(ທ່ານນາຍົກລັດຖະມົນຕີ ຫວຽດນາມ ຫງວຽນເຕີ໋ນຢຸງ)
(vovworld) – ທ່ານນາຍົກລັດຖະມົນຕີ ຫວຽດນາມ ຫງວຽນເຕີ໋ນຢຸງ ໄດ້ຕົກລົງຈັດຕັ້ງເວທີປາໄສຄູ່ຮ່ວມມືພັດທະນາປີ 2015 (VDPF 2015). ທ່ານນາຍົກລັດຖະມົນຕີ ຫງວຽນເຕີ໋ນຢຸງ ມອບໝາຍໃຫ້ກະຊວງແຜນການ ແລະ ການລົງທຶນ ກະກຽມເນື້ອໃນລະອຽດ, ສຸມໃສ່ບັນດາບັນຫາ ຫວຽດນາມ ພວມເອົາໃຈໃສ່ ແລະ ຢາກຮັບຟັງຄຳເຫັນຈາກບັນດາຄູ່ຮ່ວມມືພັດທະນາໃນສະພາວະພວມກະກຽມ ແລະ ຜັນຂະຫຍາຍການເຊື່ອມໂຍງໃນໄລຍະ 2016 – 2020 ຢ່າງເລິກເຊິ່ງ ກ້ວາງຂວາງ ແລະ ແທດຈິງ. ທ່ານນາຍົກລັດຖະມົນຕີ ຈະເຂົ້າຮ່ວມ ແລະ ເຈລະຈາກັບບັນດາຄູ່ຮ່ວມມືພັດທະນາຢູ່ເວທີປາໄສ VDPF 2015. ເວທີປາໄສ VDPF ແມ່ນເວທີປາໄສສົນທະນາກ່ຽວກັບນະໂຍບາຍຂັ້ນສູງ, ສ້າງເງື່ອນໄຂປຶກສາຫາລືນະໂຍບາຍລະຫວ່າງລັດຖະບານ ຫວຽດນາມ, ບັນດານັກອຸປະຖຳ, ພາກເອກະຊົນ, ບັນດາອົງການຈັດຕັ້ງສັງຄົມພົນລະເຮືອນສາກົນ ແລະ ຢູ່ພາຍໃນປະເທດ, ບັນດາສະຖາບັນຄົ້ນຄວ້າພາຍໃນປະເທດ ແລະ ພາກສ່ວນອື່ນໆທີ່ກ່ຽວຂ້ອງ ເພື່ອແນໃສ່ເພີ່ມທະວີພັດທະນາເສດຖະກິດ - ສັງຄົມຮອບດ້ານ ແລະ ປັບປຸງຊີວິດການເປັນຢູ່ໃຫ້ແກ່ປະຊາຊົນ ຫວຽດນາມ.