(vovworld) - ວັນທີ 19/3, ຄະນະພົວພັນຕ່າງປະເທດສູນກາງພັກກອມມູນິດ ຫວຽດນາມ ຈັດຕັ້ງກອງປະຊຸມຄົບຄະນະພະນັກງານ ລັດຖະກອນໃນອົງການເພື່ອຮັບເອົາຄຳເຫັນປະກອບໃສ່ຮ່າງລັດຖະທຳມະນູນປີ 1992 ສະບັບປັບປຸງ. ບັນດາຄຳເຫັນປະກອບສະແດງຄວາມເຫັນດີເຫັນພ້ອມກັບຮ່າງລັດຖະທຳມະນູນສະບັບປັບປຸງ, ຕາມນັ້ນແລ້ວ, ບັນດາຈຸດໃໝ່ໃນຮ່າງລັດຖະທຳມະນູນ ໄດ້ຕອບສະໜອງຄວາມຕ້ອງການພັດທະນາ ແລະ ພຶດຕິກຳຕົວຈິງທີ່ໄດ້ວາງອອກໃຫ້ແກ່ປະເທດໃນໄລຍະໃໝ່ໂດຍພື້ນຖານ, ຮັບປະກັນການປ່ຽນໃໝ່ຢ່າງຄົບຊຸດທັງດ້ານເສດຖະກິດ ແລະ ການເມືອງ, ສ້າງລັດແຫ່ງອຳນາດນິຕິບັນຍັດສັງຄົມນິຍົມ ຂອງ ປະຊາຊົນ, ໂດຍປະຊາຊົນ ແລະ ເພື່ອປະຊາຊົນ. ພິເສດ, ຮ່າງລັດຖະທຳມະນູນໄດ້ຮັບການເພີ່ມເຕີມເຮັດແຈ້ງສິດທິມະນຸດ ແລະ ສິດພົນລະເມືອງ, ຄວາມຮັບຜິດຊອບຂອງລັດ ແລະ ສັງຄົມໃນການຮັບຮູ້, ເຄົາລົບນັບຖື, ປົກປ້ອງ ແລະ ຮັບປະກັນສິດທິມະນຸດ, ສິດພົນລະເມືອງ, ກໍ່ຄືສຳລັບຊາວ ຫວຽດນາມ ອາໄສຢູ່ຕ່າງປະເທດ. ນີ້ແມ່ນບັນດາຈຸດພິເສດຂອງຮ່າງລັດຖະທຳມະນູນ ສະບັບປັບປຸງ ຄັ້ງນີ້.
ກອງປະຊຸມກໍ່ໄດ້ເນັ້ນໜັກວ່າ ໃນວິວັດການປັບປຸງລັດຖະທຳມະນູນ, ຄະນະພົວພັນຕ່າງປະເທດ ສູນກາງ ຄວນຍູ້ແຮງວຽກງານໂຄສະນາເຜີຍແຜ່, ປະກອບຂໍ້ມູນຂ່າວຢ່າງທັນການ ແລະ ຄົບຖ້ວນໃຫ້ເພື່ອນມິດສາກົນ ກ່ຽວກັບຈຸດປະສົງ, ເນື້ອໃນປັບປຸງລັດຖະທຳມະນູນ, ພ້ອມທັງຕໍ່ສູ້ກັບບັນດາອິດທິກຳລັງທີ່ເປັນປໍລະປັກທັງຢູ່ພາຍໃນ ແລະ ຕ່າງປະເທດ ທີ່ສວຍໃຊ້ການປະກອບຄຳເຫັນປັບປຸງລັດຖະທຳມະນູນເພື່ອເສກສັນປັ້ນແຕ່ງແນວທາງ, ນະໂຍບາຍຂອງພັກ, ລັດ, ແບ່ງແຍກກຸ່ມກ້ອນມະຫາສາມັກຄີທົ່ວປວງຊົນ.