ກະສີກຳຫວຽດນາມ - ເຊື່ອມໂຍງ, ທ້າທາຍ ແລະ ກາລະໂອກາດໃໝ່
(ພາບປະກອບ) (vovworld) – “ກະສີກຳຫວຽດນາມ - ເຊື່ອມໂຍງ, ທ້າທາຍ ແລະ ກາລະໂອກາດໃໝ່ “ ແມ່ນຫົວຂໍ້ຂອງເວທີປາໄສໂອ້ລົມສົນທະນາກ່ຽວກັບນະໂຍບາຍຂັ້ນສູງລະຫວ່າງການນຳກະຊວງກະສີກຳ ແລະ ພັດທະນາຊົນນະບົດ, ບັນດາກະຊວງ, ຂະແໜງການທີ່ກ່ຽວຂ້ອງເຖິງປະຊາຄົມບັນດານັກອຸປະຖຳ, ບັນດາອົງການຈັດຕັ້ງສາກົນ ແລະ ອົງການບໍ່ຂຶ້ນກັບລັດຖະບານ.
ກ່າວຄວາມເຫັນໄຂກອງປະຊຸມ, ທ່ານລັດຖະມົນຕີ ກະຊວງກະສີກຳ ແລະ ພັດທະນາຊົນນະບົດ ກາວດຶກຟາດ ຢືນຢັນວ່າ: ພາຍຫຼັງ 6 ປີ ທີ່ເຂົ້າເປັນສະມາຊິກອົງການການຄ້າໂລກ ແລະ ເຂົ້າຮ່ວມບັນດາສັນຍາການຄ້າເສລີສອງຝ່າຍ ແລະ ພາກພື້ນ, ຂະແໜງກະສີກຳຫວຽດນາມໄດ້ເປີດກວ້າງຕະຫຼາດສົ່ງອອກຜະລິດຕະພັນກະເສດ, ສິນໃນນ້ຳ, ເຄື່ອງປ່າຂອງດົງ. ວົງເງິນສົ່ງອອກຜະລິດຕະພັນກເສດໄດ້ເພີ່ມຂຶ້ນຢ່າງຕໍ່ເນື່ອງ. ຫວຽດນາມໄດ້ກາຍເປັນປະເທດມີທີ່ຕັ້ງສູງໃນຕະຫຼາດໂລກ ດ້ວຍຜະລິດຕະພັນກະເສດຕົ້ນຕໍ່ຄື: ເຂົ້າສານ, ສິນໃນນ້ຳ, ກາເຟ, ໝາກຜິກໄທ, ຢາງພາລາ...ແຕ່ພ້ອມກັບກາລະໂອກາດ, ວິວັດການເຊື່ອມໂຍງກັບສາກົນກໍ່ໄດ້ເປັນການທ້າທາຍບໍ່ແມ່ນໜ້ອຍສຳລັບຂະແໜງກະສີກຳ. ທ່ານລັດຖະມົນຕີ ກາວດຶກຟາດ, ໃຫ້ຮູ້ວ່າ:
“ຂະແໜງກະສີກຳພວມສຸມໃສ່ຜັນຂະຫຍາຍການສ້າງໂຄງປະກອບຂະແໜງຢ່າງເລິກເຊິ່ງ, ກວ້າງຂວາງ ຕາມທິດຍົກສູງຄຸນຄ່າພັດທະນາແບບຍືນຍົງ. ທາງກະຊວງພວມສ້າງຍຸດທະສາດເຊື່ອງໂຍງຂະແໜງກະສີກຳກັບສາກົນຮອດປີ 2020, ວິໄສທັດ 2030 ແລະ ຈະຍື່ນສະເໜີຕໍ່ນາຍົກລັດຖະມົນຕີເຊັນອະນຸມັດ ເພື່ອໄດ້ຮັບຜົນປະໂຫຍດເສດຖະກິດສາກົນ ແລະ ຫຼຸດຜ່ອນການກະທົບທີ່ຫຍໍ້ທໍ້ ແລະມີຄວາມສ່ຽງໃຫ້ແກ່ຊົນນະບົດຫວຽດນາມ“.