ງານວາງສະແດງ
(ພາບ: Thanh Tùng/TTXVN)
|
(vovworld) – ງານວາງສະແດງວິຈິດສິນ “ທະເລ, ໝູ່ເກາະ ແລະ ທະຫານເຮືອ” ໂດຍມະຫາວິທະຍາໄລ ວິຈິດສິນ ຫວຽດນາມ, ເຫຼົ່າທັບເຮືອ ສົມທົບກັນຈັດຕັ້ງຂຶ້ນໃນຕອນເຊົ້າວັນທີ 5/5, ຢູ່ ຮ່າໂນ້ຍ, ເພື່ອແນະນຳ 36 ຜະລິດຕະພັນຂອງນັກຈິດຕະກອນ, ນັກແກະຄວັດສະຫຼັກ 28 ຄົນເຊິ່ງແມ່ນພະນັກງານ, ຄູສອນຂອງ ມະຫາວິທະຍາໄລ ວິຈິດສິນ ຫວຽດນາມ. ບັນດາຜະລິດຕະພັນໃນງານວາງສະແດງໄດ້ສະແດງຢ່າງມີຊີວິດຊີວາຮູບພາບຂອງທະເລ, ໝູ່ເກາະ ແລະ ທະຫານເຮືອ, ສະແດງນ້ຳໃຈຂອງພະນັກງານ, ຄູສອນຂອງໂຮງຮຽນ ກັບບັນດາຜູ້ພວມປົກປັກຮັກສາອະທິປະໄຕທະເລ, ໝູ່ເກາະ, ເຂດນ່ານທະເລຂອງປະເທດຊາດ. ງານວາງສະແດງໄດ້ປະກອບສ່ວນຍົກສູງສະຕິຄວາມຮັບຮູ້, ປຸກລຸກຄວາມເອກອ້າງທະນົງໃຈ, ສະຕິຄວາມຮັບຜິດຊອບຂອງປະຊາຊົນທີ່ມີຕໍ່ພາລະກິດປົກປັກຮັກສາອະທິປະໄຕຂອງປະເທດຊາດ. ພັນເອກ ມາຍຈ້ອງດິ້ງ, ຮອງຫົວໜ້າການເມືອງເຫຼົ່າທັບເຮືອ, ໃຫ້ຮູ້ວ່າ:
“ຂ້າພະເຈົ້າແມ່ນທະຫານເຮືອ ດັ່ງນັ້ນມີຄວາມຮັບຮູ້ວ່າງານວາງສະແດງນີ້ໄດ້ສ່ອງແສງການເຄື່ອນໄຫວຂອງທະຫານເຮືອຢ່າງມີຊີວິດຊີວາທີ່ສຸດ, ພິເສດແມ່ນບັນດານັກຮົບທີ່ພວມປະຕິບັດໜ້າທີ່ຢູ່ໝູ່ເກາະ ເຈື່ອງຊາ, ຮ້ານເວນຍາມ DK1. ງານວາງສະແດງກໍ່ໄດ້ສ່ອງແສງຄວາມມຸງມາດປາດຖະໜາ, ນ້ຳໃຈ, ເຈດຈຳນົງຂອງບັນດາທະຫານເຮືອ ແລະ ກໍ່ສະແດງຄວາມຕັດສິນໃຈ, ເຈດຈຳນົງຂອງທະຫານເຮືອທີ່ໝັ້ນໝາຍຕໍ່ພັກ, ລັດ ແລະ ປະຊາຊົນ, ຍາມໃດກໍ່ປົກປັກຮັກສາອະທິປະໄຕເຂດທະເລ, ໝູ່ເກາະຂອງປະເທດຊາດ.”