ການພົວພັນຂອງຫວຽດນາມກັບບັນດາສະມາຊິກG20ນັບມື້ນັບມີປະສິດທິຜົນ

ວັນພຸດ ທີ 15 ກຸມພາ ຄ.ສ. 2017 | 14:23:00

ທ່ານ ດ່ວານຊວນຮືງ, ເອກອັກຄະລັດຖະທູດ ຫວຽດນາມ ປະຈຳ ເຢຍລະມັນ

(vovworld) – ກ່ອນທີ່ຈະຈັດຕັ້ງກອງປະຊຸມລັດຖະມົນຕີການຕ່າງປະເທດກຸ່ມບັນດາພື້ນຖານເສດຖະກິດພັດທະນາ ແລະ ຫາກໍ່ພົ້ນເດັ່ນແຖວໜ້າ (G20), ເວທີປາໄສໄດ້ເຕົ້າໂຮມ 20 ພື້ນຖານເສດຖະກິດໃຫຍ່ທີ່ສຸດໃນໂລກ, ຈະດຳເນີນຢູ່ Bonn (ເຢຍລະມັນ) ໃນວັນທີ 16 – 17/2, ທ່ານ ດ່ວານຊວນຮືງ, ເອກອັກຄະລັດຖະທູດ ຫວຽດນາມ ປະຈຳ ເຢຍລະມັນ ໄດ້ຕອບສຳພາດຕໍ່ສື່ມວນຊົນ, ຕີລາຄາກ່ຽວກັບບົດບາດຂອງ G20 ແລະ ການພົວພັນລະຫວ່າງ ຫວຽດນາມ ກັບ G20. ຕາມທ່ານເອກອັກຄະລັດຖະທູດ ດ່ວານຊວນຮືງ ແລ້ວ, ການພົວພັນຮ່ວມມືລະຫວ່າງ ຫວຽດນາມ ແລະ ບັນດາພື້ນຖານເສດຖະກິດສະມາຊິກ G20 ພວມພັດທະນາຢ່າງດີງາມ. ປະຈຸບັນ, 10 ສະມາຊິກ G20 ມີການພົວພັນຄູ່ຮ່ວມມືຍຸດທະສາດ ແລະ 2 ສະມາຊິກມີການພົວພັນຄູ່ຮ່ວມມືຮອບດ້ານກັບ ຫວຽດນາມ. ບັນດາການພົວພັນຄູ່ຮ່ວມມືຍຸດທະສາດ ແລະ ການຮ່ວມມືຮອບດ້ານຂອງ ຫວຽດນາມ ກັບບັນດາສະມາຊິກ G20 ນັບມື້ນັບໄດ້ເປີດກ້ວາງ, ກ້າວເຂົ້າສູ່ລວງເລິກ ແລະ ມີປະສິດທິຜົນ. ເປັນຄັ້ງທຳອິດທີ່ ຫວຽດນາມ ໄດ້ເຂົ້າຮ່ວມກອງປະຊຸມສຸດຍອດ G20 ໃນປີ 2010 ໃນຖານະຕຳແໜ່ງເປັນປະທານ ອາຊຽນ. ຫຼັງປີ 2010, ເຖິງວ່າບໍ່ໄດ້ເຂົ້າຮ່ວມກອງປະຊຸມສຸດຍອດ G20 ແລ້ວກໍ່ຕາມ, ແຕ່ ຫວຽດນາມ ຍາມໃດກໍ່ເອົາໃຈໃສ່ຕິດຕາມບັນດາຫົວຂໍ້ ແລະ ສຸມໃສ່ເຂົ້າໂຄງການດຳເນີນງານຂອງ G20.

ທ່ານເອກອັກຄະລັດຖະທູດ ດ່ວານຊວນຮືງ ເນັ້ນໜັກວ່າ: ປີ 2017, ຫວຽດນາມ ພັດໄດ້ຖືກເຊີນເຂົ້າຮ່ວມກອງປະຊຸມສຸດຍອດ G20 ແລະ ກອງປະຊຸມກ່ຽວຂ້ອງ, ແຕ່ດ້ວຍຖານະເປັນປະທານ “ປີ APEC 2017”. ນີ້ແມ່ນຄວາມເປັນກຽດ, ພ້ອມທັງແມ່ນຄວາມຮັບຜິດຊອບຂອງ ຫວຽດນາມ ທີ່ໄດ້ເຂົ້າຮ່ວມປະກອບສ່ວນເຂົ້າໃນບັນດາວຽກງານສຳຄັນທົ່ວໂລກ.

ເມື່ອເຕື້ອງເຖິງກອງປະຊຸມລັດຖະມົນຕີການຕ່າງປະເທດ G20 ໃກ້ຈະມາເຖິງ, ທ່ານເອກອັກຄະລັດຖະທູດ ດ່ວານຊວນຮືງ ໃຫ້ຮູ້ວ່າ: ນີ້ແມ່ນໜຶ່ງໃນບັນດາການເຄື່ອນໄຫວສຳຄັນຂອງ G20, ປະກອບສ່ວນຕັ້ງໜ້າກະກຽມກອງປະຊຸມສຸດຍອດໃນເດືອນ 7/2017. ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ຟ້າມບີ່ງມີງ ຈະນຳໜ້າຄະນະຜູ້ແທນ ຫວຽດນາມ ເຂົ້າຮ່ວມກອງປະຊຸມລັດຖະມົນຕີການຕ່າງປະເທດ G20. ຫວຽດນາມ ຈະສົມທົບກັບບັນດາປະເທດ ຊຸກຍູ້ບັນດາບັນຫາລວມຂອງສາກົນຄື: ເພີ່ມທະວີການພົວພັນຮ່ວມມື, ໜູນຊ່ວຍບັນດາປະເທດພວມພັດທະນາປະຕິບັດບັນດາເປົ້າໝາຍພັດທະນາແບບຍືນຍົງຕາມໂຄງການດຳເນີນງານ 2030 ຂອງ ສປຊ, ເພີ່ມທະວີການຮ່ວມມືປັບປຸງສະພາບແວດລ້ອມແຫ່ງສັນຕິພາບ, ສະຖຽນລະພາບໃນພາກພື້ນ ແລະ ໃນໂລກ.