ຄວາມຄາດຫວັງພັດທະນາປະເທດຊາດໃຫ້ຈະເລີນຮຸ່ງເຮືອງ, ຜາສຸກ ແມ່ນຈະແຈ້ງທີ່ສຸດ
(VOVWORLD) - ກອງປະຊຸມສຳມະນາລະດັບຊາດ “ນໍາມະຕິກອງປະຊຸມໃຫຍ່ຄັ້ງທີ 13 ຂອງ ພັກກອມມູນິດ ຫວຽດນາມ ເຂົ້າສູ່ຊີວິດຕົວຈິງ: ບັນດາບັນຫາທິດສະດີ ແລະ ພຶດຕິກຳໃໝ່” ຖືກດຳເນີນໃນຕອນເຊົ້າວັນທີ 16 ມິຖຸນາ, ຢູ່ຮ່າໂນ້ຍ.
ກອງປະຊຸມສຳມະນາລະດັບຊາດ “ນໍາມະຕິກອງປະຊຸມໃຫຍ່ຄັ້ງທີ 13 ຂອງ ພັກກອມມູນິດ ຫວຽດນາມ ເຂົ້າສູ່ຊີວິດຕົວຈິງ: ບັນດາບັນຫາທິດສະດີ ແລະ ພຶດຕິກຳໃໝ່” (ພາບ: TTXVN) |
ທ່ານສາດສະດາຈານ ປະລິນຍາເອກ ຫວູວັນຮ່ຽນ, ຮອງປະທານສະພາທິດສະດີສູນກາງພັກ ຖືວ່າ ບັນຫາທີ່ໄດ້ວາງອອກແມ່ນ ຕ້ອງກຳແໜ້ນສະພາບການ, ຍາດແຍ່ງກາລະໂອກາດ, ຜ່ານຜ່າສິ່ງທ້າທາຍ ນຳປະເທດສືບຕໍ່ພັດທະນາຕາມທິດສັງຄົມນິຍົມ ເໝືອນດັ່ງເນື້ອໃນຈິດໃຈຂອງມະຕິ. ທ່ານກ່າວວ່າ:
“ບັນຫາປະສານສົມທົບກຳລັງແຮງຂອງຊາດກັບກຳລັງແຮງຂອງຍຸກສະໄໝ ແມ່ນບັນຫາຫຼັກແຫຼ່ງແກ່ນສານໃນການພົວພັນສາກົນ ສະນັ້ນ ຕ້ອງສ້າງຍຸດທະສາດພົວພັນຕ່າງປະເທດຍາວນານໃນການພົວພັນກັບພາກພື້ນ, ກັບບັນດາປະເທດບ້ານໃກ້ເຮືອນຄຽງ, ກັບເພື່ອນມິດທີ່ເປັນມູນເຊື້ອ. ຈາກການສັງເກດຄືແນວນັ້ນ, ນີ້ກໍແມ່ນການກຳນົດທິດທີ່ຕ້ອງເອົາໃຈໃສ່ ເມື່ອປະຕິບັດການນຳມະຕິຂອງພັກເຂົ້າສູ່ຊີວິດຕົວຈິງ ຕ້ອງເນັ້ນໜັກເຖິງບັນຫານີ້”.
ເມື່ອເຕື້ອງເຖິງບັນດາປັດໄຈສຳຄັນເພື່ອນຳມະຕິຂອງພັກເຂົ້າສູ່ຊີວິດຕົວຈິງ, ທ່ານ ຫງວຽນຊວັນຖັ໊ງ, ຜູ້ອຳນວຍການສະຖາບັນການເມືອງແຫ່ງຊາດ ໂຮ່ຈີມິນ, ປະທານສະພາທິດສະດີສູນກາງພັກ, ເນັ້ນໜັກວ່າ:
“ນັບແຕ່ຫົວຂໍ້ຕະຫຼອດຮອດເປົ້າໝາຍສັງລວມ ຕ່າງກໍສະແດງໃຫ້ເຫັນຢ່າງຈະແຈ້ງກ່ຽວກັບຄວາມຄາດຫວັງພັດທະນາປະເທດຊາດໃຫ້ຈະເລີນຮຸ່ງເຮືອງ, ປະເທດຊາດເຂັ້ມແຂງສີວິໄລແບບຍືນຍົງ ແລະ ປະຊາຊົນອີ່ມໜຳສຳລານ, ສົມບູນພູນສຸກ. ນັບແຕ່ເມື່ອ ຫວຽດນາມ ມີໂຄງການການເມືອງສະບັບທຳອິດ ກໍໄດ້ສະແດງໃຫ້ເຫັນຢ່າງຈະແຈ້ງເປົ້າໝາຍ ເອກະລາດແຫ່ງຊາດ ຕິດພັນກັບ ສັງຄົມນິຍົມ. ຄວາມຄາດຫວັງໃນເງື່ອນໄຂໃໝ່ ແມ່ນ ຫວຽດນາມ ມຸ່ງໄປເຖິງເປົ້າໝາຍ ກ້າວເດີນທຽບທັນກັບບັນດາປະເທດມະຫາອຳນາດໃນ 5 ທະວີບ ເພື່ອຢັ້ງຢືນທີ່ຕັ້ງບົດບາດຂອງປະເທດໃນ ໂລກ ເຊິ່ງພວມມີການປ່ຽນແປງຢ່າງໄວວາໃນປັດຈຸບັນ”.