສະຫະສະມາຄົມວິສາຫະກິດທັງຢູ່ພາຍໃນ ແລະ ຕ່າງປະເທດ; ບັນດາອົງການຄົ້ນຄ້ວາ, ຜູ້ຊ່ຽວຊານ ແລະ ນັກວິທະຍາສາດ.
ພາຍຫຼັງ 25 ປີແຫ່ງການເປີດປະຕູ, ຮອດວັນທີ 31/12/2012, ຫວຽດນາມ ມີກວ່າ 14.000 ໂຄງການຍັງມີຜົນສັກສິດ ດ້ວຍຍອດຈຳນວນເງິນຈົດທະບຽນກວ່າ 210 ຕື້ USD, ໃນນັ້ນຂົງເຂດອຸດສາຫະກຳປຸງແຕ່ງ, ຜະລິດຕະພັນກວມເອົາອັດຕາສູງສຸດແມ່ນ 50,3% ຈຳນວນເງິນລົງທຶນ. ນະຄອນໂຮ່ຈິມິນ ແມ່ນທ້ອງຖິ່ນນຳໜ້າໃນການດຶງດູດທຶນ FDI ດ້ວຍຈຳນວນເງິນ 32,2 ຕື້ USD, ຖັດຈາກນັ້ນແມ່ນແຂວງ ບາເຮີຍ - ວູ້ງເຕົ່າ, ຮ່າໂນ້ຍ, ດົງນາຍ ແລະ ບິ່ງເຢືອງ.
ກ່າວຄຳເຫັນທີ່ໄຂກອງປະຊຸມ, ທ່ານລັດຖະມົນຕີກະຊວງແຜນການແລະການລົງທຶນ ບຸຍກວາງວິງ ເນັ້ນໜັກວ່າ: ໃນ 25 ປີຜ່ານມາ, ການລົງທຶນຈາກຕ່າງປະເທດເຂົ້າຫວຽດນາມ ໄດ້ປະກອບສ່ວນສຳຄັນໃນການຊຸກຍູ້ການຫັນປ່ຽນໂຄງປະກອບເສດຖະກິດຕາມທິດອຸດສາຫະກຳທີ່ທັນສະໄໝ, ສ້າງວຽກເຮັດງານທຳ, ເພີ່ມວົງເງິນສົ່ງອອກ, ເພີ່ມລາຍຮັບງົບປະມານ ແລະ ຫວຽດນາມ ກໍຮໍ່າຮຽນບັນດາບົດຮຽນ, ຮັບຮູ້ບັນດາເຕັກໂນໂລຊີໃໝ່ຂອງປະເທດຕ່າງໆໃນໂລກ. ໃນສະພາບທີ່ເສດຖະກິດໂລກພວມປະສົບກັບຄວາມຫຍຸ້ງຍາກຫຼາຍຢ່າງ, ຫວຽດນາມ ຕ້ອງມີການຫັນປ່ຽນຢ່າງຕັ້ງໜ້າກວ່າອີກ ຈຶ່ງສາມາດແກ່ງແຍ່ງກັບບັນດາປະເທດໃນພາກພື້ນໃນຂົງເຂດດຶງດູດການລົງທຶນໂດຍກົງຈາກຕ່າງປະເທດໄດ້.