(ທ່ານນາຍົກລັດຖະມົນຕີ  ຟ້າມມິນຈິງ ພົບປະກັບທ່ານປະທານາທິບໍດີ Burundian, Evariste Ndayishimiye)

  ວັນທີ 22 ກັນຍາ (ຕາມເວລາທ້ອງຖິ່ນ), ເນື່ອງໃນໂອກາດເຂົ້າຮ່ວມວາລະປຶກສາຫາລືຂັ້ນສູງ ຂອງກອງປະຊຸມສະມັດຊາໃຫຍ່ສະຫະປະຊາຊາດຊຸດທີ 78 ແລະ ບັນດາການເຄື່ອນໄຫວ 2 ຝ່າຍຢູ່ ອາເມລິກາ, ທ່ານນາຍົກລັດຖະມົນຕີ ຫວຽດນາມ ຟ້າມມິນຈິງ ໄດ້ມີການພົບປະກັບທ່ານປະທານາທິບໍດີ Burundian, Evariste Ndayishimiye. ນະທີ່ນີ້, ທ່ານນາຍົກລັດຖະມົນຕີ ຟ້າມມິນຈິງ ສະເໜີໃຫ້ Burundian ສ້າງເງື່ອນໄຂສະດວກໃຫ້ແກ່ບັນດາວິສາຫະກິດຂອງ ຫວຽດນາມ ທີ່ດຳເນີນທຸລະກິດຢູ່ປະເທດນີ້, ພ້ອມທັງເໜີໃຫ້ 2 ຝ່າຍເພີ່ມທະວີບັນດາການເຄື່ອນໄຫວແລກປ່ຽນຄະນະຜູ້ແທນ, ຍູ້ແຮງບັນດາກົນໄກຮ່ວມມື ແລະ ເພີ່ມທະວີການແລກປ່ຽນການຄ້າ ກໍ່ຄືການຮ່ວມມືດ້ານກະສິກຳ.

(ທ່ານນາຍົກລັດຖະມົນຕີ ຟ້າມມິນຈິງ ພົບປະກັບທ່ານ Eric Adams, ເຈົ້າຄອງນະຄອນ ນິວຢອກ)

          ແລະກໍ່ໃນວັນທີ 22 ກັນຍາ, ທີ່ການພົບປະກັບເຈົ້າຄອງນະຄອນ ນິວຢອກ ທ່ານ Eric Adams, ທ່ານນາຍົກລັດຖະມົນຕີ ຟ້າມມິນຈິງ ຢືນຢັນວ່າ: ຫວຽດນາມ ຖືເປັນສຳຄັນການຊຸກຍູ້ການພົວພັນຮ່ວມມືກັບ ນິວຢອກ, ເຊິ່ງແມ່ນສູນການຄ້າ, ການເງິນແຖວໜ້າຂອງໂລກ ແລະ ຈະຮັບປະກັນສິດຜົນປະໂຫຍດຂອງບັນດານັກລົງທຶນ ແລະ ວິສາຫະກິດ ອາເມລິກາ ເວົ້າລວມ ແລະ ນະຄອນ ນິວຢອກ ເວົ້າສະເພາະ, ຢູ່ ຫວຽດນາມ.

          ທີ່ການພົບປະກັບບັນດາສະມາຊິກເຄືອຂ່າຍນະວັດຕະກຳ ຫວຽດນາມ ຢູ່ ອາເມລິກາ ເຊິ່ງໄດ້ດຳເນີນໄປໃນວັນດຽວກັນ, ທ່ານນາຍົກລັດຖະມົນຕີ ຟ້າມມິນຈິງ ສະເໜີວ່າ, ບັນດາການເຄື່ອນໄຫວນະວັດຕະກຳຂອງເຄືອຂ່າຍຄວນສຸມໃສ່ຊຸກຍູ້ບັນດາຂົງເຂດໃໝ່, ຄື: ການຫັນເປັນດີຈີຕອນ, ຫັນເປັນສີຂຽວ, ເສດຖະກິດໝູນວຽນ, ເສດຖະກິດແບ່ງປັນ ແລະ ຂົງເຂດພື້ນຖານໂຄງລ່າງ. ທ່ານນາຍົກລັດຖະມົນຕີ ຢືນຢັນວ່າ ພັກ ແລະ ລັດ ຍາມໃດກໍ່ສະໜັບສະໜູນ, ສ້າງເງື່ອນໄຂສະດວກໃຫ້ແກ່ບັນດາການເຄື່ອນໄຫວນະວັດຕະກຳ; ສືບຕໍ່ສ້າງສຳເລັດລະບອບລະບຽບການ, ກົນໄກ, ນະໂຍບາຍໃຫ້ແກ່ນະວັດຕະກຳ.

          ວັນທີ 22 ກັນຍາ, ທ່ານນາຍົກລັດຖະມົນຕີ ຟ້າມມິນຈິງ ໄດ້ຕີີຣະຄັງເປີດກອງປະຊຸມການຄ້າຢູ່ຕະຫຼາດຫຼັກຊັບ NASDAQ, ໄດ້ເຮັດວຽກກັບບັນດາການນຳ NASDAQ ແລະ ພົບປະກັບບັນດາວິສາຫະກິດໂດຍ NASDAQ ແນະນຳ.

(ທ່ານນາຍົກລັດຖະມົນຕີ ຟ້າມມິນຈິງ ກ່າວຄຳເຫັນທີ່ພິທີ)

         ຕອນຄ່ຳວັນທີ 22 ກັນຍາ (ຕາມເວລາທ້ອງຖິ່ນ), ຢູ່ສຳນັກງານອົງການສະຫະປະຊາຊາດທີ່ນະຄອນນິວຢອກ, ອາເມລິກາ, ທ່ານນາຍົກລັດຖະມົນຕີ ຟ້າມມິນຈິງ ໄດ້ເປັນປະທານພິທີສະເຫຼີມສະຫຼອງ 78 ປີແຫ່ງວັນຊາດສາທາລະນະລັດສັງຄົມນິຍົມ ຫວຽດນາມ (02 ກັນຍາ 1945 - 02 ກັນຍາ 2023) ແລະ 46 ປີ ທີ່ ຫວຽດນາມ ເຂົ້າເປັນສະມາຊິກສະຫະປະຊາຊາດ (20 ກັນຍາ 1977-20 ກັນຍາ 2023).